ଅନୁଗୋଳ: କ୍ଷତି ସହୁଛନ୍ତି ଶହ ଶହ ବାଇଗଣ ଚାଷୀ । ଲକଡାଉନ ସମୟରେ ଗାଡି ମୋଟର ବନ୍ଦ ଯୋଗୁ ଚାଲାଣ ହୋଇ ନପାରି ଗଛରେ ପଚିଲା କୁଇଣ୍ଟାଲ କୁଇଣ୍ଟାଲ ବାଇଗଣ । ଏବେ ଲକଡାଉନ କୋହଳ ହୋଇ ଥିଲେ ମଧ୍ୟ ଚାଷୀଙ୍କୁ ମିଳୁନି ଉଚିତ ଦର । ମୁଣ୍ଡ ଝାଳ ତୁଣ୍ଡରେ ମାରି ଦି ପଇସା ପାଇବା ଆଶାରେ ଚାଷ କରିଥିବା ଚାଷିଙ୍କ ଦୁର୍ଦଶା ବଢି ଯାଇଛି । ଖର୍ଚ୍ଚ କରିଥିବା ସାର ଔଷଧର ମୂଲ୍ୟ ମିଳୁନି ।
ଅନୁଗୋଳ ଜିଲ୍ଲାର ବଅଁରପାଳ ବ୍ଲକ ସନ୍ତରାପୁର ଗାଁରେ ଦେଖିବାକୁ ମିଳିଛି ବାଇଗଣ ଚାଷୀଙ୍କ ଏଭଳି ପରିସ୍ଥିତି। ଜିଲ୍ଲାର ବଅଁରପାଳ ବ୍ଲକର ସନ୍ତରାପୁର ଗାଁରେ ବସବାସ କରନ୍ତି ୩ ଶହରୁ ଅଧିକ ପରିବାର । ସମସ୍ତେ ଚାଷୀ । ଧାନ ଚାଷ ବ୍ୟତୀତ ବାଇଗଣ ଚାଷ ହେଉଛି ଏହି ଚାଷୀମାନଙ୍କର ମୁଖ୍ୟ ଅର୍ଥକରୀ ଫସଲ । ପ୍ରାୟ ୨ଶହ ଏକରରୁ ଅଧିକ ଜମିରେ କେବଳ ବାଇଗଣ ଚାଷ କରନ୍ତି । ବର୍ଷରେ ଦୁଇ ଥର ଏହି ଫସଲ ହୁଏ। ଦୈନିକ ଶହେ କୁଇଣ୍ଟାଲରୁ ଅଧିକ ବାଇଗଣ ଉତ୍ପନ ହୁଏ ।
ପରିବାରର ପିଲା ଛୁଆ ଓ ମହିଲାଙ୍କ ସମେତ ସମସ୍ତେ ବାଇଗଣ ବାଡିରେ କାମରେ ଲାଗି ପଡନ୍ତି । ଜଣେ ଜଣେ ଚାଷି ବାର୍ଷିକ ପ୍ରାୟ ୫ ରୁ ୬ଲକ୍ଷ ଟଙ୍କା ପର୍ଯ୍ୟନ୍ତ ଏହି ଚାଷରୁ ରୋଜଗାର କରୁଛନ୍ତି । କିନ୍ତୁ ଚଳିତ ବର୍ଷ ଚାଷୀଙ୍କ ଉପରେ କରୋନା ମାଡ଼ ସେମାନଙ୍କ ମେରୁଦଣ୍ଡ ଦୋହଲାଇ ଦେଇଛି । ଠିକ ଅମଳ ସମୟରେ କୋରୋନା ପାଇଁ ଲକଡାଉନ କଟକଣା ଲାଗିଲା । ଫଳରେ କୌଣସି ଗାଡି ଚଳାଚଳ ହେଲା ନାହିଁ । ବାହାର ଜିଲାରୁ ବେପାରୀ ଆସିଲେ ନାହିଁ । ହାଟ ବଜାରକୁ ନେଇ ଚାଷୀମାନେ ବିକ୍ରି କରି ପାରିଲେ ନାହିଁ । ଫଳରେ ଶହ ଶହ କୁଇଣ୍ଟାଲ ବାଇଗଣ ବାଡ଼ିରେ ପଡି ସଢିଲା । ପୋକ ଲାଗି ନଷ୍ଟ ହୋଇ ଗଲା । ଧାର କରଜ କରି ଚାଷୀମାନେ ସାର ଔଷଧ ପକାଇ ଥିଲେ। ଅକ୍ଲାନ୍ତ ପରିଶ୍ରମ କରିଥିଲେ । ସେ ସବୁ ପାଣିରେ ପଡିଲା । କ୍ଷତି ସହିଲେ ଚାଷୀ ।
ଏଠାରୁ ଅଧିକାଂଶ ବାଇଗଣ କଟକ, ଭୁବନେଶ୍ବର, ଖୋର୍ଦ୍ଧା, ପୁରୀ ଆଦି ଜିଲ୍ଲାକୁ ଯାଏ । ସେଠାରୁ ବେପାରୀମାନେ ଆସି ଗାଡ଼ିରେ ବାଇଗଣ ନେଇ ଯାଆନ୍ତି । ଏହାଛଡା ଅନୁଗୁଳ ଜିଲ୍ଲାର ବିଭିନ୍ନ ହାଟ ବଜାରକୁ ମଧ୍ୟ ବିକ୍ରି ପାଇଁ ଯାଏ । ଏବେ ଲକଡାଉନ କୋହଳ ହେବା ପରେ ଗାଡି ଚଳାଚଳ ସ୍ବାଭାବିକ ହୋଇଛି । ହାଟ ବଜାର ମଧ୍ୟ ଖୋଲି ଯାଇଛି । କିନ୍ତୁ ବେପାରୀ ମାନେ ଶାଗ ମାଛ ଦରରେ ବାଇଗଣ କିଣି ନେଉଛନ୍ତି । କେଜି ପ୍ରତି ୫ ରୁ ୮ଟଙ୍କାରେ ଚାଷୀଙ୍କଠାରୁ ବାଇଗଣ କିଣି ନେଉଛନ୍ତି । ଫଳରେ କ୍ଷତି ସାହୁଛି ଚାଷୀ । ବାଡିରେ ପଚିସଢ଼ି ନଷ୍ଟ ହେବା ଭୟରେ ଚାଷୀ ବାଧ୍ୟ ହୋଇ ବିକ୍ରି କରି ଦେଉଛନ୍ତି । ହେଲେ ସେତିକିରେ ସାର ଔଷଧ ଖର୍ଚ୍ଚ ମଧ୍ୟ ବାହାରୁନି । ଏମାନଙ୍କୁ ସରକାରୀ ସ୍ତରରେ କୌଣସି ସହାୟତା ମିଳୁନି । କେବଳ ନିଜ ଉଦ୍ୟମ ଓ ନିଜସ୍ୱ ଜ୍ଞାନ କୌଶଳରେ ବର୍ଷ ବର୍ଷ ଧରି ଚାଷ କରୁଛନ୍ତି । ଏଭଳି ପରିସ୍ଥିତିରେ କ୍ଷତି ସହି ବାକୁ ପଡ଼ୁଥିବାରୁ ସେମାନଙ୍କ ଆର୍ଥିକ ପରିସ୍ଥିତି ବିଗିଡି ଯାଇଛି ।
ଏହି ବାଇଗଣ ଚାଷୀ ଏବେ ଚାତକ ପରି ଚାହିଁ ବସିଛନ୍ତି ସରକାରୀ ସହାୟତାକୁ। ନଚେତ ସେମାନଙ୍କ ପରିବାର ଭୋକ ଉପାସରେ ରହିବେ। କରଜ ପରିଶୋଧ ପାଇଁ ଜମି ବିକ୍ରି କରିବାକୁ ପଡିବ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
