ଅନୁଗୋଳ: ତାଳଚେର ଜେଲରେ ବିଚାରଧୀନ କଏଦୀ ଭାବେ ଥିବା ଶିଶୁ ରୋଗ ବିଶେଷଜ୍ଞ ଡାକ୍ତର ପ୍ୟାରୀମୋହନ ପ୍ରଧାନଙ୍କ ମୃତ୍ୟୁ ପରେ ସମସ୍ତ କୋଇଲା ଖଣି ଗୁଡିକ ଆଂଶିକ ବନ୍ଦକୁ ବିରୋଧ । ବିଜେପି ପକ୍ଷରୁ ସାମ୍ବାଦିକ ସମ୍ମିଳନୀ ଜରିଆରେ ଏହାର ପ୍ରତିବାଦ କରାଯାଇଛି । ତୁରନ୍ତ ଖଣି ଖାଦାନ ଗୁଡ଼ିକୁ ସମ୍ପୂର୍ଣ୍ଣ ଚାଲୁ କରିବାକୁ ଦାବି କରିଛି ବିଜେପି ।
ଅନୁଗୋଳ ଜିଲ୍ଲା ତାଳଚେରର ବିଚାରଧୀନ କଏଦୀ ତଥା ଶିଶୁ ରୋଗ ବିଶେଷଜ୍ଞ ଡାକ୍ତର ପ୍ୟାରୀମୋହନ ପ୍ରଧାନଙ୍କ ମୃତ୍ୟୁ ପରେ ସମସ୍ତ କୋଇଲା ଖଣି ଗୁଡିକ ଆଂଶିକ ବନ୍ଦକୁ ବିଜେପି ପକ୍ଷରୁ ବିରୋଧ କରାଯାଇଛି । ଅନୁଗୋଳ ଜିଲ୍ଲା ବିଜେପି ପକ୍ଷରୁ ଏକ ସାମ୍ବାଦିକ ସମ୍ମିଳନୀ ମାଧ୍ୟମରେ ଏହାର ପ୍ରତିବାଦ କରାଯାଇଛି । ଗତ (ଶୁକ୍ରବାର) ଠାରୁ ଡାକ୍ତରଙ୍କ ମୃତ୍ୟୁ ପରେ ଅନୁଗୋଳ ଆରକ୍ଷୀ ଅଧିକ୍ଷକଙ୍କ ବଦଳି ଦାବି ଓ ତଦନ୍ତକାରୀ ଅଫିସରଙ୍କୁ ନିଲମ୍ବିତ କରିବା ପାଇଁ ଆନ୍ଦୋଳନ କରାଯାଇଥିଲା । ତେବେ ଏହି ଖଣି ବନ୍ଦ ଆନ୍ଦୋଳନ ତାଳଚେର ବିଜେଡି ପକ୍ଷରୁ କରାଯାଉଥିବା ନେଇ ଅଭିଯୋଗ କରିଛି ବିଜେପି । ଏହାସହ ତୁରନ୍ତ ଖଣି ଖାଦାନ ଗୁଡ଼ିକୁ ସମ୍ପୂର୍ଣ୍ଣ ଚାଲୁ କରିବାକୁ ବିଜେପି ଦାବି କରିଛି ।
ପ୍ରକାଶ ଥାଉକି, ନିଜ କ୍ଲିନିକରେ ଡାକ୍ତର ପ୍ୟାରୀମୋହନ ଜଣେ ନାବାଳିକାଙ୍କ ସହ ଅସଦାଚରଣ କରିଥିବା ନେଇ ଅଭିଯୋଗ ହୋଇଥିଲା । ଏହାପରେ ଡାକ୍ତରଙ୍କୁ ଗିରଫ କରିଥିଲା ଅନୁଗୋଳ ଜିଲ୍ଲା ତାଳଚେର ପୋଲିସ । ତେବେ ଘଟଣାର ତଦନ୍ତ ନକରି ତରବରିଆ ଭାବେ ଡାକ୍ତରଙ୍କୁ ଗିରଫ କରାଯାଇଥିବା ଅଭିଯୋଗ ଆଣିଥିଲେ ଲୋକେ । ଜେଲରେ ଡାକ୍ତରଙ୍କର ମୃତ୍ୟୁ ପରେ ପୋଲିସର ତଦନ୍ତ ପ୍ରକ୍ରିୟାକୁ ନେଇ ଲୋକେ ଥାନା ଘେରାଉ କରିବା ସହ ଏସ୍ପି ଅଫିସ ଘେରାଉ କରିଥିଲେ । ମୃତ ଡାକ୍ତର ପ୍ୟାରୀମୋହନ ତାଳଚେର ବିଧାୟକ ବ୍ରଜକିଶୋର ପ୍ରଧାନଙ୍କ ଦାଦା ହୋଇଥିବାରୁ ରାଜନୈତିକ ଆକ୍ରୋଶ ରଖି ତାଙ୍କୁ ଗିରଫ କରାଯାଇଥିବା ଅଭିଯୋଗ ଆଣିଥିଲେ ବିଧାୟକଙ୍କ ସମର୍ଥକ । ଯାହାକୁ ନେଇ ତାଳଚେର ଓ ଅନୁଗୋଳରେ ପୋଲିସ ବିରୋଧରେ ଅସନ୍ତୋଷ ବଢ଼ିବାରେ ଲାଗିଛି ।
ଇଟିଭି ଭାରତ, ଅନୁଗୋଳ
