ଅନୁଗୋଳ: ଦୀର୍ଘ 5ମାସ ପରେ ଚିତ୍ର ଶିଳ୍ପୀର ରଙ୍ଗତୂଳୀ ପୁଣି କଥା କହିଛି । କୋରୋନା କଟକଣା ଛଡାଇ ଦେଇଥିଲା ରଙ୍ଗ ଆଉ ତୂଳୀର ସମ୍ପର୍କ । ଏବେ ପୁଣିଥରେ ଯୋଡିହୋଇଛି ସେ ସମ୍ପର୍କ । କାହିଁକି ନା କୋରୋନା କଟକଣା ପାଇଁ ହାତବାନ୍ଧି ବସିଥିବା ଚିତ୍ରଶିଳ୍ପୀକୁ ମିଳିଛି କାମ ।
ସହରାଞ୍ଚଳରେ ବସବାସ କରୁଥିବା ଚିତ୍ରଶିଳ୍ପୀ, କାରିଗର ଓ ମହିଳା ଗୋଷ୍ଠୀ ମାନଙ୍କୁ ରୋଜଗାର ଯୋଗାଇବା ପାଇଁ ସରକାର ଆଣିଛନ୍ତି ନୂଆ ନୂଆ ଯୋଜନା । ଏହାର ସଫଳ ରୂପାୟନ ଦେଖିବାକୁ ମିଳିଛି ଅନୁଗୋଳ ସହରରେ । ଅର୍ବାନ ୱେଜ ଏମ୍ପ୍ଲଇମେଣ୍ଟ ଇନିସିଏଟିଭ ସ୍କିମ ଜରିଆରେ ସରକାରୀ କାନ୍ଥ ଗୁଡିକୁ ରଙ୍ଗ କରିବା ସହ ସୁନ୍ଦର ସୁନ୍ଦର ଚିତ୍ର ଅଙ୍କାଯାଉଛି । ଯାହାକୁ ଆଙ୍କି ଅନେକ ଚିତ୍ରଶିଳ୍ପୀ କାମ ପାଇବା ସହ ରୋଜଗାରକ୍ଷମ ହୋଇଛନ୍ତି ।
ଅର୍ବାନ ୱେଜ ଏମ୍ପ୍ଲଇମେଣ୍ଟ ଇନିସିଏଟିଭ ଯୋଜନାରେ ଅନୁଗୋଳ ସହର ପାଇଁ 96ଲକ୍ଷ ଟଙ୍କା ଯୋଗାଇ ଦେଇଛନ୍ତି ସରକାର । 54ଟି ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ କାର୍ଯ୍ୟାଦେଶ ଦିଆଯାଇଛି । ସେହି ଗୋଷ୍ଠୀ ସହାୟତାରେ ସହରର ଶତାଧିକ ଚିତ୍ରଶିଳ୍ପୀ ଏବେ କାମ ପାଇଛନ୍ତି ।
ଅନୁଗୋଳ ସହରର ହୁଳୁରୁସିଂଘା, ପିଟିସି, ବସଷ୍ଟାଣ୍ଡ, ଜିଲା କାର୍ଯ୍ୟାଳୟ, ପୌର କାର୍ଯ୍ୟାଳୟ ସମେତ23ଟି ୱାର୍ଡର ବିଭିନ୍ନ ସ୍ଥାନରେ ସୁନ୍ଦର ସୁନ୍ଦର ଚିତ୍ର ଅଙ୍କା ଯାଉଛି। ବିଭିନ୍ନ ସରକାରୀ ଯୋଜନା ସମ୍ପର୍କିତ, ବନ୍ୟଜନ୍ତୁ, କରୋନା ସଚେତନତା, ସ୍ଵଚ୍ଛତା, ଟ୍ରାଫିକ ନିୟମ, ମହାପୁରୁଷ ମାନଙ୍କ ଚିତ୍ର ଆଦି ବିଭିନ୍ନ କିସମର ଚିତ୍ର ଅଙ୍କା ଯାଇଛି । ଯାହା ଦେଖିବାକୁ ବେଶ ଆକର୍ଷଣୀୟ ହୋଇଛି । ସହର ସୁନ୍ଦର ଲାଗୁଛି । ଆଉ ଶିଳ୍ପୀ,ମହିଳା ଗୋଷ୍ଠୀ ମଧ୍ୟ ରୋଜଗାର ପାଇଛନ୍ତି ।
କୋରୋନା ସମୟରେ ସରକାରଙ୍କ ଏଭଳି ଯୋଜନା ବହୁତ ଗୁରୁତ୍ବପୂର୍ଣ୍ଣ । ଏହା ଦ୍ବାରା ବହୁ ମହିଳା ଓ ଚିତ୍ରଶିଳ୍ପୀ ନିଜେ ବଞ୍ଚି ନିଜ ନିଜ ପରିବାରକୁ ପ୍ରତିପୋଷଣ କରି ପାରିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
