ଅନୁଗୋଳ: ଜିଲ୍ଲାରେ ହେବାକୁ ଥିବା ଜିଲ୍ଲା ମହୋତ୍ସବ ପାଇଁ ପ୍ରାରମ୍ଭିକ ପର୍ବ ମଶାଲ ଶୋଭାଯାତ୍ରା ଆରମ୍ଭ ହୋଇଯାଇଛି । ଜିଲ୍ଲାର ତିନୋଟି ପ୍ରମୁଖ ପର୍ଯ୍ୟଟନସ୍ଥଳୀରୁ ମଶାଲ ବାହାରି ଜିଲ୍ଲା ପରିକ୍ରମା କରିଛି । ଆସନ୍ତା ଫେବୃଆରୀ ମାସ ୭ ତାରିଖ ଠାରୁ ୯ ତାରିଖ ପର୍ଯ୍ୟନ୍ତ ଚାଲିବ ଅନୁଗୋଳ ଜିଲ୍ଲା ମହୋତ୍ସବ ।
ଜିଲ୍ଲାର ଆଠମଲ୍ଲିକର ଦେଉଳଝରି , ପାଲଲହଡାର ଖୁଲୁଡି ଓ ସାତକୋଶିଆର ଟିକରପଡାରୁ ଜିଲ୍ଲା ମହୋତ୍ସବ ପାଇଁ ମଶାଲ ଶୋଭାଯାତ୍ରା ବାହାରିଛି । ମଶାଲ ଗୁଡିକ ବିଭିନ୍ନ ଗାଁ ଓ ପଞ୍ଚାୟତ ପରିକ୍ରମା କରି ଶକ୍ତିପୀଠ ହିଙ୍ଗୁଳାଙ୍କ ଠାରେ ଏକାଠି ହୋଇଥିଲେ । ସେଠାରୁ ଜ୍ୟୋତିକୁ ଆଣି ଶୈଳ ଶ୍ରୀକ୍ଷେତ୍ର ଜଗନ୍ନାଥ ମନ୍ଦିରରେ ପ୍ରଜ୍ଵଳିତ କରି ରଖାଯାଇଛି । ଏଥିପାଇଁ ସବୁଠି ପ୍ରବଳ ଆଗ୍ରହ ଓ ଉତ୍ସାହ ଦେଖିବାକୁ ମିଳିଛି । ସବୁ ଗାଁର ପୁରୁଷ ମହିଳା ଓ ଛାତ୍ରଛାତ୍ରୀମାନେ ସମସ୍ତେ ମଶାଲକୁ ଗାଁ ପରିକ୍ରମା କରାଇଛନ୍ତି ।
ଅନ୍ୟପଟେ ଚଳିତ ବର୍ଷ ମହୋତ୍ସବର ବାର୍ତ୍ତା ରହିଛି ଜଳ ସଂରକ୍ଷଣ । ଜିଲ୍ଲାରେ ଯେଉଁ ଭଳି ଭାବେ ଦିନକୁ ଦିନ ଭୂତଳ ଜଳ ନିମ୍ନଗାମୀ ହେଉଛି ତାର କିଭଳି ସଂରକ୍ଷଣ କରାଯିବ ତାର ବାର୍ତ୍ତା ନେଇ ଏହି ମଶାଲ ଶୋଭାଯାତ୍ରା କରାଯାଉଛି। ଏହାଛଡା ସରକାରଙ୍କ ବିଭିନ୍ନ ବିଭାଗର ଯୋଜନା ଗୁଡିକର ରଥ ମଧ୍ୟ ଏହି ଶୋଭାଯାତ୍ରାରେ ସାମିଲ ହୋଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
