ଅନୁଗୋଳ: ଜୈବ ବିବିଧତା ଓ ଜଙ୍ଗଲ ସମ୍ପର୍କରେ ଜ୍ଞାନ ଆରୋହଣ ପାଇଁ ‘ୟୁଥ ହଷ୍ଟେଲ ଅଫ ଇଣ୍ଡିଆ’ ପକ୍ଷରୁ ଏକ ନିଆର ଅଭିଯାନ ଆରମ୍ଭ ହୋଇଛି। ଅନୁଗୋଳର ସାତକୋଶିଆ ଅଭୟାରଣ୍ୟର ବନ୍ୟଜନ୍ତୁ, ଜଙ୍ଗଲୀ ପରିବେଶ ସମ୍ପର୍କରେ ଜାଣିବା ପାଇଁ ରାଜ୍ୟର ବିଭିନ୍ନ ଅଞ୍ଚଳରୁ ଯୁବକ, ଯୁବତୀ, ସ୍କୁଲ ଛାତ୍ରଛାତ୍ରୀ ଓ ବୁଦ୍ଧିଜୀବି ସାମିଲ ହୋଇଥିଲେ ଏହି ଅଭିଯାନରେ। ଅଭୟାରଣ୍ୟ ମଧ୍ୟରେ ଚାଲି ଚାଲି ବୁଲିଛନ୍ତି ପ୍ରାୟ ୭ରୁ ୮ କିଲୋମିଟର ପର୍ଯ୍ୟନ୍ତ।
ସାତକୋଶିଆର ଜୈବ ବିବିଧତା ସାରା ବିଶ୍ଵରେ ବିରଳ। ଏଠାକାର ପରିବେଶ, ପ୍ରକୃତି, ଜଙ୍ଗଲ ଓ ଜଙ୍ଗଲୀ ଜନ୍ତୁଙ୍କ ସମ୍ପର୍କରେ ଜାଣିବା ପାଇଁ ଏକାଠି ହୋଇଥିଲେ ସବୁ ବର୍ଗର ଲୋକେ। ଜଙ୍ଗଲ ଭିତରେ ଚାଲି ଚାଲି ବୁଲିଥିଲେ ପ୍ରାୟ ୭ ରୁ ୮ କିଲୋମିଟର ବ୍ୟାସାର୍ଦ୍ଧ ମଧ୍ୟରେ ଥିବା ଅଞ୍ଚଳ। ରବିବାର ଏଭଳି ଦୃଶ୍ୟ ଦେଖିବାକୁ ମିଳିଥିଲା ଅନୁଗୋଳ ଜିଲ୍ଲା ସାତକୋଶିଆ ଅଭୟାରଣ୍ୟରେ। ‘ୟୁଥ ହଷ୍ଟେଲ ଅଫ ଇଣ୍ଡିଆ’ ପକ୍ଷରୁ ଆୟୋଜିତ ଟ୍ରାକିଂରେ ରାଜ୍ୟର ବିଭିନ୍ନ ସ୍ଥାନରୁ ଶତାଧିକ ଯୁବକ ଯୁବତୀ, ଛାତ୍ରଛାତ୍ରୀ, ବରିଷ୍ଠ ନାଗରିକ ଓ ବିଭିନ୍ନ ବର୍ଗର ଲୋକ ସାମିଲ ହୋଇ ବୁଲିଥିଲେ ସାତକୋଶିଆ ଜଙ୍ଗଲ।
ଅଭୟାରଣ୍ୟର ହାତୀବାରି ଠାରୁ କନ୍ଧ ଅଏଡା ପର୍ଯ୍ୟନ୍ତ ପ୍ରାୟ ୭ କିମି ବାଟ ଘଞ୍ଚ ଜଙ୍ଗଲ ଭିତରେ ଟ୍ରାକିଂ କରିଥିଲେ ସମସ୍ତେ। ଟ୍ରାକିଂ ବେଳେ ବିଭିନ୍ନ ପ୍ରକାର ଗଛ ଲତା ସମ୍ପର୍କରେ ଜାଣିଥିଲେ ଓ ବନ୍ୟଜନ୍ତୁଙ୍କ ପାଦ ଚିହ୍ନ ମଧ୍ୟ ଦେଖିଥିଲେ। ଏହା ସହିତ ଜଙ୍ଗଲ ଓ ବନ୍ୟ ଜନ୍ତୁଙ୍କ କିଭଳି ସୁରକ୍ଷା ଦେବା ସେ ସମ୍ପର୍କରେ ଶିକ୍ଷା ଲାଭ କରିଥିଲେ ସମସ୍ତେ। ପ୍ରକୃତି ସମ୍ପର୍କରେ ଜାଣିବା ଓ ତାର ସୁରକ୍ଷା ପାଇଁ ସଚେତନତା ଉଦ୍ଦେଶ୍ୟରେ ହୋଇଥିଲା ଏହି କାର୍ଯ୍ୟକ୍ରମ।
ଦୁଇଦିନ ଧରି ଚାଲିଥିବା ଏହି କ୍ୟାମ୍ପରୁ ପ୍ରକୃତିକୁ ଜାଣିଲେ ହିଁ ତାର ସୁରକ୍ଷା କରିହେବ। ଏଭଳି ସଚେତନତା ବାର୍ତ୍ତା ନେଇ ଫେରିଛନ୍ତି ସମସ୍ତେ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
