ଅନୁଗୋଳ: ରାଷ୍ଟ୍ରାୟତ୍ତ ଉଦ୍ୟୋଗ ଏନଟିପିସିର ୪୬ ତମ ପ୍ରତିଷ୍ଠା ଦିବସ ପାଳିତ ହୋଇଯାଇଛି । ଅନୁଗୋଳ ଜିଲ୍ଲାର କଣିହାଁ ୟୁନିଟିରେ ଏହି ଦିବସକୁ କୋଭିଡ କଟକଣା ମଧ୍ୟରେ ପାଳନ କରାଯାଇଛି । ପ୍ଲାଣ୍ଟର ପ୍ରଶାସନିକ କାର୍ଯ୍ୟାଳୟରେ ଏନଟିପିସିର ପତାକା ଉତ୍ତୋଳନ କରିଥିଲେ କମ୍ପାନୀର ମୁଖ୍ୟ ମହାପ୍ରବନ୍ଧକ ସୁଦୀପ ନାଗ ।
46 ବର୍ଷରେ ରାଷ୍ଟ୍ରାୟତ୍ତ ଉଦ୍ୟୋଗ NTPC, ନିରନ୍ତର ଦେଶକୁ ଯୋଗାଇ ଚାଲିଛି ବିଦ୍ୟୁତ
ବିଜୁଳି ଉତ୍ପାଦନକାରୀ କମ୍ପାନୀ ହିସାବରେ ଏନଟିପିସି ନିଜର ସମସ୍ତ ଦାଇତ୍ବ ବୋଧକୁ ଏହି କୋଭିଡ ସମୟରେ ପାଳନ କରିଆସିଛି । କୋଭିଡର ଚ୍ୟାଲେଞ୍ଜକୁ ମୁକାବିଲା କରି ଶତପ୍ରତିଶତ ଉତ୍ପାଦନ ଜାରିରଖିଛି କମ୍ପାନୀ । ଯାହା ପାଇଁ ଡିଜିଟାଲି ଆୟୋଜିତ ସଭାରେ ସମସ୍ତ କର୍ମଚାରୀଙ୍କ ପ୍ରଚେଷ୍ଟାକୁ ପ୍ରଶଂସା କରିଥିଲେ କମ୍ପାନୀର ମହାପ୍ରବନ୍ଧକ ।
ଏହି ପତାକା ଉତ୍ତୋଳନ କାର୍ଯ୍ୟକ୍ରମରେ କମ୍ପାନୀର ଅନ୍ୟ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ । ଏହି ଅବସରେ ଭର୍ଚୁଆଲି ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯାଇଥିଲା ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
