ଅନୁଗୁଳ: ଦିନକୁ ଦିନ ଜିଲ୍ଲାରେ କୋରୋନା ସଂକ୍ରମିତଙ୍କ ସଂଖ୍ୟା ସଂଖ୍ୟା ବୃଦ୍ଧି ପାଉଛି । ବିଶେଷ କରି ବାହାରୁ ଆସୁଥିବା ଲୋକଙ୍କ ଦ୍ବାରା ଅଧିକ ସଂକ୍ରମଣ ବ୍ୟାପୁଛି । ଏହାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି । ସପ୍ତାହନ୍ତ ସଟଡାଉନ ବି ଜାରି ରହିଛି । ତଥାପି କୋରୋନା ସଂକ୍ରମିତଙ୍କ ସଂଖ୍ୟାରେ ବୃଦ୍ଧି ଜିଲ୍ଲା ପ୍ରଶାସନର ଚିନ୍ତାକୁ ଦ୍ବିଗୁଣିତ କରିଛି । ଏହି ପରିପ୍ରେକ୍ଷୀରେ ଜିଲ୍ଲାପାଳ ମନୋଜ କୁମାର ମହାନ୍ତି ଶନିବାର ଆଉ ଏକ ନିର୍ଦ୍ଦେଶନାମା ଜାରି କରିଛନ୍ତି ।
ଯେକୌଣସି କୋରୋନା ହଟସ୍ପଟ୍ ଜିଲ୍ଲା କିମ୍ବା ଅଞ୍ଚଳରୁ ଅନୁଗୁଳ ଆସିବା ଉପରେ କଡା କଟକଣା ଲଗାଯାଇଛି । ଅତି ଜରୁରୀ ପରିସ୍ଥିତିରେ କେହି ଆସିିଲେ 14 ଦିନ କ୍ବାରେନଣ୍ଟାଇନ ରହିବା ନିୟମକୁ ବାଧ୍ୟତାମୂଳକ କରାଯାଇଛି । ଜିଲ୍ଲାପାଳଙ୍କ ଏହି ନିର୍ଦ୍ଦେଶନାମାକୁ ଜିଲ୍ଲାବାସୀ ସ୍ବାଗତ କରିଛନ୍ତି ।
ଅନୁଗୁଳ ଏକ ଶିଳ୍ପ ବହୁଳ ଜିଲ୍ଲା ହୋଇଥିବା ବେଳେ ଅଧିକାଂଶ କୋରୋନା ଶିଳ୍ପସଂସ୍ଥାର କର୍ମଚାରୀ ରହୁଛନ୍ତି । ଶନିବାର ସୁଦ୍ଧା 132 ଜଣ କୋରୋନା ପଜିଟିଭ ଚିହ୍ନଟ ହୋଇଥିବା ବେଳେ ଜଣଙ୍କ ମୃତ୍ୟୁ ହୋଇଛି । ତେଣୁ ଏଭଳି କଟକଣା ହିଁ ସଂକ୍ରମଣକୁ ରୋକିପାରିବ ବୋଲି ଜନସାଧାରଣ ଆଶା କରୁଛନ୍ତି ।
ପ୍ରକାଶ ଥାଉ କି, ଶୁକ୍ରବାର ବିଳମ୍ବିତ ରାତିରେ ଗଞ୍ଜାମ ଓ ଯାଜପୁର ଜିଲ୍ଲାରୁ ଅନୁଗୁଳ ଆସୁଥିବା ଲୋକଙ୍କ ଦୃଷ୍ଟିରେ ରଖି ଏହି ବିଜ୍ଞପ୍ତି ଜାରି କରିଥିଲେ ଜିଲ୍ଲାପାଳ ।
ଅନୁଗୁଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
