ଟୋକିଓ: ଭାରତୀୟ କୁସ୍ତି ଯୋଦ୍ଧା ଦୀପକ ପୁନିଆ ୮୬ କିଗ୍ରା ଫ୍ରିଷ୍ଟାଇଲ ବର୍ଗ ଅଲମ୍ପିକ ସେମି ଫାଇନାଲରେ ୧୦-୦ ରେ ପରାଜିତ ହୋଇଛନ୍ତି । ଆମେରିକାର ଡେଭିଡ ଟେଲର ପୁନିଆଙ୍କୁ ପରାସ୍ତ କରିଛନ୍ତି ।
ଗୁରୁବାର ଟେଲର ସ୍ବର୍ଣ୍ଣ କିମ୍ବା ରୌପ୍ୟ ପାଇଁ ପ୍ରତିଯୋଗିତା କରିବାକୁ ଥିବାବେଳେ ପୁନିଆ କାଂସ୍ୟ ପଦକ ପାଇଁ ମୁକାବିଲା କରିବେ । ବୁଧବାର ଖେଳାଯାଇଥିବା ମ୍ୟାଚରେ ଟେଲର ପୁନିଆଙ୍କୁ ସହଜରେ ପରାଜିତ କରିଥିଲେ ।
ତେବେ ବୁଧବାର ୫୭ କିଗ୍ରା ବର୍ଗରେ ଖେଳାଯାଇଥିବା ସେମି ଫାଇନାଲରେ ଭାରତୀୟ କୁସ୍ତି ଯୋଦ୍ଧା ରବି ଦହିୟା ବିଜୟୀ ହୋଇଛନ୍ତି । କାଜକସ୍ତାନର ନୁରିସ୍ଲାମ ସାନାୟେଭଙ୍କୁ ପରାସ୍ତ କରିଛନ୍ତି ଦହିୟା ।
ଗୁରୁବାର ରବି ଫାଇନାଲ ମ୍ୟାଚରେ ସ୍ବର୍ଣ୍ଣ ପଦକ ପାଇଁ ଲଢ଼େଇ କରିବେ । ୨୦୧୨ରେ ସୁଶୀଲ କୁମାରଙ୍କ ପରେ ପ୍ରଥମ ଥର ପାଇଁ ଭାରତୀୟ କୁସ୍ତିଯୋଦ୍ଧା ଭାବେ ଫାଇନାଲ ଖେଳିବେ ରବି । ପ୍ରଥମ ପିରିୟଡରେ ରବି ୨-୧ ରେ ଆଗୁଆ ରହିଥିଲେ, ଆଉ ଦ୍ବିତୀୟ ପିରିୟଡରେ ଚାପ ସାନାୟେଭଙ୍କ ଉପରେ ରହିଥିଲା । ତେବେ ସେ ପୁଣି କମବ୍ୟାକ କରିଥିଲେ କିନ୍ତୁ ଦହିୟା ମ୍ୟାଚ ନିଜ ନାଁ ରେ କରନେଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
