ଟୋକିଓ: ଚଳିତ ଟୋକିଓ ଅଲମ୍ପିକ୍ରେ ସୋମବାର କ୍ବାର୍ଟର-ଫାଇନାଲରେ ପ୍ରବେଶ କରିଛନ୍ତି ଭାରତୀୟ ପୁରୁଷ ତୀରନ୍ଦାଜୀ ଟିମ । ପ୍ରବୀଣ ଯାଦବ, ଅତନୁ ଦାସ ଓ ତରୁଣଦୀପ ରାୟଙ୍କ ଭାରତୀୟ ତୀରନ୍ଦାଜୀ ଟିମ ପ୍ରି-କ୍ବାର୍ଟର ଫାଇନାଲ ମୁକାବିଲାରେ କାଜାଖିସ୍ତାନକୁ 6-2ରେ ହରାଇଛନ୍ତି । ଏବେ କ୍ବାର୍ଟର ଫାଇନାଲରେ ହେଭିୱେଟ୍ କୋରିଆ ସହିତ ଭାରତୀୟ ଟିମର ମୁକାବିଲା ରହିଛି ।
ଭାରତୀୟ ଖେଳାଳି ଲୟରେ ନଜର ଆସିଛନ୍ତି, ବିଶେଷ କରି ଅତନୁ ଦାସ ଯିଏକି 5ଟି ଫରଫେକ୍ଟ 10 ସଟ୍ ସହ ଟିମକୁ 1/8 ଏଲିମିନେସନ ରାଉଣ୍ଡରେ ସହଜ ବିଜୟ ଦେଇଛନ୍ତି ।
ଡେନିସ ଗୈକିନ, ଇଲଫତ ଅବ୍ଦୁଲିନ ଓ ସଞ୍ଜର ଗୁସୟେବଙ୍କ କାଜାଖିସ୍ତାନ ଟିମ ଭଲ ପ୍ରଦର୍ଶନ ସହ କଡା ଟକ୍କର ଦେଇଥିଲେ । ତୃତୀୟ ସେଟ୍କୁ ଗୋଟିଏ ପଏଣ୍ଟ ବ୍ୟବଧାନରେ ଜିତିନେଇଥିଲେ, ମାତ୍ର ଭାରତୀୟ ଟିମକୁ ରୋକିବାରେ ବିଫଳ ହୋଇଥିଲେ ।
ଏହାପୂର୍ବରୁ ଭାରତୀୟ ମିଶ୍ରିତ ଯୋଡି ଶନିବାର କୋରିଆ ଠାରୁ ପରାସ୍ତ ହୋଇସାରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
