ନୂଆଦିଲ୍ଲୀ: ଅଗଷ୍ଟ ୮ ତାରିଖରେ ଶେଷ ହେବ କ୍ରୀଡ଼ାର ମହାକୁମ୍ଭ ଅଲମ୍ପିକ୍ । ତେବେ ଟୋକିଓରୁ ଫେରିବା ପରେ ଆସନ୍ତା ଅଗଷ୍ଟ ୧୫ ତାରିଖ ସ୍ବାଧୀନତା ଦିବସ ଅବସରରେ ସମ୍ପୂର୍ଣ୍ଣ ଭାରତୀୟ ଅଲମ୍ପିକ ଦଳକୁ ଲାଲ କିଲ୍ଲାକୁ ଆମନ୍ତ୍ରିତ କରିବେ ପ୍ରଧାନମନ୍ତ୍ରୀ ମୋଦି । ସମସ୍ତଙ୍କ ସହ ବ୍ୟକ୍ତିଗତ ଭାବେ ସାକ୍ଷାତ କରିବା ସହ କଥାବାର୍ତ୍ତା କରିବେ ପ୍ରଧାନମନ୍ତ୍ରୀ ।
ସୂଚନା ଅନୁସାରେ ସମସ୍ତ ଅଲମ୍ପିକ ଆଥଲେଟ୍ଙ୍କୁ ବିଶେଷ ଅତିଥି ଭାବେ ଡାକିବେ ପିଏମ ମୋଦି । ଭାରତୀୟ ଦଳ ଅଲମ୍ପିକ ଯିବା ପାଇଁ ପ୍ରସ୍ତୁତ ହେବା ବେଳେ ମଧ୍ୟ ପ୍ରଧାନମନ୍ତ୍ରୀ ସଭିଙ୍କ ସହ କଥାବାର୍ତ୍ତା କରି ତାଙ୍କ ମନୋବଳ ବଢ଼ାଇଥିଲେ । ତେବେ ସେମାନେ ଫେରିବା ପରେ ମଧ୍ୟ ତାଙ୍କୁ ଲାଲ କିଲ୍ଲା ଅତିଥି ଭାବେ ଆମନ୍ତ୍ରିତ କରିବା ସହ ନିଜ ଘରେ ତାଙ୍କ ସହ କଥାବାର୍ତ୍ତା କରିବେ ବୋଲି ଜଣାପଡ଼ିଛି ।
ଭାରତୀୟ ଦଳ ବର୍ତ୍ତମାନ ସୁଦ୍ଧା ଗୋଟିଏ ରୌପ୍ୟ ଓ ଗୋଟିଏ କାଂସ୍ୟ ପଦକ ସହ ଦୁଇଟି ପଦକ ଜିତିଛି । ଭାରୋତ୍ତୋଳନରେ ମୀରାବାଇ ଚାନୁ ପଦକ ଜିତିଥିବା ବେଳେ କ୍ରମାଗତ ଦ୍ବିତୀୟ ଥର ଅଲମ୍ପିକରେ ପଦକ ଜିତି ଦେଶ ପାଇଁ ଗର୍ବ ଆଣିଛନ୍ତି ପିଭି ସିନ୍ଧୁ । ତେବେ ମଙ୍ଗଳବାର ସେମି ଫାଇନାଲରେ ଭାରତୀୟ ହକି ଟିମ ପରାଜିତ ହୋଇଥିଲେ ସୁଦ୍ଧା କାଂସ୍ୟ ପଦକର ଆଶା ବର୍ତ୍ତମାନ ମଧ୍ୟ ଉଜ୍ଜୀବିତ ରହିଛି । ଗୁରୁବାର ଏହି ମ୍ୟାଚ ଖେଳାଯିବ । ସେପଟେ ବକ୍ସର ଲଭଲିନା ବର୍ଗୋହେନ ମଧ୍ୟ ମହିଳା ବକ୍ସିଂରେ ଭାରତ ପାଇଁ ପଦକ ସୁନିଶ୍ଚିତ କରିଛନ୍ତି ।
@ANI
