ହାଇଦ୍ରାବାଦ: ଭାରତୀୟ କ୍ରୀଡାପ୍ରେମୀଙ୍କ ପାଇଁ ସଫଳତମ ଦିନଟିଏ। ଇତିହାସ ରଚିଲେ ସାନିଆ ମିର୍ଜା । ତାରକା ଟେନିସ ଖେଳାଳି ସାନିଆ ମିର୍ଜା ଟେନିସ କୋର୍ଟରେ ପୁଣି ଦେଖାଇଛନ୍ତି ଜଲୱା। ହୋବାର୍ଟ ଇଣ୍ଟନ୍ୟାସନାଲରେ ଚମ୍ପିଆନ ହୋଇଛନ୍ତି ଏହି ଭାରତୀୟ ଟେନିସ ଷ୍ଟାର।
ହୋବାର୍ଟ ଇଣ୍ଟରନ୍ୟାସନାଲ ମହିଳା ଡବଲ୍ସ ଫାଇନାଲ ମୁକାବିଲାରେ ସାନିଆ-ନାଦିଆ ଯୋଡି ବାଜିମାତ କରିଛନ୍ତି। ଚାଇନାର ଏସ ଝାଙ୍ଗ ଓ ଏସ ପେଙ୍ଗଙ୍କୁ 6-4, 6-4 ସେଟରେ ହରାଇଛନ୍ତି ସାନିଆ ଯୋଡି । ଏଥିସହିତ ସାନିଆ ନିଜର କମବ୍ୟାକ ଟୁର୍ଣ୍ଣାମେଣ୍ଟକୁ ସ୍ମରଣୀୟ କରିଛନ୍ତି ।
ପ୍ରାୟ 2 ବର୍ଷରୁ ଅଧିକ ସମୟ ଧରି ଟେନିସ କୋର୍ଟରୁ ବାହାରେ ରହିଥିଲେ ମଧ୍ୟ ପ୍ରଥମ ଟୁର୍ଣ୍ଣାମେଣ୍ଟରେ ଦମଦାର କମବ୍ୟାକ କରିଛନ୍ତି । ମା' ହେବା ପରେ ସାନିଆ ପ୍ରଥମ ଥର ଟେନିସ କୋର୍ଟରେ ପାଦ ଦେଇଥିଲେ । ପ୍ରଥମ ଟୁର୍ଣ୍ଣାମେଣ୍ଟରେ ହିଁ ଚମ୍ପିଆନ ହୋଇଛନ୍ତି ପୂର୍ବତନ ବିଶ୍ବ ନଂ 1 ଟେନିସ ଖେଳାଳି ସାନିଆ ।
