ବେଲଗ୍ରେଡ: ବିଶ୍ବର ନଂ1 ଟେନିସ ଖେଳାଳି ନୋବାକ ଜୋକଭିକଙ୍କ ଆଖିରେ ଲୁହ । ଜୋକଭିକ ଫାଉଣ୍ଡେସନ ପକ୍ଷରୁ ଆୟୋଜିତ ଆଦ୍ରିଆ ଓପନ ଟେନିସ ଟୁର୍ଣ୍ଣାମେଣ୍ଟରେ ଆଲେକଜାଣ୍ଡର ଜର୍ଭଙ୍କ ବିପକ୍ଷରେ ବିଜୟୀ ହୋଇଥିଲେ ଜୋକଭିକ । ଏହାପରେ ସେ ଭାବବିହ୍ବଳ ହୋଇଥିବା ଦେଖାଯାଇଥିଲା । କିଛି ସମୟ ପାଇଁ ତାଙ୍କ ଆଖିରେ ଲୁହ ଦେଖିବାକୁ ମିଳିଥିଲା ।
ଏହାର କାରଣ ପିଲାଦିନର ସ୍ମୃତି ବୋଲି ଜୋକଭିକ କହିଛନ୍ତି । ଯେଉଁ ଟେନିସ କୋର୍ଟରେ ପିଲାଦିନେ ଅଭ୍ୟାସ କରୁଥିଲେ, ସେଠାରେ ପୁନର୍ବାର ଖେଳିଥିବାରୁ ସ୍ମୃତି ସବୁ ତାଜା ହୋଇଥିଲା ବୋଲି ସେ କହିଛନ୍ତି ।
ମହାମାରୀ କୋରୋନା ଭାଇରସ ଯୋଗୁଁ ସମସ୍ତ ପ୍ରକାର ଅନ୍ତର୍ଜାତୀୟ ଟେନିସ ଟୁର୍ଣ୍ଣାମେଣ୍ଟ ସ୍ଥଗିତ ରହିଛି । ତେବେ ନୋବାକ ଜୋକଭିକ ଫାଉଣ୍ଡେସନ ପକ୍ଷରୁ ଏକ ଘରୋଇ ଟେନିସ ଟୁର୍ଣ୍ଣାମେଣ୍ଟ ଆଦ୍ରିଆ ଓପନ ନାମରେ ଖେଳାଯାଉଛି । ଏଥିରେ ଏକାଧିକ ଖେଳାଳିଙ୍କୁ ଫାଉଣ୍ଡେସନ ପକ୍ଷରୁ ନିମନ୍ତ୍ରଣ କରାଯାଇ ମ୍ୟାଚର ଆୟୋଜନ କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
