ରାଉରକେଲା: ସୁନ୍ଦରଗଡ଼ ଜିଲ୍ଲା ହକି ପାଇଁ ସାରା ବିଶ୍ବରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛି । ଏହି ଆଦିବାସୀ ଅଧ୍ୟୁଷିତ ଜିଲ୍ଲା ହକି ମାଧ୍ୟମରେ ନିଜର ପ୍ରତିଭା ସାରା ବିଶ୍ବରେ ଦେଖାଇଛି । ସୁନ୍ଦରଗଡ଼ ଜିଲ୍ଲାର ବହୁ ଗ୍ରାମରୁ ଉଦୟ ହୋଇଛନ୍ତି ବହୁ ତାରକା ହକି ପ୍ଲେୟର । ଏହାରି ମଧ୍ୟରେ ଗୋଟିଏ ଗାଁ ହେଉଛି ବାଲିଶଙ୍କରା ବ୍ଲକର ସଉନାମରା ଗାଁ । ହକି ଭିଲେଜ ନାମରେ ପରିଚିତ ସଉନାମରା ଗାଁ । ହକିର ଏନ୍ତୁଡ଼ିଶାଳ ସୁନ୍ଦରଗଡ଼ ଜିଲ୍ଲା କିନ୍ତୁ ହକି ଖେଳାଳିଙ୍କ ହବ୍ ହେଉଛି ବାଲିଶଙ୍କରା ବ୍ଲକ । ଏହି ହବ୍ ଭିତରେ ହକି ପ୍ଲେୟରଙ୍କ କାରଖାନା ହେଉଛି ସଉନାମରା ଗାଁ ।
ଏଠାରେ ଛୋଟ ଛୋଟ ପିଲା ମଧ୍ୟ ଯେତେବେଳେ ଖେଳିବାକୁ ବାହାରନ୍ତି ସମସ୍ତଙ୍କ ହାତରେ ଏବଂ ଆଖିରେ ଗୋଟିଏ ସ୍ବପ୍ନ ହକି ଖେଳାଳି ହେବା । ତିନି ପିଢ଼ିରୁ ଅଧିକ ସମୟ ଧରି ଏଠାରେ ଲୋକଙ୍କ ମନରେ କେବଳ ହକି ହିଁ ହକି । ଏ ହେଉଛି ସେହି ଗାଁ ଯେଉଁଠାରେ ଜନ୍ମ ଗ୍ରହଣ କରିଥିଲେ ହକି କିମ୍ବଦନ୍ତୀ ପଦ୍ମଶ୍ରୀ ଦିଲ୍ଲୀପ ତିର୍କୀ । ଏହି ଗାଁ ରୁ ପ୍ରଥମ କରି ନିଜର ପ୍ରତିଭା ଦେଖାଇ ଭାରତୀୟ ଦଳରେ ସ୍ଥାନ ପାଇଥିଲେ ଏହି ହକି ଇଣ୍ଡିଆର ସଭାପତି । ସେ ପଲଟିଥିଲେ ଗାଁର ପରବର୍ତ୍ତୀ ପିଢ଼ି ପାଇଁ ଆଦର୍ଶ ।
ନିଜ ଖେଳ ଜୀବନରେ ବହୁ ମାଇଲଷ୍ଟନ ଅତିକ୍ରମ କରିଛନ୍ତି ଦିଲ୍ଲୀପ ତିର୍କୀ । ନିଜର ପ୍ରତିଭା ଦେଖାଇ ସେ ପଲଟିଥିଲେ ବିଶ୍ବର ସର୍ବଶ୍ରେଷ୍ଠ ଡିଫେଣ୍ଡର "wall of Indian hockey"। ଦିଲ୍ଲୀପ ତିର୍କୀଙ୍କ ନାଁ ରେ ରହିଛି ୪୧୧ ଅନ୍ତର୍ଜାତୀୟ ମ୍ୟାଚ ଖେଳିବା ସହ ୩ ଥର ଅଲମ୍ପିକ ଖେଳିବାର କୀର୍ତ୍ତିମାନ । ଭଲ ମଣିଷ ସହ କ୍ରୀଡ଼ାବିତରୁ ଆରମ୍ଭ କରି ଆଜି ସେ ହୋଇ ପାରିଛନ୍ତି ଜଣେ ଉତ୍ତମ କ୍ରୀଡା ସଂଗଠକ । ବର୍ତ୍ତମାନ ହକି ଇଣ୍ଡିଆର ସଭାପତି ଭାବେ ହକିର ଭିତ୍ତିଭୂମି ବିକାଶ କରିବା ପାଇଁ ଆଗେଇ ଆସିଛନ୍ତି ଦିଲ୍ଲୀପ ତିର୍କୀ ।
ସେହିପରି ଭାରତୀୟ ମହିଳା ହକି ଦଳର ତାରକା ସୁଭଦ୍ରା ପ୍ରଧାନ । ସେ ମଧ୍ୟ ଭାରତୀୟ ମହିଳା ହକି ଖେଳାଳି ଭାବରେ ନିଜର ପ୍ରତିଭା ଦେଖାଇଛନ୍ତି । ଏହା ପରେ 2020 ଟୋକିଓ ଅଲମ୍ପିକରେ ନିଜର ପ୍ରତିଭା ଦେଖାଇ ଭାରତୀୟ ଦଳକୁ ବ୍ରୋଞ୍ଜ ମେଡାଲ ଭେଟି ଦେବାର ସହାୟକ ହୋଇଥିଲେ ସଉନାମରା ଗ୍ରାମର ପୁଅ ଅମିତ ରୋହିଦାସ ।
ସେହିପରି ଆଉ ଜଣେ ହକି ତାରକା ମଧ୍ୟ ଅଛନ୍ତି ସେ ସଉନାମରା ଗ୍ରାମର ନୁହଁନ୍ତି କିନ୍ତୁ ସେ ହେଉଛନ୍ତି ବାଲିଶଙ୍କରା ବ୍ଲକର ଆଉ ଜଣେ ହକି ତାରକା ଲାଜରୁସ ବାର୍ଲା । ସେ ମଧ୍ୟ ଏହି ବାଲିଶଙ୍କରା ମାଟିରୁ ଯାଇ ଭାରତୀୟ ହକି ଦଳ ପାଇଁ ଅଲମ୍ପିକ ଖେଳିଛନ୍ତି ଏବଂ ଏସିଆନ ଗେମ୍ସ 1998ରେ ସେ ଭାରତୀୟ ବିଜୟୀ ଦଳରେ ନିଜର ପ୍ରମୁଖ ଭୂମିକା ନିଭାଇଥିଲେ । କେବେଳ ଏତିକି ନୁହେଁ ଏହି ସଉନାମୁରା ଗାଁ ହକିକୁ ଦେଇଛି ବଛା ବଛା ପ୍ଲେୟର । ସେମାନଙ୍କ ମଧ୍ୟରେ ଅଛନ୍ତି ଦୀପସାନ ତିର୍କୀ, ବିକାଶ ଟପ୍ପୋ, ଅମନଦୀପ ଲାକ୍ରା, ବିପିନ କେର୍କେଟାଙ୍କ ଭଳି ଅନ୍ତର୍ଜାତୀୟ ହକି ଖେଳାଳି ।
ହକିର ଗଡ଼ କହିଲେ ବୁଝାଏ ସୁନ୍ଦରଗଡ଼ ଜିଲ୍ଲାକୁ । ହୁଏତ କିଏ କହିବ ସୁନ୍ଦରଗଡ଼ ଜିଲ୍ଲା ହେଉଛି ପଛୁଆ ଜିଲ୍ଲା । କିନ୍ତୁ ଖେଳରେ କେବେ ବି ପଛୁଆ ରହିନାହିଁ ସୁନ୍ଦରଗଡ଼ ଜିଲ୍ଲା । ପୁଣି ଆମ ଜାତୀୟ ଖେଳ ହକି କହିଲେ ସୁନ୍ଦରଗଡ଼ ଜିଲ୍ଲାର ପିଲାଠାରୁ ନେଇ ବୃଦ୍ଧା ଯାଏ ସମସ୍ତଙ୍କ ରକ୍ତରେ ହକି ଖେଳ ରହିଛି । ବର୍ତ୍ତମାନ ଗାଁର ସବୁ ପିଲାଙ୍କ ହାତରେ ହକି ଷ୍ଟିକ । ସ୍ବପ୍ନ ଗୋଟିଏ ହକି ଖେଳି ଦେଶକୁ ଗୌରବାନ୍ବିତ କରିବା ।
ଭାରତୀୟ କ୍ରୀଡା ଜଗତ ପାଇଁ ଉଦାହରଣ ପାଲଟିଛି ଓଡିଶା । ରାଜ୍ୟ ସରକାରଙ୍କ ପ୍ରତ୍ସାହନ ଦ୍ବାରା ପୁରୁଷ ଓ ମହିଳା ହକି ଦଳର ପ୍ରଯୋଜକ ଭାବରେ ଓଡିଶା ତିଆରି କରିଛି ନୂତନ ସମ୍ଭାବନା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରଚେଷ୍ଟାରେ ଦ୍ବିତୀୟ ଥର ପାଇଁ ହକି ବିଶ୍ବକପ ଆୟୋଜନ କରି ଇତିହାସ ରଚିବାକୁ ଯାଉଛି ଓଡିଶା ।
ଇଟିଭି ଭାରତ, ରାଉରକେଲା
