ନୂଆଦିଲ୍ଲୀ: ଗୋଟିଏ ବର୍ଷ ପୂର୍ବରୁ ନିଷେଧ ହୋଇଥିବା ଦ୍ରବ୍ୟ ସେବନ କରି ଖେଳିବାରୁ ବାଦ ପଡିଥିବା ବକ୍ସର ସୁମିତ ସଙ୍ଗୱାନଙ୍କ ଉପରୁ ବ୍ୟାନ ହଟାଇଛି ନ୍ୟାସନାଲ ଆଣ୍ଟି ଡୋପିଂ ଏଜେନ୍ସି (ନାଡା) । ଅଜାଣତରେ ଔଷଧ ଖାଇଥିବା ନେଇ ସୁମିତ ପ୍ରମାଣ କରିବା ପରେ ତାଙ୍କ ଉପରୁ ହଟିଛି ବ୍ୟାନ ।
ପୂର୍ବତନ ଏସିଆ କ୍ରୀଡା ପ୍ରତିଯୋଗୀତାରେ ରୌପ୍ୟ ପଦକ ବିଜେତା ସୁମିତଙ୍କ ଡୋପିଂ ଟେଷ୍ଟ ବେଳେ ତାଙ୍କ ନମୁନାରୁ ଏସେଟାଜୋଲାମାଇଡ(Acetazolamide) ମିଳିଥିଲା । ଯାହାପରେ ତାଙ୍କୁ ଗୋଟିଏ ବର୍ଷ ପାଇଁ ଖେଳରୁ ବ୍ୟାନ କରାଯାଇଥିଲା । ତେବେ ସୁମିତ ଦେଇଥିବା ସମସ୍ତ ତଥ୍ୟ ପ୍ରମାଣିତ ହେବା ପରେ ତାଙ୍କ ଉପରୁ ବ୍ୟାନ ହଟାଇଛି ନାଡା ।
ତେବେ ବର୍ତ୍ତମାନ ସୁମିତ ଟୋକିଓ ଅଲମ୍ପିକରେ ମଧ୍ୟ ଅଂଶ ଗ୍ରହଣ କରିପାରିବେ । ବ୍ୟାନ ହଟିବା ପରେ ସଙ୍ଗୱାନ କହିଛନ୍ତି ଯେ ତାଙ୍କୁ ଏହି ସମୟରେ ଅନେକ କିଛି ସହିବାକୁ ପଡିଥିଲା । କିନ୍ତୁ ତାଙ୍କ ପରିବାର ସବୁବେଳେ ତାଙ୍କୁ ଏହି ପରିସ୍ଥିତିରୁ ବାହାରିବା ପାଇଁ ସହଯୋଗ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
