ନୂଆଦିଲ୍ଲୀ: ଚଳିତ ISSF ସୁଟିଂ ବିଶ୍ବକପରେ ଭାରତର ପଦକ ବିଜୟ ଅଭିଯାନ ଜାରି ରହିଛି । ରବିବାର ଭାରତୀୟ ପୁରୁଷ ଟିମ କିନାନ ଚେନାଇ, ପୃଥୀରାଜ ତୋଣ୍ଡାଇମାନ ଓ ଲକ୍ଷ ସେଓରନ ଟ୍ରାପ ଇଭେଣ୍ଟରେ ସ୍ବର୍ଣ୍ଣ ପଦକ ବିଜେତା ହୋଇଛନ୍ତି ।
ଭାରତୀୟ ଟିମ ସ୍ଲୋଭାକିଆକୁ 6-4ରେ ହରାଇ ସ୍ବର୍ଣ୍ଣ ପଦକ ହାସଲ କରିଛନ୍ତି । ଚଳିତ ଟୁର୍ଣ୍ଣାମେଣ୍ଟରେ 15 ସ୍ବର୍ଣ୍ଣ ସମେତ ମୋଟ 30 ପଦକ ସହ ପଦକ ତାଲିକାର ଶୀର୍ଷରେ ରହିଛି ଆୟୋଜକ ଭାରତ ।
ପୂର୍ବରୁ ଭାରତୀୟ ମହିଳା ଟିମ ରାଜେଶ୍ବରୀ କୁମାରୀ ମନୀଷା କୀର ଓ ଶ୍ରେୟସୀ ସିଂହ ଟ୍ରାପ ଟିମ ଇଭେଣ୍ଟରେ ସ୍ବର୍ଣ୍ଣ ହାତେଇଥିଲେ ।
ପୁରୁଷ 25 ମିଟର ରାପିଡ ଫାୟର ପିସ୍ତଲ ଟିମ ଇଭେଣ୍ଟରେ ମଧ୍ୟ ଭାରତ ରୌପ୍ୟ ପଦକ ହାତେଇଛି । ଭାରତୀୟ ଟିମ ଗୁରପ୍ରୀତ ସିଂହ, ବିଜୟବୀର ସିଧୁ ଓ ଆଦର୍ଶ ସିଂହ ଫାଇନାଲରେ ଆମେରିକୀୟ ସୁଟରଙ୍କ ଠାରୁ ପରାସ୍ତ ହେବାପରେ ରୌପ୍ୟରେ ସନ୍ତୁଷ୍ଟ ହୋଇଥିଲେ ।
ବ୍ୟୁରୋ ରିପୋର୍ଟ,ଇଟିଭି ଭାରତ
