ଟୋକିଓ: ୪୧ ବର୍ଷ ପରେ ସେମିରେ ପହଞ୍ଚିଛି ଭାରତ ପୁରୁଷ ହକି ଟିମ । ସେମିରେ ବିଶ୍ବ ଚମ୍ପିୟାନ ବେଲଜିୟମକୁ ଭେଟିବ ଟିମ ଇଣ୍ଡିଆ । ଏହି ମ୍ୟାଚ ଜିତିଲେ ଭାରତର ପଦକ ସୁନିଶ୍ଚିତ । ଭାରତୀୟ ପୁରୁଷ ହକି ଦଳକୁ ନେଇ କ୍ରୀଡା ପ୍ରେମୀଙ୍କ ମଧ୍ୟରେ ଉତ୍ସାହ ରହିଛି।
୧୩୦ କୋଟି ଭାରତୀୟଙ୍କ ନଜର ଆଜି ହକି ଦଳ ଉପରେ । ଶ୍ରେଷ୍ଠ ପ୍ରଦର୍ଶନ କରି ବେଲଜିୟମକୁ ହରାଇବାକୁ ପ୍ରୟାସ କରିବ ଭାରତ । ଏହା ସହିତ ବେଲଜିୟମ ବିପକ୍ଷରେ ପୂର୍ବ ପରାଜୟ ପ୍ରତିଶୋଧ ନେବାକୁ ଭାରତ ପାଖରେ ସୁଯୋଗ ମଧ୍ୟ ରହିଛି । ରିଓ ଅଲମ୍ପିକ୍ସରେ ବେଲଜିୟମଠାରୁ ପରାସ୍ତ ହୋଇଥିଲା ଟିମ ଇଣ୍ଡିଆ । ରିଓ କ୍ବାର୍ଟରରେ ୩-୧ରେ ଭାରତକୁ ହରାଇଥିଲା ବେଲଜିୟମ ।
ଅଷ୍ଟ୍ରେଲିଆ ବିପକ୍ଷରେ ପରାଜିତ ହେବା ପରଠୁ ଭାରତର ଭଲ ପ୍ରଦର୍ଶନ ରହିଛି । ଅନ୍ୟ ପଟେ ବେଲଜିୟମ ଶ୍ରେଷ୍ଠ ଦଳ ଭାବେ ପ୍ରମାଣିତ ହୋଇଛି । ବେଲଜିୟମକୁ ହରାଇବାରୁ ହେଲେ ଭାରତକୁ ଅଧିକ ପେନାଲ୍ଟି କର୍ଣ୍ଣର ସୁଯୋଗ ସୃଷ୍ଟି କରିବାକୁ ପଡିବ । ଭାରତୀୟ ଦଳର ସମସ୍ତ ଖେଳାଳିଙ୍କୁ ବଲ ପାସ କରି ଅଧିକ ସମୟ ନିଜ ନିୟନ୍ତ୍ରଣରେ ରଖିବାକୁ ପଡିବ ।
ଟୋକିଓ ଅଲମ୍ପିକ୍ସରେ ହକି କ୍ବାର୍ଟର ଫାଇନାଲରେ ଗ୍ରେଟ ବ୍ରିଟେନକୁ ମାତ ଦେଇଥିଲା ଟିମ ଇଣ୍ଡିଆ । ଏହି ବିଜୟ ସହ ଅଲମ୍ପିକ୍ସରେ ୪୧ ବର୍ଷ ପରେ ସେମିଫାଇନାଲ ଖେଳିବାକୁ ଯାଉଛି । ବ୍ରିଟେନକୁ ୩-୧ ଗୋଲରେ ଜିତିଥିଲା ଭାରତ । ତେବେ ଆଜିର ମ୍ୟାଚ ବିଜୟୀ ହୋଇ ଭାରତ ପାଖରେ ଇତିହାସ ସୃଷ୍ଟି କରିବାର ସୁଯୋଗ ରହିଛି ।
ବ୍ୟୁରୋ ରିପୋର୍ଟ,ଇଟିଭି ଭାରତ
