ଜାକର୍ତ୍ତା: ଇଣ୍ଡୋନେସିଆରେ ଆରମ୍ଭ ହୋଇଥିବା ଏସିଆ କପ୍ ହକି(Asia Cup Hockey) ଅଭିଯାନ ଡ୍ର'ରୁ ଆରମ୍ଭ କରିଛି ଭାରତୀୟ ଟିମ । ଚିର ପ୍ରତିନ୍ଦ୍ବନ୍ଦ୍ବୀ ପାକିସ୍ତାନ ବିପକ୍ଷ ରୋମାଞ୍ଚକର ମୁକାବିଲା ୧-୧ରେ ଡ୍ର'ରେ ଶେଷ ହୋଇଛି । ପ୍ରଥମ ତିନୋଟି କ୍ବାର୍ଟର ପର୍ଯ୍ୟନ୍ତ ଭାରତୀୟ ଟିମ ୧-୦ରେ ଅଗ୍ରଣୀ ରହିଥିଲା । ମାତ୍ର ଶେଷ କ୍ବାର୍ଟରରେ ପାକିସ୍ତାନ ପକ୍ଷରୁ ଏକମାତ୍ର ଗୋଲ୍ ଯୋଗୁଁ ମ୍ୟାଚ୍ ୧-୧ରେ ସମାପ୍ତ ହୋଇଥିଲା ।
ଶେଷ କ୍ବାର୍ଟରରେ ପାକିସ୍ତାନ ଖେଳାଳି ରାଣା ଏକ ପେନାଲ୍ଟି କର୍ଣ୍ଣରର ଫାଇଦା ଉଠାଇ ଭାରତକୁ ଏକ ଗୋଲ୍ ଦେଇଥିଲେ । ମ୍ୟାଚ୍ ଶେଷ ହେବାକୁ ମାତ୍ର ଦୁଇ ମିନିଟ ଥିବା ବେଳେ ଏହି ଗୋଲ୍ ଯୋଗୁଁ ପରାଜୟରୁ ବର୍ତ୍ତିଯାଇଥିଲା ପାକିସ୍ତାନ । ଅନ୍ୟପଟେ ଏକ ନିଶ୍ଚିନ୍ତ ବିଜୟରୁ ବଞ୍ଚିତ ହୋଇଥିଲା ବୀରେନ୍ଦ୍ର ଲାକ୍ରାଙ୍କ ନେତୃତାଧୀନ ଭାରତୀୟ ଟିମ । ପ୍ରଥମ କ୍ବାର୍ଟରରେ ଭାରତ ପକ୍ଷରୁ କାର୍ତ୍ତି ସେଲଭମ୍ ହିଁ ଗୋଟିଏ ମାତ୍ର ଗୋଲ ଦେବାକୁ ସକ୍ଷମ ହୋଇପାରିଥିଲେ ।
ଏହି ମ୍ୟାଚ୍ରେ ଭାରତକୁ ଅନେକ ପେନାଲ୍ଟି କର୍ଣ୍ଣର ମିଳିଥିଲା । ତେବେ ଦଳ ଏହାର ଫାଇଦା ଉଠାଇ ପାରିନଥିଲା । ସୋମବାର ପୁଲ୍- ଏ'ର ଏହା ପ୍ରଥମ ମ୍ୟାଚ୍ ଥିଲା । ଆସନ୍ତାକାଲି(ମଙ୍ଗଳବାର) ଭାରତ ପୁଲ୍-ଏ'ରେ ଜାପାନ ଦଳକୁ ଭେଟିବ ।
ବ୍ୟୁରୋ ରିପୋର୍ଟ, ଇଟିିଭି ଭାରତ
