କଟକ: ଓଡିଶାରେ ଫୁଟବଲ ବିକାଶ ପାଇଁ ଆରମ୍ଭ ହୋଇଛି ପ୍ରୟାସ । ତୃଣମୂଳସ୍ତରରୁ ଭଲ ଖେଳାଳି ଚୟନ କରିବା ପାଇଁ ଓଡିଶା ଫୁଟବଲ ସଙ୍ଘ (ଫାଓ) ପକ୍ଷରୁ ଆରମ୍ଭ ହୋଇଛି ଗ୍ରାସରୁଟ ସେଣ୍ଟର । ଓଡିଶାରେ ସଙ୍ଘ ପକ୍ଷରୁ ମୋଟ ୨୦ଟି ସେଣ୍ଟର ଖୋଲାଯାଇଛି । ଯେଉଁଠାରେ ୬ରୁ ୧୨ ବର୍ଷର ଉଭୟ ପୁରୁଷ ଓ ମହିଳା ଖେଳାଳି ନେଉଛନ୍ତି ସ୍ବତନ୍ତ୍ର ପ୍ରଶିକ୍ଷଣ । ପ୍ରତିଟି ସେଣ୍ଟରରେ ୩୦ ଜଣ ଖେଳାଳିଙ୍କୁ ମିଳୁଛି ପ୍ରଶିକ୍ଷଣ । ଉଭୟ ସର୍ବଭାରତୀୟ ଫୁଟବଲ ସଂଘ ଓ ରାଜ୍ୟ ଫୁଟବଲ ସଂଘର ମିଳିତ ଉଦ୍ୟମରେ ଏହି ପ୍ରୟାସ ଆରମ୍ଭ ହୋଇଛି ।
ତେବେ ରାଜ୍ୟରେ ତୃଣମୂଳସ୍ତରରୁ ମହିଳା ଫୁଟବଲ ପ୍ରତିଭା ଚିହ୍ନଟ ପାଇଁ ଏହି ଯୋଜନା କରିଛି ଓଡ଼ିଶା ଫୁଟବଲ ସଂଘ । ଆଜି କଟକରେ ଏନେଇ ବିଭିନ୍ନ ଜିଲ୍ଲାର ଫୁଟବଲ ଆସୋସିଏସନ୍ କର୍ମକର୍ତ୍ତା ଓ ବରିଷ୍ଠ ମହିଳା ଫୁଟବଲରମାନଙ୍କ ସହ ଏନେଇ ସଂଘ ଆଲୋଚନା ପର୍ଯ୍ୟାଲୋଚନା ଆରମ୍ଭ କରିଛି । ଗ୍ରାମାଞ୍ଚଳରେ ୬ ବର୍ଷରୁ ୧୨ ବର୍ଷର ବାଳିକାମାନଙ୍କ ମଧ୍ୟରେ ବିଭିନ୍ନସ୍ତରରେ ପ୍ରତିଯୋଗିତାମାନ ଆୟୋଜନ କରି ଫୁଟବଲ ପ୍ରତିଭାମାନଙ୍କୁ ଚିହ୍ନଟ କରାଯିବ । ଚିହ୍ନଟ ପ୍ରତିଭାମାନଙ୍କୁ ସ୍ବତନ୍ତ୍ର ପ୍ରଶିକ୍ଷଣ ଜରିଆରେ ରାଜ୍ୟ ଓ ଜାତୀୟସ୍ତରୀୟ ପ୍ରତିଯୋଗିତା ପାଇଁ ପ୍ରସ୍ତୁତ କରାଯିବ ବୋଲି ଫାଓର ବରିଷ୍ଠ ବୈଷୟିକ ପରାମର୍ଶଦାତା ସୂଚନା ଦେଇଛନ୍ତି ।
