ନୂଆଦିଲ୍ଲୀ: ଦୁଇ ଥର ଏସିଆନ ଗେମ୍ସରେ ରୌପ୍ୟ ପଦକ ଜିତିସାରିଥିବା ଭାରତୀୟ ମହିଳା ଧାବିକା ଦୂତୀ ଚାନ୍ଦଙ୍କ ଟୋକିଓ ଅଲମ୍ପିକ ଯୋଗ୍ୟତା ଅର୍ଜନ ଆଶାକୁ ସାମାନ୍ୟ ଝଟକା । କାରଣ କାଜାଖିସ୍ତାନରେ ହେବାକୁ ଥିବା ଇନଡୋର ଟ୍ରାକ୍ ଇଭେଣ୍ଟ ବାତିଲ ହେଇଛି ।
100ମିଟର ଦୌଡରେ ନ୍ୟାସନାଲ ରେକର୍ଡର ଅଧିକାରିଣୀ ଦୂତୀ, 29 ଜାନୁଆରୀରେ 60 ମିଟର ଇଣ୍ଡୋର ପ୍ରତିଯୋଗୀତାରେ ଭାଗ ନେବାରଥିଲା । ମାତ୍ର କୋଭିଡ-19 ମହାମାରୀ କାରଣରୁ ଶେଷ ମୂହୂର୍ତ୍ତରେ ଏହି ପ୍ରତିଯୋଗୀତାକୁ ବାତିଲ କରାଯାଇଛି । ଦୂତୀଙ୍କୁ ଏବେ 18 ଫେବ୍ରୁଆରୀରୁ ପଟିଆଲାରେ ହେବାକୁ ଥିବା ଘରୋଇ ପ୍ରତିଯୋଗୀତା ପାଇଁ ନିଜର ପ୍ରସ୍ତୁତି ଆରମ୍ଭ କରିବାକୁ ହେବ ।
100ମିଟର ଦୌଡରେ ଦୂତୀଙ୍କ ବ୍ୟକ୍ତିଗତ ସର୍ବଶ୍ରେଷ୍ଠ ଓ ଜାତୀୟ ରେକର୍ଡ 2019ରେ ରାଞ୍ଚିରେ 11.22 ସେକେଣ୍ଡ ରହିଛି । ତେବେ ଟୋକିଓ ଅଲମ୍ପିକ ଯୋଗ୍ୟତା ସମୟ 11.15 ସେକେଣ୍ଡ ରହିଛି । ଅର୍ଥାତ ଟୋକିଓ ଅଲମ୍ପିକ ପୂର୍ବରୁ ଦୌଡରାଣୀ ଦୂତୀଙ୍କୁ ପ୍ରଦର୍ଶନରେ ସୁଧାର ଆଣିବା ସହ ନିର୍ଦ୍ଧାରିତ ସମୟ ମଧ୍ୟରେ ଯୋଗ୍ୟତା ଅର୍ଜନ କରିବାକୁ ହେବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
