ଭୁବନେଶ୍ବର: ଓଡ଼ିଆ ମହିଳା ହକି ଷ୍ଟାର ଦୀପଗ୍ରେସ ଏକ୍କାଙ୍କୁ ୫୦ ଲକ୍ଷ ପୁରସ୍କାର । ପୁରସ୍କାର ଘୋଷଣା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଚୀନ୍ର ହାଙ୍ଗଝୌରେ ଶେଷ ହୋଇଥିବା ଏସିଆନ୍ ଗେମ୍ସ ୨୦୨୩ରେ ବ୍ରୋଞ୍ଜ ପଦକ ବିଜୟୀ ଭାରତୀୟ ହକି ଟିମ୍ରେ ଖେଳୁଥିଲେ ଓଡ଼ିଆ ଝିଅ ଦୀପଗ୍ରେସ ଏକ୍କା । ଏହା ସହିତ ରାଜ୍ୟର ଯୁବପିଢିଙ୍କ ପାଇଁ ଦୀପଗ୍ରେସ ଜଣେ ରୋଲ ମଡେଲ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
ସୁନ୍ଦରଗଡ଼ର ଏହି ହକି ଖେଳାଳି ୨୦୧୧ ମସିହାରେ ପ୍ରଥମ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ । ସେ ଉଭୟ ରିଓ ଏବଂ ଟୋକିଓ ଅଲମ୍ପିକରେ ଖେଳିଥିଲେ । ଏସିଆନ୍ ଗେମ୍ସ ୨୦୨୩ରେ ଜାପାନକୁ ହରାଇ ବ୍ରୋଞ୍ଜ ପଦକ ଜିତିଥିବା ଭାରତୀୟ ଟିମର ସଦସ୍ୟା ଥିଲେ ଦୀପଗ୍ରେସ । ମୁଖମନ୍ତ୍ରୀ କହିଛନ୍ତି, "ଦେଶ ପାଇଁ ଦୀପ ଗ୍ରେସ୍ ହେଉଛନ୍ତି ଗର୍ବ ଏବଂ ପ୍ରତୀକ ।" ମୁଖ୍ୟମନ୍ତ୍ରୀ ଦୀପଗ୍ରେସଙ୍କୁ ଶୁଭେଚ୍ଛା ଜଣାଇବା ସହ ତାଙ୍କୁ ପ୍ରଶଂସା କରିଛନ୍ତି । ଭାରତକୁ ଗର୍ବ ଆଣିବା ପାଇଁ ସେ ଏଭଳି ଧାରା ବଜାୟ ରଖିବେ ବୋଲି ମୁଖ୍ୟମନ୍ତ୍ରୀ ବିଶ୍ବାସ ରଖିଛନ୍ତି ।
ଚୀନର ହାଙ୍ଗଝୌରେ ଆୟୋଜିତ ଏସିଆନ ଗେମ୍ସରେ ଭାରତୀୟ ମହିଳା ହକି ଟିମ ସେମିଫାଇନାଲରେ ଚୀନ ଠାରୁ ହାରିବା ପରେ ବ୍ରୋଞ୍ଜ ପାଇଁ ଜାପାନ ସହ ଖେଳିଥିଲା । ତେବେ ଜାପାନକୁ ୨-୧ ଗୋଲରେ ହରାଇ ବ୍ରୋଞ୍ଜ ପଦକ ଅକ୍ତିଆର କରିଥିଲା ଭାରତ । ଏହି ବ୍ରୋଞ୍ଜ ପଦକ ଲଢ଼େଇରେ ଭାରତ ଓ ଜାପାନ ଖେଳାଳିଙ୍କ ମଧ୍ୟରେ କଡ଼ା ମୁକାବିଲା ହୋଇଥିବା ବେଳେ ବ୍ରୋଞ୍ଜ ଜିତିବାକୁ ସକ୍ଷମ ହୋଇଥିଲା ଭାରତ । ଭାରତୀୟ ମହିଳା ହକି ଖେଳାଳିଙ୍କ ଏହି ସଫଳତା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୁଭେଚ୍ଛା ଜଣାଇବା ସହ ପ୍ରତ୍ୟେକ ଖେଳାଳିଙ୍କ ପାଇଁ ୩ ଲକ୍ଷ ଟଙ୍କା ଲେଖାଏଁ ପୁରସ୍କାର ରାଶି ଘୋଷଣା କରିଥିଲେ । ଆଜି ଏହି ଦଳର ସଦସ୍ୟ ରହିଥିବା ଓଡ଼ିଆ ଖେଳାଳି ଦୀପଗ୍ରେସ ଏକ୍କାଙ୍କୁ ବ୍ୟକ୍ତିଗତ ଭାବେ ୫୦ ଲକ୍ଷ ପୁରସ୍କାର ରାଶି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ପ୍ରକାଶଯୋଗ୍ୟ, ଏଥର ଏସିଆନ୍ ଗେମ୍ସରେ ଦେଶ ପାଇଁ ମେଡଲ ଆଣିଥିବା ସମସ୍ତ ଓଡ଼ିଆ ଖେଳାଳିଙ୍କୁ ବ୍ୟକ୍ତିଗତ ଭାବେ ଶୁଭେଚ୍ଛା ଜଣାଇବା ସହ ପୁରସ୍କାର ରାଶି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବାନ ପଟ୍ଟନାୟକ । ଦୀପଗ୍ରେସଙ୍କ ପୂର୍ବରୁ ସ୍ବର୍ଣ୍ଣ ପଦକ ବିଜେତା ଭାରତୀୟ ପୁରୁଷ ହକି ଦଳର ସମସ୍ତ ଖେଳାଳି ଓ ସଦସ୍ୟଙ୍କୁ ୫ ଲକ୍ଷ ଟଙ୍କା ଲେଖାଏଁ ପୁରସ୍କାର ଘୋଷଣା କରିଥିଲେ ଓଡ଼ିଶା ସରକାର । ଏହି ଦଳର ସଦସ୍ୟ ତଥା ସ୍ବର୍ଣ୍ଣ ପଦକ ଲଢ଼େଇରେ ଚମତ୍କାର ପ୍ରଦର୍ଶନ କରି ଏକ ବହୁମୂଲ୍ୟ ଗୋଲ୍ ସ୍କୋର କରିଥିବା ଓଡ଼ିଆ ଖେଳାଳି ଅମିତ ରୋହିଦାସଙ୍କୁ ବ୍ୟକ୍ତିଗତ ଭାବେ ୧.୫ କୋଟି ଟଙ୍କା ପୁରସ୍କାର ଘୋଷଣା କରିଥିଲେ ମୁଖ୍ୟମନ୍ତ୍ରୀ । ସେହିଭଳି ଜାଭେଲିନ ଥ୍ରୋ ଇଭେଣ୍ଟରେ ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିବା ଓଡ଼ିଆ ଜାଭେଲିନ ଷ୍ଟାର ତଥା ରୌପ୍ୟ ପଦକ ବିଜେତା କିଶୋର ଜେନାଙ୍କୁ ମଧ୍ୟ ୧.୫ କୋଟି ଟଙ୍କା ପୁରସ୍କାର ଘୋଷଣା କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଇଟିଭି ଭାରତ, ଭୁବନେଶ୍ବର
