ମେଲବୋର୍ଣ୍ଣ: ବିଜୟରୁ ଅଷ୍ଟ୍ରେଲିଆ ଓପନ ଅଭିଯାନ ଆରମ୍ଭ କଲେ ସ୍ପାନିସ ଟେନିସ ସୁପରଷ୍ଟାର ରାଫେଲ । ନିଜର ୨୧ତମ ଗ୍ରାଣ୍ଡସ୍ଲାମ ଓ ୧୩ ବର୍ଷରେ ଦ୍ବିତୀୟ ଅଷ୍ଟ୍ରେଲିଆନ ଓପନ ଟାଇଟେଲ ଲକ୍ଷ୍ୟରେ ଥିବା ନାଦାଲ ଦ୍ବିତୀୟ ରାଉଣ୍ଡରେ ପ୍ରବେଶ କରିଛନ୍ତି । ବିଶ୍ବ ମାନ୍ୟତାର ୬୬ ନମ୍ବର ସ୍ଥାନରେ ଥିବା ଆମେରିକାର ମାର୍କୋସ ଗିରନଙ୍କୁ ୬-୧, ୬-୪, ୬-୨ ସେଟ୍ରେ ହରାଇ ସୋମବାର ଦ୍ବିତୀୟ ରାଉଣ୍ଡରେ ପ୍ରବେଶ କରିଛନ୍ତି ।
୨୦୦୮ ଅଷ୍ଟ୍ରେଲିଆନ ଓପନ ଚମ୍ପିଆନ ନାଦାଲ ପ୍ରଥମ ରାଉଣ୍ଡରେ ସହଜସାଧ୍ୟ ବିଜୟ ହାସଲ କରିଛନ୍ତି । ଏହି ଦମଦାର ବିଜୟ ସହ ୩୫ ବର୍ଷୀୟ ନାଦାଲ ବାମଗୋଡରେ ଥିବା ଆହତ ସମସ୍ୟାରୁ ସଂପୂର୍ଣ୍ଣ ସୁସ୍ଥ ହୋଇଥିବା ପ୍ରମାଣ ଦେଇଛନ୍ତି ।
ଗତ ବର୍ଷ ଆହତ କାରଣରୁ ଟୋକିଓ ଅଲମ୍ପିକ୍ସ, ୟୁଏସ ଓପନ ଓ ୱିମ୍ବଲଡନରେ ଅଂଶଗ୍ରହଣ କରିବାକୁ ବଞ୍ଚିତ ହୋଇଥିଲେ । ୨୦ ଥର ଗ୍ରାଣ୍ଡସ୍ଲାମ ଚମ୍ପିଆନ ନାଦାଲଙ୍କ ପରବର୍ତ୍ତୀ ଦୁଇଟି ଚ୍ୟାଲେଞ୍ଜ୍ ଅଷ୍ଟ୍ରେଲିଆର ଆଡିଲେଡ୍ ଇଣ୍ଟରନ୍ୟାସନାଲ ୨ ଚମ୍ପିଆନ ଥନସି କୋକିନାକସ ଓ ଜର୍ମାନୀର ୟାନିକ ହନଫନ ରହିଛନ୍ତି ।
