ନୂଆଦିଲ୍ଲୀ: ଟୋକିଓ ଅଲମ୍ପିକ୍ସ ପାଇଁ ଆଉ 90ଦିନରୁ ବି କମ ସମୟ ବାକି ରହିଛି । ଆସନ୍ତା ଜୁଲାଇ ମାସ 23 ତାରିଖରୁ ଅଲମ୍ପିକ୍ସ ଆରମ୍ଭ ହେବ । ତେବେ ଏହି ପ୍ରତିଯୋଗିତାରେ ପ୍ରତିଦିନ ପ୍ରତ୍ୟେକ ଆଥଲେଟଙ୍କ ହେବ କୋରୋନା ଯାଞ୍ଚ । ଏହାକୁ ନେଇ ଟୋକିଓ ଅଲମ୍ପିକ୍ସ ଆୟୋଜକ କମିଟି ପକ୍ଷରୁ ସୂଚନା ଦିଆଯାଇଛି । ଜାପାନରେ କୋରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି । ଏହାକୁ ଦୃଷ୍ଟିରେ ରଖି ଜାପାନ ସରକାର ଓ ଅଲମ୍ପିକ୍ସ ଆୟୋଜକ ସମିତି ମଧ୍ୟରେ ଏକ ଆଲୋଚନା ହୋଇଥିଲା ।
ଆଲୋଚନା ପରେ ଅନ୍ତର୍ଜାତୀୟ ଅଲମ୍ପିକ୍ସ କମିଟିର ଜଣେ ଅଧିକାରୀ କହିଛନ୍ତି ଯେ, "କୋରୋନା ଭାଇରସ ସଂକ୍ରମଣ ବର୍ତ୍ତମାନ ସୁଦ୍ଧା କମ୍ ହୋଇନାହିଁ । ଜାପାନରେ ମଧ୍ୟ କୋରୋନା ସଂକ୍ରମଣ ଜାରି ରହିଛି । ଏଭଳି ସ୍ଥିତିରେ ଆଥଲେଟଙ୍କ ସୁରକ୍ଷାକୁ ଦୃଷ୍ଟିରେ ରଖି ପ୍ରତିଦିନ ସେମାନଙ୍କ କୋରୋନା ଯାଞ୍ଚ କରାଯିବାକୁ ନିଷ୍ପତ୍ତି ହୋଇଛି ।"
