ଭୁବନେଶ୍ବର: ଆଉ ଗୋଟିଏ ଦିନ ପରେ କଳିଙ୍ଗ ଷ୍ଟାଡିୟମରେ ଆରମ୍ଭ ହେବାକୁ ଯାଉଛି ହକି ସିରିଜ ଫାଇନାଲ । ସପଟେ 'ଫନି' ପରେ ଓଡ଼ିଶାରେ ଅନୁଷ୍ଠିତ ହେଉଥିବା ଏହି ପ୍ରତିଯୋଗିତାକୁ ଲୋକମାନେ ବହୁ ସଂଖ୍ୟାରେ ଆସି ଉପଭୋଗ କରିବା ସହିତ ଭାରତୀୟ ଟିମକୁ ଉତ୍ସାହିତ କରିବାକୁ ଅପିଲ କରିଛନ୍ତି ଭାରତୀୟ ଦଳର ଉପ ଅଧିନାୟକ ତଥା ଓଡ଼ିଆ ଖେଳାଳି ବିରେନ୍ଦ୍ର ଲାକ୍ରା । ଅନ୍ୟ ପଟେ କଡା ସୁରକ୍ଷା ବଳୟରେ ରହିଛି ସମ୍ପୂର୍ଣ୍ଣ ଷ୍ଟାଡିୟମ ।
ଆସନ୍ତା 6 ତାରିଖରୁ ଭାରତ ସମେତ 8ଟି ଟିମ୍ ଆମେରିକା, ଋଷ, ଦକ୍ଷିଣ ଆଫ୍ରିକା, ପୋଲାଣ୍ଡ, ଉଜବେକିସ୍ତାନ ଏବଂ ଜାପାନ ମଧ୍ୟରେ ପୁରୁଷ ହକି ସିରିଜ ଫାଇନାଲ ଅନୁଷ୍ଠିତ ହେବାକୁ ଯାଉଛି । ଯାହାକି ଆସନ୍ତା ବର୍ଷ ଟୋକିଓ ଅଲମ୍ପିକ ପାଇଁ ଯୋଗ୍ୟତା ଅର୍ଜନ କରିବାର ଏକ ସୁଯୋଗ । ଯେଉଁ ଦୁଇଟି ଟିମ ଫାଇନାଲକୁ ଉନ୍ନୀତ ହେବେ ସେମାନେ ଏହି ଯୋଗ୍ୟତା ଅର୍ଜନ କରିବେ ।
ପୁଣି ଥରେ ବିଶ୍ବର ନାମିଦାମି ହକି ଟିମ୍ ଓଡିଶାରେ । ଏଥିପାଇଁ କଳିଙ୍ଗ ଷ୍ଟାଡିୟମର ସୁରକ୍ଷା କଡାକଡି କରିଛି କମିସନରେଟ ପୋଲିସ । ତ୍ରୀସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବା ସହ ସିସିଟିଭ ଉପରେ ଅଧିକ ଫୋକସ ଦିଆଯାଇଛି । 60ଟି ସିସିଟିଭି ଲଗାଯାଇଥିବା ବେଳେ ପୁରା ହକି ଗ୍ରାଉଣ୍ଡ ସିସିଟିଭ ସର୍ଭିଲାନସରେ ରହିବ । ଷ୍ଟାଡିୟମ ବାହାରେ ଓ ଭିତରେ ନିୟୋଜିତ ରହିବେ 16 ପ୍ଲାଟୁନ ଫୋର୍ସ । 75 ଜଣ ଅଫିସର ନେତୃତ୍ବରେ ସୁରକ୍ଷା ବ୍ୟବସ୍ଥା ଉପରେ ଫୋକସ ରହିବ ।
ପ୍ରଥମରେ ଖେଳାଳିଙ୍କ ସୁରକ୍ଷା ନେଇ ପିଏସଓ ସହ ଏସକର୍ଟ ଗାଡି ଓ ହୋଟେଲ ନିକଟରେ ଫୋର୍ସ ମୁତୟନ କରାଯିବ । ଏତଦବ୍ୟତୀତ ଖେଳାଳି ଅଭ୍ୟାସ ପାଇଁ ଯିବା ଆସିବା ସମୟରେ ସୁରକ୍ଷା ବ୍ୟବସ୍ଥା ଉପରେ ବିଶେଷ ଧ୍ୟାନ ଦିଆଯାଇଛି । ସମସ୍ତ ସୁରକ୍ଷା ବ୍ୟବସ୍ତା ଉପରେ ଟିକ୍ନିକ୍ ନଜର ରଖିବା ପାଇଁ ପୋଲିସ କଣ୍ଟ୍ରୋଲ ରୁମ ଖୋଲାଯାଇଛି । ମ୍ୟାଚ ପୂର୍ବରୁ ପାର୍କି ଓ ଟ୍ରାଫିକ ନିୟନ୍ତ୍ରଣ ପାଇଁ ସ୍ବତନ୍ତ୍ର ଧ୍ୟାନ ଦିଆଯାଇଛି ବୋଲି ସୂଚନା ଦେଇଛନ୍ତି ପୋଲିସ କମିସନର ସତ୍ୟଜିତ୍ ମହାନ୍ତି ।
ଏଠାରେ ସୂଚନା ଯୋଗ୍ୟ ଯେ ଆୟୋଜନ ହେବାକୁଥିବା ଏଫ୍ଆଇଏଚ୍ ପୁରୁଷ ସିରିଜ ଫାଇନାଲ୍ସର ଟିକେଟ ବିକ୍ରିରୁ ଉପାର୍ଜିତ ହେବାକୁଥିବା ଅର୍ଥ ଓଡ଼ିଶା ସରକାରଙ୍କୁ ପ୍ରଦାନ କରାଯିବ ବୋଲି ହକି ଇଣ୍ଡିଆ ତରଫରୁ କୁହାଯାଇଛି । ମହାବାତ୍ୟା ଫନି ଦ୍ୱାରା ରାଜ୍ୟରେ ବିପୁଳ କ୍ଷୟକ୍ଷତି ହୋଇଛି । ପୁନରୁଦ୍ଧାର କାର୍ଯ୍ୟ ଓ ବାତ୍ୟା ପ୍ରଭାବିତ ଲୋକଙ୍କ ସାହାଯ୍ୟ ପାଇଁ ଏହି ଅର୍ଥ ବ୍ୟୟ କରାଯିବ ।
ଭୁବନେଶ୍ବରରୁ ତାପସ କୁମାର ପରିଡା ଓ ଲଷ୍ମୀକାନ୍ତ ଦାସ, ଇଟିଭି ଭାରତ
