ନୂଆଦିଲ୍ଲୀ: ଚଳିତ ହିରୋ ସିନିୟର ମହିଳା ନ୍ୟାସନାଲ ଫୁଟବଲ( Senior Women's NFC) ଚାମ୍ପିଅନସିପ୍ ୨୦୨୧/୨୨ ସେମିଫାଇନାଲରେ ଓଡିଶାକୁ ଭେଟିବ ମଣିପୁର । ବୁଧବାର କେରଳରେ ଏହି ମହାମୁକାବିଲା ଖେଳାଯିବ ।
୨୦ଥର ନ୍ୟାସନାଲ ଚାମ୍ପିଅନ ମଣିପୁର ପ୍ରଥମ କ୍ବାର୍ଟର-ଫାଇନାଲରେ ଆସାମକୁ ୨-୦ରେ ହରାଇ ସେମିରେ ପ୍ରବେଶ କରିଛି । କିରଣବାଳା ଚାନୁ (୯') ଓ ବେବିସାନା ଦେବୀ(୬୫') ଗୋଲ୍ ସ୍କୋରର ରହିବା ସହ ଟିମକୁ ଟୁର୍ନାମେଣ୍ଟର ସେମିଫାଇନାଲରେ ପହଞ୍ଚାଇଛନ୍ତି ।
ଅନ୍ୟପଟେ ଓଡିଶା, ତାମିଲନାଡୁର ବିଜୟ ରୋକିବା ସହ ପୂର୍ବରୁ ସେମିଫାଇନାଲ ଟିକେଟ ହାତେଇସାରିଛି । ଓଡିଶା ପକ୍ଷରୁ କରିସ୍ମା ଓରାମ(୨୭') ଓ ସତ୍ୟବତୀ ଖଡିଆ(୩୭')ତମ ମିନିଟରେ ଦୁଇଟି ଦମଦାର ଗୋଲ୍ କରିବା ସହ ଟିମକୁ ବିଜୟୀ କରାଇଥିଲେ ।
ସେମିଫାଇନାଲରେ ପହଞ୍ଚିବା ପୂର୍ବରୁ ହରିୟାଣା, ଗୁଜୁରାଟ ଓ ଆନ୍ଧ୍ରପ୍ରଦେଶକୁ ସାମ୍ନା କରିଥିଲା ଟିମ ଓଡିଶା । ଗ୍ରୁପ Fରେ ଥିବା ଓଡିଶା ୧୮ଟି ଗୋଲ୍ କରିବା ସହ ମାତ୍ର ଗୋଟିଏ ଗୋଲ୍ ନେଇଥିଲା । ହିରୋ ସିନିୟର ମହିଳା NFCର ଦ୍ବିତୀୟ ସେମିଫାଇନାଲ ମୁକାବିଲା ଡିସେମ୍ବର ୭ରେ EMS ଷ୍ଟାଡିୟମ କାଜିକୋଟ୍ରେ ଖେଳାଯିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
