ମାଦ୍ରିଦ: ଚଳିତ ସ୍ପାନିସ ଫୁଟବଲ ଲିଗ ଲା ଲିଗାରେ ଭଲାଡଲିଡକୁ 1-0 ଗୋଲରେ ହରାଇଛି ଆଟଲେଟିକୋ ମାଦ୍ରିଦ ।
କୋରୋନା ଭାଇରସ ପରବର୍ତ୍ତୀ ମ୍ୟାଚ ଭାବେ ରବିବାର ୱାଣ୍ଡା ମେଟ୍ରୋପୋଲିଟନୋ ଷ୍ଟାଡିୟମରେ ପ୍ରଥମ ମ୍ୟାଚ ଖେଳାଯାଇଥିଲା । ତେବେ ମ୍ୟାଚ ପୂର୍ବରୁ କୋରୋନା ଭାଇରସରେ ପ୍ରାଣ ହରାଇଥିବା କିମ୍ବଦନ୍ତୀ ଖେଳାଳି, କ୍ଳବର ସଦସ୍ୟ ଓ ପ୍ରଶଂସକଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା ।
ମ୍ୟାଚ ଆରମ୍ଭ ହେବାପରେ ଉଭୟ କ୍ଳବ ଆକ୍ରମଣାତ୍ମକ ରଣନୀତି ସହ ଖେଳିଥିଲେ । କଡା ଟକ୍କର ମଧ୍ୟରେ ମ୍ୟାଚର ପ୍ରଥମ ଅର୍ଦ୍ଧ ଗୋଲ ଶୂନ୍ୟ ରହିଥିଲା । ଦ୍ବିତୀୟଅର୍ଦ୍ଧ ମଧ୍ୟ ସମାନ ଢଙ୍ଗରେ ମୁକାବିଲା ଜାରି ରହିଥିଲା । ତେବେ ମ୍ୟାଚର 81ତମ ମିନିଟରେ ଆଟଲେଟିକୋ ମାଦ୍ରିଦ ପକ୍ଷରୁ ଭିଟଲୋ ଗୋଲ କରିବା ସହ ଟିମକୁ 1-0ରେ ଆଗୁଆ କରିଥିଲେ । ଏହାପରେ ଶେଷ ପର୍ଯ୍ୟନ୍ତ ସମସ୍ତ ପ୍ରୟାସ କରି ମଧ୍ୟ ଭଲାଡଲିଡ ଗୋଲ କରିପାରିନଥିଲା । ଫଳରେ 1-0ରେ ବିଜୟୀ ହୋଇଥିଲା ଆଟଲେଟିକୋ ମାଦ୍ରିଦ ।
ଏଥିସହିତ ଲା ଲିଗା ପଏଣ୍ଟ ତାଲିକାର 3ୟ ସ୍ଥାନରେ ପହଞ୍ଚିଛି ଆଟଲେଟିକୋ । ଅନ୍ୟପଟେ ଭଲାଡଲିଡ ପଏଣ୍ଟ ତାଲିକାର 15ତମ ସ୍ଥାନରେ ରହିଛି ।
