ପୋଖରା: ଚଳିତ ସାଉଥ ଏସିଆନ ଗେମ୍ସରେ ସ୍ବର୍ଣ୍ଣରେ ଚମକିଲା ଭାରତୀୟ ମହିଳା ଫୁଟବଲ ଟିମ । ଆୟୋଜକ ନେପାଳକୁ 2-0 ଗୋଲରେ ହରାଇ ସ୍ବର୍ଣ୍ଣ ପଦକ ହାତେଇଛି ମହିଳା ଫୁଟବଲ ଟିମ ଇଣ୍ଡିଆ । 2ଟି ଗୋଲ କରି ଏହି ବିଜୟର ଷ୍ଟାର ରହିଛନ୍ତି ବାଲାଦେବୀ । 29 ବର୍ଷୀୟ ବାଲାଦେବୀ ଫାଇନାଲ ମୁକାବିଲାରେ ଦମଦାର ପ୍ରଦର୍ଶନ କରିଥିଲେ । ଏଥିସହିତ ଭାରତୀୟ ଦଳର ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ ।
ଷ୍ଟ୍ରାଇକର ବାଲାଦେବୀ ମୋଟ 5ଟି ଗୋଲ ସହ ଟୁର୍ଣ୍ଣାମେଣ୍ଟର ଟପ ସ୍କୋରର ରହିଛନ୍ତି । ମ୍ୟାଚ ଆରମ୍ଭରୁ ଭାରତ ଆକ୍ରମଣ ରଣନୀତି ଆପଣେଇଥିଲା । ସଙ୍ଗୀତା ବାସଫୋର ଓ ରତନବାଳା ଦେବୀ ଜବରଦସ୍ତ ପ୍ରଦର୍ଶନ କରିଥିଲେ ।
ମ୍ୟାଚର 18 ତମ ମିନିଟରେ ଭାରତ ପ୍ରଥମ ଗୋଲ ଦେଇ ଆଗୁଆ ହେବା ପରେ, ଅଧିକ ଜୋସର ସହିତ ଖେଳିଥିଲା । ତେବେ ମ୍ୟାଚର 56ତମ ମିନିଟରେ ବାଲାଦେବୀ ନିଜର 2ୟ ଗୋଲ ସ୍କୋର କରି ଭାରତକୁ ବିଜୟ ଭେଟି ଦେଇଥିଲେ । ଭାରତୀୟ ଗୋଲ କିପର ଅଦିତି ଚୌହାନ, କ୍ୟାପଟେନ ଆଶାଲତା ଦେବୀଙ୍କ ପ୍ରଦର୍ଶନ ମଧ୍ୟ ଚମତ୍କାର ରହିଥିଲା । 5ଟି ମ୍ୟାଚରେ ପ୍ରତିପକ୍ଷ ଟିମକୁ ଗୋଟିଏ ବି ହେଲେ ଗୋଲରେ ପରିଣତ କରିବାକୁ ଦେଇନାହାଁନ୍ତି ଅଦିତି ।
