ନୂଆଦିଲ୍ଲୀ: ଅଲ ଇଣ୍ଡିଆ ଫୁଟବଲ ଫେଡେରେଶନ ଜାତୀୟ ଦଳର ସେଣ୍ଟ୍ରାଲ ଡିଫେଣ୍ଡର ସନ୍ଦେଶ ଝିଙ୍ଗାନ ଏବଂ ମହିଳା ଦଳର ଷ୍ଟ୍ରାଇକର ଏନ ବାଲା ଦେବୀଙ୍କୁ ଅର୍ଜୁନ ପୁରସ୍କାର ପାଇଁ ମନୋନୀତ କରିଛି । ନିକଟ ଅତୀତରେ ଉତ୍ତମ ପ୍ରଦର୍ଶନ ପାଇଁ ତାଙ୍କୁ ମନୋନୀତ କରିଛି ଏଆଇଏଫଏଫ ।
କ୍ରୀଡ଼ା କ୍ଷେତ୍ରରେ ଉନ୍ନତ ପ୍ରଦର୍ଶନ କରିଥିବା ଖେଳାଙ୍କୁ ପୁରସ୍କୃତ କରିବା ପାଇଁ ଅର୍ଜୁନ ପୁରସ୍କାର ଦିଆଯାଏ । ଏଥିପାଇଁ ନାମାଙ୍କନ ପଠାଇବା ପାଇଁ କ୍ରୀଡା ମନ୍ତ୍ରଣାଳୟର ନିର୍ଦ୍ଦେଶନାମା ଅନୁଯାୟୀ କାର୍ଯ୍ୟ କରି ଏଆଇଏଫଏଫକୁ ନାମଗୁଡିକ ଚୂଡ଼ାନ୍ତ କରିବାରେ ଅଧିକ ଅସୁବିଧା ହୋଇନଥିଲା ।
“ଆମେ କ୍ରମାଗତ ଭାବେ ଶ୍ରେଷ୍ଠ ପ୍ରଦର୍ଶନ ପାଇଁ ସନ୍ଦେଶ ଏବଂ ବାଲା ଦେବୀଙ୍କ ନାମ ଅର୍ଜୁନ ପୁରସ୍କାର ପାଇଁ ପଠାଇବାକୁ ନିଷ୍ପତ୍ତି ନେଇଛୁ । ଜଣେ ପୁରୁଷ ଏବଂ ଜଣେ ମହିଳାଙ୍କୁ ଆମେ ଏଥିପାଇଁ ମନୋନୀତ କରିଛୁ ବୋଲି AIFF ସାଧାରଣ ସମ୍ପାଦକ କୁଶଲ ଦାସ ପିଟିଆଇକୁ କହିଛନ୍ତି ।’’
ତାଙ୍କର ସଫଳତା ତଥା ନିକଟ ଅତୀତରେ ସ୍ଥିରତା ହେତୁ ସମ୍ମାନଜନକ ପୁରସ୍କାର ପାଇଁ ତାଙ୍କ ନାମ ବିବେଚନା କରାଯାଇଛି ବୋଲି ସେ କହିଛନ୍ତି ।
ସକ୍କିମ ୟୁନାଇଟେଡରେ ନିଜର ପ୍ରାରମ୍ଭିକ ବର୍ଷ ଗୁଡିକ ମହାନ ବାଇଚୁଙ୍ଗ ଭୁତିଆ ଓ ସେଟ-ପିସ ସ୍ପେସିଆଲିଷ୍ଟ ରେନେଡି ସିଂହଙ୍କ ସହ ଖେଳିଥିବା 26 ବର୍ଷୀୟ ଝିଙ୍ଗାନ ସମୟ ସହିତ ନିଜକୁ ଭାରତୀୟ ଦଳର ଅନ୍ୟତମ ପ୍ରମୁଖ ଖେଳାଳି ଭାବରେ ପରିଚିତ କରିଛନ୍ତି ।
2015 ରେ ଫିଫା ବିଶ୍ବକପ ଯୋଗ୍ୟତା ପର୍ଯ୍ୟାୟରେ ଭାରତରେ ଡେବ୍ୟୁ କରିବା ପରଠାରୁ ଜଣେ ଖେଳାଳି ଭାବରେ ତାଙ୍କର ଅଭିବୃଦ୍ଧି ଏବଂ ପରିପକ୍ବତା ପୂର୍ବତନ ଜାତୀୟ ଦଳର ପ୍ରଶିକ୍ଷକ ଷ୍ଟିଫେନ କନଷ୍ଟାଣ୍ଟିନଙ୍କୁ ଏତେ ପ୍ରଭାବିତ କରିଥିଲା ଯେ ଛେତ୍ରୀ ଆହତ ହୋଇଥିବାରୁ ସେ ଝିଙ୍ଗାନଙ୍କୁ ଅଧିନାୟକତ୍ବ ପ୍ରଦାନ କରିଥିଲେ ।
ସେ ଏପର୍ଯ୍ୟନ୍ତ ଅନେକ ଥର ଅଧିନାୟକ ଦାୟିତ୍ବ ତୁଲାଇଛନ୍ତି ।
ଭାରତୀୟ ଫୁଟବଲରେ ଧ୍ୟାନ ଆକର୍ଷଣ କରିଥିବା ଅନ୍ୟ ଏକ ନାମ ହେଉଛି ବାଲା ଦେବୀ ।
ଏହା ପୂର୍ବରୁ, 30 ବର୍ଷୀୟ ମଣିପୁରୀ ଇତିହାସ ସୃଷ୍ଟି କରିଥିଲେ ଯେତେବେଳେ ସେ ପ୍ରସିଦ୍ଧ ସ୍କଟିସ ମହିଳା ପ୍ରିମିୟର ଲିଗ ସାଇଡ୍ ରେଞ୍ଜର୍ସ ଏଫ୍ସି ସହିତ 18 ମାସର ଚୁକ୍ତିନାମା ସ୍ବାକ୍ଷର କରିଥିଲେ, ଏବଂ ବୃତ୍ତିଗତ ଭାବରେ ଦେଶ ବାହାରେ ଖେଳିଥିବା ପ୍ରଥମ ଭାରତୀୟ ମହିଳା ହୋଇଥିଲେ ।
କୋଭିଡ-19 ମହାମାରୀ ହେତୁ ଲିଗ ସ୍ଥଗିତ ହେବା ପୂର୍ବରୁ ସେ ୟୁରୋପୀୟ ଟପ ଫ୍ଲାଇଟରେ କିଛି ମାତ୍ରାରେ ଖେଳିଛନ୍ତି ।
ନୋବେଲ କୋଏନାଭାଇରସ ବିରୁଦ୍ଧରେ ସଚେତନତା ସୃଷ୍ଟି କରିବାକୁ ଲକ୍ଷ୍ୟ ରଖି ଏସୀୟ ଫୁଟବଲ କନଫେଡେରେସନର #BreakTheChain ଭିଡିଓ ଅଭିଯାନରେ ଯୋଗଦେବା ପାଇଁ ବାଲା ଦେବୀ ଅଗ୍ରଣୀ ଖେଳାଳିମାନଙ୍କ ମଧ୍ୟରେ ଥିଲେ ।
