ଅହମ୍ମଦାବାଦ: ବାମହାତି ସ୍ପିନର ଅକ୍ଷର ପଟେଲ ଦୀର୍ଘ ୩ ବର୍ଷ ହେବ ଭାରତୀୟ କ୍ରିକେଟ ଦଳ ପାଇଁ ଜଣେ ଗୁରୁତ୍ବପୂର୍ଣ୍ଣ ଖେଳାଳି ରହିଛନ୍ତି । ଏହି ୨୯ ବର୍ଷୀୟ କ୍ରିକେଟର ଜଣକ ଅନେକ ଥର ନିଜ ଦଳ ପାଇଁ ଫ୍ଲାଟ୍-ପିଚ୍ରେ ଅନେକ ଚମତ୍କାର ମଧ୍ୟ କରିଛନ୍ତି । ତେବେ ଏସିଆ କପ୍ରେ ବାଂଲାଦେଶ ବିପକ୍ଷ ମ୍ୟାଚ୍ରେ ସେ ଆହତ ହୋଇଥିଲେ । ଅକ୍ଷରଙ୍କ ବାମ ଜଙ୍ଘର ଉପରି ଭାଗରେ ଆଘାତ ଲାଗିଥିଲା । ହେଲେ ବିଶ୍ବକପ୍ ପୂର୍ବରୁ ସେ ଏଥିରୁ ସୁସ୍ଥ ହୋଇନପାରିବାରୁ ତାଙ୍କୁ ବିଶ୍ବକପ୍ ପାଇଁ ଭାରତୀୟ ଦଳରୁ ବାଦ୍ ଦିଆଯାଇଛି । ତାଙ୍କ ବଦଳରେ ଭେଟେରାନ ଅଫ୍-ସ୍ପିନର ରବିଚନ୍ଦ୍ରନ ଅଶ୍ବିନ ଦଳକୁ ଫେରିଛନ୍ତି ।
ଚଳିତ ବର୍ଷ ବିଶ୍ବକପ୍ରେ ମଧ୍ୟ ଅକ୍ଷର ପଟେଲ ଭାରତୀୟ ଦଳ ପାଇଁ ଜଣେ ଗୁରୁତ୍ବପୂର୍ଣ୍ଣ ଖେଳାଳି ଭାବେ ସାବ୍ୟସ୍ତ ହୋଇପାରିଥାନ୍ତେ । ବିଶେଷକରି ଭାରତରେ ଖେଳାଯାଇଥିବା ମ୍ୟାଚ୍ ଗୁଡ଼ିକରେ ଏହି ବାମହାତି ସ୍ପିନର ବେଶ ସଫଳତା ହାସଲ କରିଛନ୍ତି । ଆଇପିଏଲ୍ରେ ଖେଳିବାବେଳେ ବିଦେଶୀ ଖେଳାଳିଙ୍କ ଦୁର୍ବଳତା ନେଇ ଅକ୍ଷର ବେଶ ଭଲଭାବେ ଅବଗତ ରହିଥିଲେ । ଯାହା ଭାରତକୁ ଭଲ ଫାଇଦା ଦେବ ବୋଲି ଆଶା କରାଯାଉଥିଲା । ହେଲେ ଅକ୍ଷର ଆହତ ହେବା ସବୁ ଆଶାକୁ ଗଡ଼ବଡ଼ କରିଦେଇଛି । କାରଣ ଆହତଜନିତ ସମସ୍ୟା କାରଣରୁ ଏଥର ବିଶ୍ବକପ୍ ପାଇଁ ଭାରତ ପକ୍ଷରୁ ପ୍ରକାଶିତ ଦଳରୁ ତାଙ୍କ ନାଁ ହଟାଇଦିଆଯାଇଛି ।
ତେବେ ନିଜକୁ ଜଣେ ଦକ୍ଷ ଅଲରାଉଣ୍ଡର ଭାବେ ପ୍ରମାଣିତ କରିବା ପାଇଁ ବିଶ୍ବକପ୍ ୨୦୨୩ ଅକ୍ଷରଙ୍କ ପାଇଁ ଏକ ସୁବର୍ଣ୍ଣ ସୁଯୋଗ ହୋଇପାରିଥାନ୍ତା ବୋଲି ତାଙ୍କ ଭାଇ ସଂଶିପ ପଟେଲ କହିଛନ୍ତି । ସେ କହିଛନ୍ତି, "ଅକ୍ଷର ୨୦୧୫ ବିଶ୍ବକପ୍ ପାଇଁ ଚୟନ ହୋଇଥିଲେ । ହେଲେ କୌଣସି ମ୍ୟାଚ୍ ଖେଳିବାର ସୁଯୋଗ ପାଇନଥିଲେ । ହେଲେ ଆହତ କାରଣରୁ ସେ ୨୦୨୩ ବିଶ୍ବକପ୍ ମଧ୍ୟ ଖେଳି ପାରିବେନି ଜାଣିବା ପରେ ଆମେ ବହୁତ ଦୁଃଖିତ । ସେ ଏହି ହାଇପ୍ରୋଫାଇଲ କ୍ରିକେଟ ମ୍ୟାଚ୍ ଖେଳୁଥିବା ଦେଖିବା ପାଇଁ ଆମେ ବେଶ ଉତ୍ସାହିତ ଥିଲୁ । ବିଶେଷ କରି ଅହମ୍ମଦାବାଦରେ ତାଙ୍କ ଖେଳ ଦେଖିବା ପାଇଁ ଆମେ ଉତ୍କଣ୍ଠାର ସହ ଅପେକ୍ଷା କରିଥିଲୁ । ହେଲେ ସେ ଦଳରୁ ବାହାରିଯିବା ଜାଣି ଆମେ ବହୁତ ଦୁଃଖିତ । ସେ ଅତିଶୀଘ୍ର ସୁସ୍ଥ ହୋଇ ପଡ଼ିଆକୁ ଫେରିଆସନ୍ତୁ ବୋଲି ଆମେ ସମସ୍ତେ ଆଶା କରୁଛୁ ।"
ଭାରତ ବିଶ୍ବକପ୍ ସ୍କ୍ବାର୍ଡ: ରୋହିତ ଶର୍ମା (ଅଧିନାୟକ), ହାର୍ଦ୍ଦିକ ପାଣ୍ଡ୍ୟା (ଉପଅଧିନାୟକ), ଶୁଭମନ ଗିଲ, ବିରାଟ କୋହଲି, ଶ୍ରେୟସ ଆୟର , କେଏଲ୍ ରାହୁଲ, ରବିନ୍ଦ୍ର ଜାଡେଜା, ଶାର୍ଦ୍ଦୁଲ ଠାକୁର, ଯଶପ୍ରୀତ ବୁମରା, ମହମ୍ମଦ ସିରାଜ, କୁଲଦୀପ ଯାଦବ, ମହମ୍ମଦ ସାମି, ରବିଚନ୍ଦ୍ରନ ଅଶ୍ବିନ, ଈଶାନ କିଷନ, ସୂର୍ଯ୍ୟକୁମାର ଯାଦବ
ବ୍ୟୁରୋ ରିପୋର୍ଟ, ଇଟିଭି ଭାରତ
