କଲମ୍ବୋ: ଏଠାରେ ଖେଳାଯାଉଥିବା ଭାରତ ଓ ଶ୍ରୀଲଙ୍କା ମଧ୍ୟରେ ଦ୍ବିତୀୟ ଦିନିକିଆ ମ୍ୟାଚ୍ର ପ୍ରଥମ ଇଂନିସ ଖେଳ ଶେଷ ହୋଇଛି । ଟସ୍ ଜିତି ଶ୍ରୀଲଙ୍କା ପ୍ରଥମ ବ୍ୟାଟିଂ ନିଷ୍ପତ୍ତି ନେବାପରେ ନିର୍ଦ୍ଧାରିତ ୫୦ ଓଭରରେ ୯ ୱିକେଟ ହରାଇ ୨୭୫ ରନ୍ ସଂଗ୍ରହ କରିଛି । ଫଳରେ ଭାରତ ସାମ୍ନାରେ ୨୭୬ ରନ୍ର ବିଜୟ ଲକ୍ଷ୍ୟ ରହିଛି ।
ଆର ପ୍ରେମଦାସା ଷ୍ଟାଡିୟମ ଖେଳାଯାଉଥିବା ଏହି ମ୍ୟାଚ୍ରେ ଘରୋଇ ଦଳ ପକ୍ଷରୁ ଚାରିଥ ଅସଲାଙ୍କା ସର୍ବାଧିକ ୬୫ ରନ୍ର ଇଂନିସ ଖେଳିଛନ୍ତି । ଅନ୍ୟମାନଙ୍କ ମଧ୍ୟରେ ଓପନର ଅଭିସ୍କା ଫର୍ନାଣ୍ଡୋ ୫୦ ଓ ମିନୋଦ ଭାନୁକା ୩୬ ରନର୍ ଯୋଗଦାନ କରିଛନ୍ତି । ଉଭୟ ପ୍ରଥମ ୱିକେଟ ଯୋଡିରେ ୭୭ ରନ୍ ଯୋଡିଥିଲେ । ଫଳରେ ଶ୍ରୀଲଙ୍କା ଭଲ ଆରମ୍ଭ ମିଳିଥିଲା । ତେବେ ନିୟମିତ ବ୍ୟବଧାନରେ ଭାରତୀୟ ବୋଲରଙ୍କ ୱିକେଟ ଦଖଲ ବଳରେ କୌଣସି ବ୍ୟାଟ୍ସମ୍ୟାନ ବଡ ସ୍କୋର କରିବାରେ ସଫଳ ହୋଇନଥିଲେ ।
ତେବେ ଶେଷ ଭାଗରେ ଚାମିକା କରୁଣାରତ୍ନେ ୩୩ ବଲ୍ରୁ ୫ ଚୌକା ସହାୟତାରେ ଦ୍ରୁତ ୪୪ ରନର ଅପରାଜିତ ଇଂନିସ ଖେଳି ଲଢୁଆ ସ୍କୋରରେ ଦଳକୁ ପହଞ୍ଚାଇଥିଲେ ।
ଅନ୍ୟପଟେ ଭାରତ ପକ୍ଷରୁ ସଫଳ ବୋଲର ରହିଥିଲେ ଉପ-ଅଧିନାୟକ ଭୁବନେଶ୍ବର କୁମାର ଓ ସ୍ପିନର ୟୁଜଭେନ୍ଦ୍ର ଚହଲ । ୧୦ ଓଭରରେ ୫୪ ରନ୍ ବ୍ୟୟରେ ଭୁବି ୩ଟି ୱିକେଟ ହାସଲ କରିଥିବାବେଳେ, ଚହଲ ମଧ୍ୟ ୩ଟି ଶିକାର କରିଛନ୍ତି । ଦ୍ରୁତ ବୋଲର ଦୀପକ ଚହର ମଧ୍ୟ ଦୁଇଟି ୱିକେଟ ଅକ୍ତିଆର କରିବାରେ ସଫଳ ହୋଇଛନ୍ତି ।
୩ ମ୍ୟାଚ ବିଶିଷ୍ଟ ସିରିଜର ପ୍ରଥମ ମ୍ୟାଚ ଭାରତ ଜିତିସାରିଥିବାବେଳେ ସିରିଜରେ ୧-୦ରେ ଆଗୁଆ ରହିଛି । ଫଳରେ ଆଜିର ମ୍ୟାଚରେ ବିଜୟୀ ହେଲେ ସିରିଜ କବ୍ଜା କରିବ । ବିଜୟ ପାଇଁ ଭାରତ ସାମ୍ନାରେ ୨୭୬ ରନର ଲକ୍ଷ୍ୟ ରହିଛି । ପୂର୍ବ ମ୍ୟାଚର ପ୍ରଦର୍ଶନକୁ ଦେଖିଲେ ଭାରତୀୟ ଶକ୍ତିଶାଳୀ ବ୍ୟାଟିଂକ୍ରମ ସାମ୍ନାରେ ଏହି ଲକ୍ଷ୍ୟ କଷ୍ଟସାଧ୍ୟ ନୁହେଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
