ନୂଆଦିଲ୍ଲୀ: ଚଳିତ ବର୍ଷ ଅକ୍ଟୋବର- ନଭେମ୍ବରରେ ଭାରତ ଆୟୋଜନ କରିବ ଦିନିକିଆ କ୍ରିକେଟ୍ ବିଶ୍ବକପ ମହାକୁମ୍ଭ । ଏନେଇ ଖେଳସୂଚୀ ମଧ୍ୟ ଜାରି କରିସାରିଛି ଆଇସିସି । କ୍ରୀଡ଼ାସୂଚୀ ଅନୁସାରେ ଅକ୍ଟବୋର ୫ରୁ ଆରମ୍ଭ ହେବ ବିଶ୍ବକପ୍ ୨୦୨୩ । ତେବେ ପାକିସ୍ତାନ କ୍ରିକେଟ ଦଳ ଏପର୍ଯ୍ୟନ୍ତ ବିଶ୍ବକପ୍ ପାଇଁ ଭାରତ ଆସିବା ନେଇ ଦ୍ବନ୍ଦ୍ବ ଜାରି ରଖିଛି ପିସିବି (ପାକିସ୍ତାନ କ୍ରିକେଟ ବୋର୍ଡ) । ଏହାରି ମଧ୍ୟରେ ଦିନିକିଆ ବିଶ୍ବକପ୍ ୨୦୨୩ରେ ପାକିସ୍ତାନ ଖେଳିବାକୁ ଥିବା ଷ୍ଟାଡିୟମ୍ ଗୁଡ଼ିକର ସୁରକ୍ଷା ବ୍ୟବସ୍ଥା ଯାଞ୍ଚ କରିବା ପାଇଁ ପାକିସ୍ତାନର ଏକ ପ୍ରତିନିଧି ଦଳ ଭାରତକୁ ଆସିବ ବୋଲି ଜଣାପଡ଼ିଛି । ଷ୍ଟାଡିୟମ୍ଗୁଡ଼ିକର ସୁରକ୍ଷା ବ୍ୟବସ୍ଥା ତଦାରଖ କରିବା ପରେ ଏହାର ଦଳକୁ ଭାରତରେ ଖେଳିବା ପାଇଁ ଅନୁମତି ପାଇଁ ପିସିବିକୁ ସୁପାରିଶ କରିବେ ପାକିସ୍ତାନ ସରକାର ।
ବିଶେଷ କରି ଭାରତ ଓ ପାକିସ୍ତାନ ମଧ୍ୟରେ କୌଣସି ମ୍ୟାଚ୍ ପାଇଁ ଉଭୟ ଦଳ ନିଜ ଦେଶର ସରକାରଙ୍କ ଅନୁମତି ଲୋଡ଼ିଥାନ୍ତି । ପୂର୍ବରୁ ମଧ୍ୟ ଭାରତରେ ସୁରକ୍ଷା ବ୍ୟବସ୍ଥା ଯାଞ୍ଚ କରିବା ପରେ ପାକିସ୍ତାନ କ୍ରିକେଟ୍ ଦଳକୁ ଯିବା ପାଇଁ ଅନୁମତି ଦେଇଥାନ୍ତି ପାକିସ୍ତାନ ସରକାର । ଚଳିତ ବର୍ଷ ପାକିସ୍ତାନ ଚେନ୍ନାଇ, ବେଙ୍ଗାଲୁରୁ, ହାଇଦ୍ରାବାଦ, କୋଲକାତା ଓ ଅହମ୍ମଦାବାଦ ଭଳି ଷ୍ଟାଡିୟମରେ ଖେଳିବା ପାଇଁ ସ୍ଥିର ହୋଇଛି । ତେଣୁ ପାକିସ୍ତାନର ଏହି ପ୍ରତିନିଧି ଦଳ ସଂପୃକ୍ତ ସ୍ଥାନ ଗୁଡ଼ିକ ବୁଲି ସୁରକ୍ଷା ଅଧିକାରୀଙ୍କ ସହିତ ଆଲୋଚନା କରିବେ । ଏହା ସହିତ ଷ୍ଟାଡିୟମ୍, ଖେଳାଳୀ, ବୋର୍ଡ ଅଧିକାରୀ, ପ୍ରଶଂସକ, ଗଣମାଧ୍ୟମ ପ୍ରତିନିଧିମାନଙ୍କୁ କେଉଁ ପ୍ରକାରର ସୁରକ୍ଷା ବ୍ୟବସ୍ଥା ଯୋଗାଇ ଦିଆଯିବ, ତାହା ଉପରେ ଆଲୋଚନା କରିବେ । ସମସ୍ତ ବ୍ୟବସ୍ଥା ଯାଞ୍ଚ କରିବା ପରେ ଏହି ପ୍ରତିନିଧି ଦଳ ସୁରକ୍ଷା ରିପୋର୍ଟ ନେଇ ପିସିବିକୁ ଦେବେ । ଯଦି କୌଣସି ବ୍ୟବସ୍ଥାରେ କିଛି ଆପତ୍ତି ଥାଏ, ତାହେଲେ ଉକ୍ତ ରିପୋର୍ଟକୁ ଆଇସିସି ଓ ବିସିସିଆଇକୁ ପଠାଯିବ । ଏହାପରେ ପାକିସ୍ତାନ ବିଶ୍ବକପ ଖେଳିବା ନେଇ ସ୍ପଷ୍ଟ କରିବ ବୋଲି ଜଣାପଡ଼ିଛି ।
ଏହା ମଧ୍ୟ ପଢ଼ନ୍ତୁ...ICC World Cup Qualifier: ବିଶ୍ବକପ୍ ଇତିହାସରେ ପ୍ରଥମ; ୨ଥର ବିଶ୍ବ ବିଜୟୀ ୱେଷ୍ଟ୍ଇଣ୍ଡିଜ୍ ଏଥର ଖେଳିପାରିବନି ଓ୍ୱାର୍ଲ୍ଡକପ୍
ତେବେ ପାକିସ୍ତାନରେ ଏସିଆ କପ୍ ଖେଳିବାକୁ ଭାରତ ଅଗ୍ରାହ୍ୟ କରିଥିଲା । ଭାରତକୁ ଅନ୍ୟ ରାଷ୍ଟ୍ରଙ୍କ ସମର୍ଥନ ପରେ ହାଇବ୍ରିଡ୍ ମଡେଲ୍ରେ ପାକିସ୍ତାନ ଓ ଶ୍ରୀଲଙ୍କାରେ ଏସିଆ କପ୍ ହେବା ନେଇ ସ୍ଥିର ହୋଇଥିଲା । ଯାହାକୁ ପିସିବି ମୁଖ୍ୟ ନଜାମ ସେଠୀ ବିରୋଧ କରି ନିଜ ପଦରୁ ଇସ୍ତଫା ଦେଇଥିଲେ । ତେଣୁ ପାକିସ୍ତାନ କ୍ରିକେଟ୍ ବୋର୍ଡର ନୂଆ ଅଧ୍ୟକ୍ଷ ନିର୍ବାଚିତ ହେବା ପରେ ଉକ୍ତ ସୁରକ୍ଷା ପ୍ରତିନିଧି ଦଳ ଭାରତ କେବେ ଆସିବ, ସେନେଇ ସ୍ପଷ୍ଟ ହେବ । ପ୍ରକାଶ ଥାଉ କି, ୨୦୧୬ରେ ପାକିସ୍ତାନ ଟି୨୦ ବିଶ୍ବକପ୍ ଖେଳିବାକୁ ଭାରତ ଆସିବା ପୂର୍ବରୁ ପାକିସ୍ତାନ ସୁରକ୍ଷା ପ୍ରତିନିଧି ସୁରକ୍ଷା ବ୍ୟବସ୍ଥା ଯାଞ୍ଚ କରିଥିଲେ । ସେମାନଙ୍କ ସୁରକ୍ଷା ଯାଞ୍ଚ୍ ରିପୋର୍ଟ ଆଧାରରେ ଗୋଟିଏ ମ୍ୟାଚ୍ ଧର୍ମଶାଳାରୁ କୋଲକାତାକୁ ସ୍ଥାନାନ୍ତରିତ ହୋଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
