ହାଇଦ୍ରାବାଦ: ଆଇପିଏଲ ୨୦୨୩ରେ ଅଧିନାୟକ ଡେଭିଡ ୱାର୍ନରଙ୍କ ଦଳ ଦିଲ୍ଲୀ କ୍ୟାପିଟାଲ୍ସ ଲଗାତାର ପରାଜୟର ସମ୍ମୁଖିନ ହେଉଛି । ଏବେ ପର୍ଯ୍ୟନ୍ତ ଏକମାତ୍ର ଦଳ ଭାବେ ଦିଲ୍ଲୀ ଗୋଟିଏ ମଧ୍ୟ ମ୍ୟାଚ୍ ଜିତି ପାରିନାହିଁ । ତେବେ ଶନିବାର ଖେଳାଯାଇଥିବା ୨୦ତମ ମ୍ୟାଚ୍ରେ ଦିଲ୍ଲୀକୁ ୨୩ ରନରେ ମାତ୍ ଦେଇଛି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର । ଏହି ମ୍ୟାଚ ହାରିବା ସହ ଦିଲ୍ଲୀ ପଏଣ୍ଟ ଟେବୁଲରେ ସବୁଠାରୁ ଶେଷରେ ରହିଛି । ଏହି ମୁକାବିଲାରେ ଆରସିବିର ଷ୍ଟାର ବ୍ୟାଟର ବିରାଟ କୋହଲି ଦମଦାର ପ୍ରଦର୍ଶନ କରିଥିଲେ । ମ୍ୟାଚ୍ ସମୟରେ ବିରାଟ କୋହଲି ଓ ଗାଙ୍ଗୁଲିଙ୍କୁ ଦେଖିଲେ ସେମାନଙ୍କ ମଧ୍ୟରେ ସବୁକିଛି ଠିକ ଚାଲିନଥିବା ସ୍ପଷ୍ଟ ଜଣା ପଡ଼ୁଥିଲା ।
ଦିଲ୍ଲୀ କ୍ୟାପିଟାଲ୍ସ ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ମଧ୍ୟରେ ମ୍ୟାଚ ସରିବା ପରେ ସାମାଜିକ ଗଣମାଧ୍ୟମରେ ଦୁଇଟି ଭିଡିଓ ବେଶ ଭାଇରାଲ ହୋଇଥିଲା । ଗୋଟିଏ ଭିଡିଓରେ ବିରାଟ କୋହଲି ଫିଲ୍ଡିଂ କରୁଥିବା ସମୟରେ ଦିଲ୍ଲୀ କ୍ୟାପିଟାଲ୍ସ ଡଗ ଆଉଟ୍ରେ ବସିଥିବା ସୌରଭ ଗାଙ୍ଗୁଲିଙ୍କ ସହ ମୁହାଁମୁହିଁ ହେବାପରେ ମଧ୍ୟ ଉଭୟ ଉଭୟଙ୍କୁ ନଦେଖିବା ପରି ବ୍ୟବହାର କରୁଥିବା ସ୍ପଷ୍ଟ ଭାବେ ଦେଖି ହେଉଛି । ଅନ୍ୟ ଏକ ଭିଡିଓରେ ଆରସିବି ମ୍ୟାଚ୍ ଜିତିବା ପରେ ଉଭୟ ଟିମ୍ର ସମସ୍ତ ଖେଳାଳି ଓ ଅନ୍ୟ ସଦସ୍ୟ ହାତ ମିଳାଇବା ବେଳେ ମଧ୍ୟ ଉଭୟ ଉଭୟଙ୍କୁ ଅଣଦେଖା କରି ଚାଲିଯାଇଥିଲେ । ଯାହାକୁ ନେଇ ଉଭୟଙ୍କ ମଧ୍ୟରେ ବିବାଦ ରହିଥିବା ଚର୍ଚ୍ଚା ପୁଣି ଥରେ ମୁଣ୍ଡ ଟେକିଛି ।
ଆରସିବି ଏହି ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସକୁ ୨୩ ରନ୍ରେ ମାତ ଦେଇଥିଲା । ଏହାପରେ ଉଭୟ ଦଳର ସମସ୍ତ ଖେଳାଳି ଓ ସଦସ୍ୟ ହାତ ମିଳାଇଥିଲେ । କୋହଲି ମଧ୍ୟ ଦିଲ୍ଲୀର ସମସ୍ତ ଖେଳାଳି ଓ କୋଚିଂ ଷ୍ଟାଫ ସହ ହାତ ମିଶାଇଥିଲେ । କିନ୍ତୁ ଯେତେବେଳେ ଗାଙ୍ଗୁଲିଙ୍କ ପାଳି ଆସିଲା, ଉଭୟ ଉଭୟଙ୍କୁ ଅଣଦେଖା କରି ଚାଲିଯାଇଥିଲେ । ତେବେ ଏହି ମ୍ୟାଚ୍ରେ କ୍ରମାଗତ ଭାବେ ପଞ୍ଚମ ପରାଜୟ ବରଣ କରିଥିଲା ଦିଲ୍ଲୀ କ୍ୟାପିଟାଲ୍ସ । ବିରାଟ କୋହଲି ଚଳିତ ସଂସ୍କରଣରେ ନିଜର ଦମଦାର ଫର୍ମରେ ବ୍ୟାଟିଂ ଜାରି ରଖିଛନ୍ତି । ଗତକାଲି ମ୍ୟାଚ୍ରେ ମଧ୍ୟ ସେ ଚଳିତ ସଂସ୍କରଣର ତୃତୀୟ ଅର୍ଦ୍ଧଶତକ ହାସଲ କରିଥିଲେ । ତେବେ ଏହି ଅର୍ଦ୍ଧଶତକ ହାସଲ ପରେ ସେ ଏପରି ସେଲିବ୍ରେସନ କରିଥିଲେ, ଯାହା ପୂର୍ବ ମ୍ୟାଚ୍ ଗୁଡ଼ିକରେ ଦେଖାଯାଇନଥିଲା । ଯାହାକୁ ନେଇ ସୌରଭ ଗାଙ୍ଗୁଲିଙ୍କ ପାଇଁ କିଙ୍ଗ କୋହଲିଙ୍କର ଏହି ସେଲିବ୍ରେସନ ଥିଲା ବୋଲି ଚର୍ଚ୍ଚା ହେଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
