ଚେନ୍ନାଇ: ଲଗାତାର ତିନୋଟି ପରାଜୟ ପରେ ଶେଷ ବିଜୟ ହାସଲ କରିଛି ସନରାଇଜର୍ସ ହାଇଦ୍ରାବାଦ ଦଳ । ଆଇପିଏଲର 14ତମତ ମ୍ୟାଚରେ ପଞ୍ଜାବକୁ 9 ୱିକେଟରେ ମାତ ଦେଇଛି ହାଇଦ୍ରାବାଦ । 121 ରନ ବିଜୟ ଲକ୍ଷ୍ୟର ପିଛା କରୁଥିବା ହାଇଦ୍ରାବାଦକୁ ଭଲ ଆରମ୍ଭ ମିଳିଥିଲା । ଓପନିଂ ଯୋଡ଼ି ଡେଭିଡ ୱାର୍ଣ୍ଣର ଓ ଜନି ବେୟାରଷ୍ଟୋ ପ୍ରଥମ ୱିକେଟ ପାଇଁ 73 ରନ ଭାଗିଦାରୀ କରିଥିଲେ ।
ଏହାପରେ 37 ରନ କରି ଫାବିଆନ ଏଲେନଙ୍କ ଶିକାର ହୋଇଥିଲେ ଡେଭିଡ ୱାର୍ଣ୍ଣର । ତେବେ ସେତେବେଳକୁ ହାଇଦ୍ରାବାଦ ଦଳ ନିୟନ୍ତ୍ରଣକୁ ମ୍ୟାଚ ଆସି ଯାଇଥିଲା । ଏହାପରେ ପଡ଼ିଆକୁ ଓହ୍ଲାଇଥିଲେ କେନ ୱିଲିୟମସନ। ଜନି ବେୟାରଷ୍ଟୋ ଦଳକୁ ବିଜୟ ଦ୍ବାରକୁ ନେଇ ଯାଇଥିଲେ । 18 ଓଭର 4ଟି ବଲରେ ଦଳ ବିଜୟ ହାସଲ କରିଛି । ଜନି ବେୟାରଷ୍ଟୋ 56 ବଲ ଖେଳି 63 ରନ କରିଥିବାବେଳେ କେନ ୱିଲିୟମସନ 19ଟି ବଲ ଖେଳି 16 ରନ କରିଥିଲେ । ପଞ୍ଜାବ ପକ୍ଷରୁ ଅନ୍ୟ କୌଣସି ବୋଲର ୱିକେଟ ନେବାରେ ସଫଳ ହୋଇ ପାରିନଥିଲେ ।
ପଞ୍ଜାବ କିଙ୍ଗ୍ସ ଟସ ଜିତି ପ୍ରଥମ ବ୍ୟାଟିଂ ନିଷ୍ପତ୍ତି ନେଇଥିଲା । ତେବେ ନିୟମିତ ଭାବରେ ୱିକେଟ ହରାଇବାରୁ ଦଳ ବଡ଼ ସ୍କୋର କରିବାରୁ ବଞ୍ଚିତ ହୋଇଛି। ମ୍ୟାଚ ଆରମ୍ଭରୁ ସନରାଇଜର୍ସ ହାଇଦ୍ରାବାଦର ବୋଲିଂ ଆକ୍ରମଣରେ ଘାଇଲା ହୋଇଥିଲା ପଞ୍ଜାବ । ଦଳୀୟ ସ୍କୋର ମାତ୍ର 15 ରନ ହୋଇଥିବା ଅଧିନାୟକ କେଏଲ ରାହୁଲଙ୍କୁ ୱିକେଟ ହରାଇ ଥିଲା ଦଳ । ଏହାପରେ ମୟଙ୍କ ଅଗ୍ରୱାଲ ଓ କ୍ରିଶ ଗେଲ କିଛି ସମୟ ଭାଗିଦାରୀ କରିଥିଲେ । ତେବେ ସେହି ସମୟରେ ରାଶିଦ ଖାନଙ୍କ ବଲରେ ଆଉଟ ହୋଇଥିଲେ ମୟଙ୍କ ଅଗ୍ରୱାଲ । ଦଳ ପକ୍ଷରୁ ମୟଙ୍କ ଅଗ୍ରୱାଲ ଓ ଶାହାରୁଖ ଖାନ ସର୍ବାଧିକ 22 ରନ ଲେଖାଏଁ କରିଥିଲେ। ଅନ୍ୟମାନଙ୍କ ମଧ୍ୟରେ କ୍ରିଶ ଗେଲ 15 ରନ, ମୋଇସେସ ହେନରିକ୍ସ 14 ରନ ଓ ଦୀପକ ହୁଡ୍ଡା 15 ରନ କରିଥିଲେ । ଆଉ କୌଣସି ବ୍ୟାଟସମ୍ୟାନ ଦୁଇ ଅଙ୍କ ଛୁଇଁ ପାରିନଥିଲେ ।
ସେପଟେ ସନ ରାଇଜର୍ସ ହାଇଦ୍ରାବାଦ ଦଳ ଦମଦାର ବୋଲିଂ କରିଛି । ଦଳ ପକ୍ଷରୁ ଖଲିଲ ଅହମ୍ମଦ ସର୍ବାଧିକ 3ଟି ୱିକେଟ ନେଇଥିଲେ । ସେହିଭଳି ଅଭିଶେକ ଶର୍ମା ଗୁରୁତ୍ବପୂର୍ଣ୍ଣ ଦୁଇଟି ୱିକେଟ ନେଇଥିଲେ। ଭୁବନେଶ୍ବର କୁମାର, ସିଦ୍ଧାର୍ଥ କାଉଲ ଓ ରାଶିଦ ଖାନ ଯଥାକ୍ରମେ ଗୋଟିଏ ଲେଖାଏଁ ୱିକେଟ ନେଇଥିଲେ । ବର୍ତ୍ତମାନ ପଏଣ୍ଟ ତାଲିକାର ସର୍ବନିମ୍ନରେ ରହିଛି ପଞ୍ଜାବ କିଙ୍ଗ୍ସ ଦଳ । ସେପଟେ ପ୍ରଥମ ମ୍ୟାଚ ଜିତିବା ପରେ ସନରାଇଜର୍ସ ହାଇଦ୍ରାବାଦ ଦଳ ପଞ୍ଚମ ସ୍ଥାନରେ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
