ଚେନ୍ନାଇ: ଆଇପିଏଲର ପଞ୍ଚମ ମ୍ୟାଚରେ କୋଲକାତାକୁ ମାତ ଦେଇଛି ମୁମ୍ବାଇ । ଏକ ରୋମାଞ୍ଚକର ମ୍ୟାଚରେ ମୁମ୍ବାଇର ଶାଣିତ ବୋଲିଂ ଆଗରେ ଫିକା ପଡିଯାଇଛି କୋଲକାତାର ମିଡିଲ ଅର୍ଡର ବ୍ୟାଟିଂ । ମୁମ୍ବାଇ ଇଣ୍ଡିଆନ୍ସର 152 ରନର ଲକ୍ଷ୍ୟକୁ ପିଛା କରି ନିର୍ଦ୍ଧାରିତ ଓଭର 142 ରନ କରି 10 ରନରେ ପରାଜିତ ହୋଇଛି କୋଲକାତା ନାଇଟ ରାଇଡର୍ସ।
ଚେନ୍ନାଇର ଏମଏ ଚିଦାମ୍ବରମ ଷ୍ଟାଡିୟମରେ କୋଲକାତା ନାଇଟ ରାଇଡର୍ସ ଟସ ଜିତି ମୁମ୍ବାଇ ଇଣ୍ଡିଆନ୍ସକୁ ବ୍ୟାଟିଂ ଆମନ୍ତ୍ରଣ କରିଥିଲା । ଦଳ ପକ୍ଷରୁ ସୂର୍ଯ୍ୟକୁମାର ଯାଦବ 56 ରନ କରି ଅର୍ଧଶତକ ହାସଲ କରିଥିବାବେଳେ ଅଧିନାୟକ ରୋହିତ ଶର୍ମା 43 ରନ କରିଥିଲେ । ଅନ୍ୟ କୌଣସି ବ୍ୟାଟସମ୍ୟାନ ବେଶି ତିଷ୍ଟି ପାରିନଥିଲେ । କେକେଆର ପକ୍ଷରୁ ଆନ୍ଦ୍ରେ ରୋସେଲ 2 ଓଭରରେ 15 ରନ ବ୍ୟୟ କରି 5 ୱିକେଟ ହାସଲ କରିଥିଲେ । ଶେଷରେ ମୁମ୍ବାଇ ନିର୍ଦ୍ଧାରିତ 20 ଓଭରରେ 152 ରନ କରିବାକୁ ସକ୍ଷମ ହୋଇଥିଲା ।
ମୁମ୍ବାଇ ଇଣ୍ଡିଆନ୍ସର 153 ରନକୁ ପିଛା କରି ବିଜୟ ଲକ୍ଷ୍ୟ ନେଇ ବ୍ୟାଟିଂ ଆରମ୍ଭ କରିଥିଲା କେକେଆର । ଗତ ମ୍ୟାଚରେ ଧୂଆଁଧାର ଇନିଂସ ଖେଳିଥିବା ଓପନର ନୀତିଶ ରାଣାଙ୍କ ସହ ଶୁଭମନ ଗିଲ ଦଳକୁ ଭଲ ଆରମ୍ଭ ଦେଇଥିଲେ । ନୀତିଶ ରାଣା 57 ରନର ପୁଣି ଏକ ଅର୍ଧଶତକୀୟ ଇନିଂସ ଖେଳିଥିଲେ । ଶୁଭମନ ଗିର 33 ରନ କରିଥିଲେ । ଦୁହେଁ ମୁମ୍ବାଇ ବୋଲରଙ୍କୁ ଜୋରଦାର ମୁକାବିଲା କରି ପ୍ରଥମ ୱିକେଟ ପାଇଁ 72 ଯୋଡିଥିଲେ । ଦୁହେଁ ଆରମ୍ଭରୁ ଭଲ ବ୍ୟାଟିଂ କରି ଏକ ନିଶ୍ଚିତ ବିଜୟ ସୁଯୋଗ ସୃଷ୍ଟି କରିଥିଲେ । ସେପଟେ କିନ୍ତୁ ମୁମ୍ବାଇ ଲେଗ ସ୍ପିନର ରାହୁଲ ଚହର ଚମତ୍କାର ବୋଲିଂ କରି ମାତ୍ର 27 ରନ ବିନିମୟରେ 4 ୱିକେଟ ନେଇ କୋଲକାତାର ବ୍ୟାଟିଂ ଲାଇନଅପକୁ ଭାଙ୍ଗି ଦେଇଥିଲେ । ଶେଷ ପାଞ୍ଚ ଓଭରରେ ଚମତ୍କାର ବୋଲିଂ କରି ମ୍ୟାଚରେ ଜୋରଦାର ପ୍ରତ୍ୟାବର୍ତ୍ତନ କରି ବିଜୟ ହାସଲ କରିଛି ମୁମ୍ବାଇ ଇଣ୍ଡିଆନ୍ସ। ରାହୁଲ ଚହରଙ୍କୁ ଏହି ମ୍ୟାଚରେ ମ୍ୟାନ ଅଫଦି ମ୍ୟାଚ ଘୋଷଣା କରାଯାଇଛି ।
ସଂକ୍ଷିପ୍ତ ସ୍କୋର: ମୁମ୍ବାଇ ଇଣ୍ଡିଆନ୍ସ 152 ( ସୂର୍ଯ୍ୟକୁମାର ଯାଦବ 56, ରୋହିତ ଶର୍ମା 43, ଆନ୍ଦ୍ରେ ରୋସେଲ 5/15 )
କେକେଆର 142/7 ( ନୀତିଶ ରାଣା57, ଶୁଭମନ ଗିଲ 33, ରାହୁଲ ଚହର 4/27 )
