ଆବୁଧାବି: ଶେଖ ଜାଏଦ ଷ୍ଟାଡିୟମରେ ଖେଳାଯାଇଥିବା ଆଇପିଏଲ 2020ର 39ତମ ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବାଙ୍ଗଲୋର ବିଜୟୀ ହୋଇଛି। କୋଲକାତା ନାଇଟ ରାଇଡର୍ସକୁ 8 ୱିକେଟରେ ହରାଇ ଏକ ବୃହତ ବିଜୟ ହାସଲ କରିଛି ବାଙ୍ଗ ଲୋର।
ଟସ୍ ଜିତି କେକେଆର୍ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ତେବେ ମ୍ୟାଚ ଆରମ୍ଭରୁ ହିଁ ଦଳ ବ୍ୟାଟିଂ ବିପର୍ଯ୍ୟୟର ଶିକାର ହୋଇଥିଲା। ପ୍ରଥମ 4 ଓଭରରେ କେକେଆର ନିଜର ଟପ ଅର୍ଡର ବ୍ୟାଟସମେନ 4 ଜଣଙ୍କ ୱିକେଟ ହରାଇଥିଲା। କେକେଆର ଟିମ ଅଧିନାୟକ ଇଅନ ମୋର୍ଗାନ କିଛି ସମୟ ପଡି଼ଆରେ ବିତାଇବାକୁ ସକ୍ଷମ ହୋଇଥିଲେ । ତେବେ ସେ କେବଳ 30 ରନ କରି ଆଉଟ ହୋଇଯାଇଥିଲେ । ଆଉ କେହି ଦଳ ସେଭଳି ଭଲ ପ୍ରଦର୍ଶନ କରି ପାରିନଥିଲେ। ଇଅନ ମୋର୍ଗାନଙ୍କ ପଛକୁ ଲକି ଫର୍ଗୁସନ 19 ଓ କୁଳଦୀବ ଯାଦବ 12 ରନ କରି ପାରିଥିଲେ।
ବାଙ୍ଗାଲୋରର ଷ୍ଟ୍ରାଇକ ବୋଲର ମହୋମ୍ମଦ ସିରାଜ ସର୍ବାଧିକ 3ଟି ୱିକେଟ ନେଇଥିଲେ। ତାଙ୍କ ପଛକୁ ବାଙ୍ଗାଲୋର ସ୍ପିନର ୟୁଜିବେନ୍ଦ୍ର ଚହଲ 2 ୱିକେଟ ନେଇଥିଲେ। ଏହାସହ ନବଦୀପ ସାଇନି ଓ ୱାଶିଂଟନ ସୁନ୍ଦର ଗୋଟିଏ ଲେଖାଏଁ ୱିକେଟ ନେଇ କେକେଆର ବ୍ୟାଟିଂ ଲାଇନକୁ ଧ୍ବସ୍ତ କରି ଦେଇଥିଲେ। ଫଳରେ ଦଳ ନିର୍ଦ୍ଧାରିତ 20 ଓଭରରେ କେବଳ 84 ରନ କରି ପାରିଥିଲା।
ଜବାବରେ ବାଙ୍ଗାଲୋର ଟିମର ଓପନର ବ୍ୟାଟସ ଭଲ ବ୍ୟାଟିଂ କରିଥିଲେ। ଦେବଦତ୍ତ ପାଲିକଲ ଦ୍ରୁତ 17 ବଲରୁ 25 କରି ରନ ଆଉଟ ହୋଇଥିଲେ। ଏହାପରେ ଗୁରକିରତ ସିଂହ 21, ଆରୋନ ଫିଞ୍ଚ 16 ଓ କୋହଲି 18 ରନ କରି ଟିମକୁ ବିଜୟ ରାସ୍ତାକୁ ନେଇ ଯାଇଥିଲେ। ଫଳରେ ବାଙ୍ଗାଲୋର କେବଳ 15 ଓଭରରେ ନିଜର ବିଜୟ ଲକ୍ଷ୍ୟ ହାସଲ କରିନେଇଥିଲା। ମହୋମ୍ମଦ ସିରାଜ ଏହି ମ୍ୟାଚରେ ମ୍ୟାନ ଅଫ ଦ ମ୍ୟାଚ ହୋଇଛନ୍ତି।
ଆଇପିଏଲ ପଏଣ୍ଟ ତାଲିକାରେ ଆରସିବି ବର୍ତ୍ତମାନ ଦ୍ୱିତୀୟ ସ୍ଥାନରେ ରହିଛି। ଆରସିବି ବିପକ୍ଷରେ ମ୍ୟାଚ ହାରିବା ପରେ କେକେଆର ଚତୁର୍ଥ ସ୍ଥାନକୁ ଖସି ଆସିଛି।
