ବେଙ୍ଗାଲୁରୁ: ଲଗାତାର 6ଟି ମ୍ୟାଚରେ ପରାଜୟ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି)କୁ ଚିନ୍ତାରେ ପକାଇଛି । ଯେତେ ଭଲ ପ୍ରଦର୍ଶନ କଲେ ମଧ୍ୟ ଦଳର ବିଜୟ ଖାତା ଖୋଲୁନାହିଁ । ଏପରିକି ଚଳିତ ସିଜିନରେ ପ୍ରଥମ ବିଜୟ ପାଇବାକୁ ବ୍ୟାକୁଳ ହୋଇଉଠିଛି ଦଳ। ତେବେ ଦଳର ଏପରି ପ୍ରଦର୍ଶନ ନେଇ ମୁହଁ ଖୋଲିଛନ୍ତି ଦକ୍ଷିଣ ଆଫ୍ରିକାର ପୂର୍ବତନ ଅଧିନାୟକ ତଥା ଆରସିବିର ଷ୍ଟାର ବ୍ୟାଟ୍ସମ୍ୟାନ ଏବି ଡି ଭିଲିୟର୍ସ ।
ଏବି ଦଳର ପରାଜୟ ପାଇଁ ଫିଲ୍ଡିଂକୁ ଦାୟୀ କରିଛନ୍ତି । ସେ କହିଛନ୍ତି ଯେ ବିଜୟ ଠାରୁ ଦଳକୁ ଖେଳାଳିଙ୍କ ଫିଲ୍ଡିଂ ଦୂରେଇ ରଖିଛି । ଦଳର ବିଜୟରେ ବ୍ୟାଟିଂ ଓ ବୋଲିଂର ଯେତେ ଗୁରୁତ୍ବ ରହିଥାଏ ଫିଲ୍ଡିଂର ମଧ୍ୟ ସେତେ ଗୁରୁତ୍ବ ଅଛି । ସମସ୍ତେ ଖେଳାଳି ଭଲ ବ୍ୟାଟିଂ କରିବା ତଥା ଉତ୍ତମ ବୋଲିଂ କରିବା ଲକ୍ଷ୍ୟରେ ରହୁଛନ୍ତି । କିନ୍ତୁ କେହି ଭଲ ଫିଲ୍ଡିଂ କରିବା ବିଷୟରେ ଭାବୁନାହାଁନ୍ତି । ଏହା ହିଁ ବିଜୟ ଟିମ୍ ଓ ଆରସିବି ଭିତରେ ଫରକ୍ । ସାମାନ୍ୟ ତ୍ରୁଟି ଯୋଗୁଁ ଦଳ ଅନେକ ମ୍ୟାଚ ହାରୁଛି ବୋଲି ସେ କହିଛନ୍ତି।
ଏଥିପାଇଁ ଏବି ଆମେରିକୀୟ କମେଡି ଫିଲ୍ମ ଗ୍ରାଉଣ୍ଡହଗ୍ ଡେ ର ଉଦାହରଣ ଦେଇଛନ୍ତି । ଏହି ଫିଲ୍ମରେ ଟିଭି ପାଣିପାଗ ବିଶାରଦ ଭୂମିକାରେ ଥିବା ଅଭିନେତା ବିଲ ମରେ ଗୋଟିଏ ଦିନରେ ବାରମ୍ବାର ବଞ୍ଚିବାକୁ ନିନ୍ଦା କରୁଛନ୍ତି । ଶେଷରେ ଏହା ଭୁଲ କହୁଥିବା କଥା ଜାଣିଥିଲେ ମଧ୍ୟ ବିପର୍ଯ୍ୟୟରୁ ବର୍ତ୍ତିପାରିନଥିଲେ । ଏବେ ଆରସିବିର ଅବସ୍ଥା ସେହିପରି ବୋଲି ସେ କହିଛନ୍ତି । ୬ଟି ମ୍ୟାଚରୁ ୬ଟି ପରାଜୟର କାରଣ ଖୋଜୁଛି ଆରସିବି । ବୈଠକ, ତାଲିମ, ପ୍ରତିଭା ଏବଂ ସନ୍ତୁଳନ ସବୁଥିରେ ଦଳ ଭଲ ରହିଛି । କିନ୍ତୁ ଭୁଲ କେଉଁଠି ହେଉଛି ଜଣାପଡୁନାହିଁ ବୋଲି ଏବି କହିଛନ୍ତି ।
ରବିବାର ଦିଲ୍ଲୀ ଠାରୁ ପରାଜୟ ପରେ ମୁଖ୍ୟ କୋଚ୍ ଗ୍ୟାରୀ କର୍ଷ୍ଟନଙ୍କ ସହ ସେ ଏହି ବିଷୟରେ ଆଲୋଚନା କରୁଥିଲେ । ହଜାର ହଜାର ନିରାଶ ପ୍ରଶଂସକଙ୍କୁ ଦେଖି ସେ ଦୁଃଖିତ ଅନୁଭବ କରୁଥିଲେ । ଦଳର ଦୁର୍ବଳ ଫିଲ୍ଡିଂକୁ ନେଇ ସେ ଚିନ୍ତିତ ଥିଲେ । ଗୋଟିଏ ମ୍ୟାଚରେ ଏକାଧିକ ସୁଯୋଗକୁ ହାତଛଡା କରିବା କେବେ ଗ୍ରହଣୀୟ ନୁହେଁ । ଏଥିପାଇଁ ଦଳକୁ ଦୃଢ ମନୋବଳ ସହକାରେ ପ୍ରତ୍ୟାବର୍ତ୍ତନ କରିବାକୁ ପଡିବ। ଏକାଠି ସକରାତ୍ମକ ହୋଇ ରହିବାକୁ ପଡିବ। ଗ୍ରାଉଣ୍ଡହଗ୍ ଡେ ରୁ ବର୍ତ୍ତିବା ପାଇଁ କେବଳ ଗୋଟିଏ ବିଜୟ ଆବଶ୍ୟକ ବୋଲି ସେ କହିଛନ୍ତି।
