ହାଇଦ୍ରାବାଦ: ଗୁରୁବାର ଭାରତ ଆସୁଛନ୍ତି ପାକିସ୍ତାନ କ୍ରିକେଟ ବୋର୍ଡ ମୁଖ୍ୟ ଜାକା ଆସ୍ରଫ । ଅକ୍ଟୋବର ୧୪ରେ ଭାରତ ଓ ପାକିସ୍ତାନ ମଧ୍ୟରେ ହେବାକୁ ଯାଉଥିବା ବହୁ ପ୍ରତିକ୍ଷୀତ ବିଶ୍ବକପ୍ ଫାଇଟ୍ ଦେଖିବାକୁ ଆସନ୍ତାକାଲି ଅହମ୍ମଦାବାଦ୍ରେ ପହଞ୍ଚିବେ ଜାକା ଅସ୍ରଫ । ଏହି ହାଇପ୍ରୋଫାଇଲ ମ୍ୟାଚ୍ ପାଇଁ ଭାରତ ଆସିବାକୁ ପାକିସ୍ତାନୀ ସାମ୍ବାଦିକଙ୍କୁ ଭିସା କ୍ରୟ ପାଇଁ ସେମାନଙ୍କ ପାସପୋର୍ଟ ଦାଖଲ କରିବାକୁ ଅନୁମତି ଦିଆଯିବା ପରେ ଯାଇ ଭାରତ ଆସିବା ନେଇ ସ୍ପଷ୍ଟ କରିଛନ୍ତି ପିସିବି ମୁଖ୍ୟ । ପ୍ରାୟ ୬୦ ଜଣ ପାକିସ୍ତାନୀ ସାମ୍ବାଦିକ ଭିସା ପାଇଁ ଆବେଦନ କରିଛନ୍ତି ।
ପାକିସ୍ତାନ କ୍ରିକେଟ୍ ବୋର୍ଡ ଦ୍ବାରା ଜାରି ହୋଇଥିବା ପ୍ରେସ୍ ବିଜ୍ଞପ୍ତିରେ ଅସ୍ରଫ କହିଛନ୍ତି, "ଭାରତ ଗସ୍ତରେ ମୁଁ ବିଳମ୍ବ କରିଥିଲି । ଭିସା ପାଇଁ ପାକିସ୍ତାନର ସାମ୍ବାଦିକମାନଙ୍କୁ ସେମାନଙ୍କ ପାସପୋର୍ଟ ଦାଖଲ କରିବାକୁ କୁହାଯାଇଛି ବୋଲି ନିଶ୍ଚିତ ହେବା ପରେ ମୁଁ ଆସନ୍ତାକାଲି (ଗୁରୁବାର) ଭାରତ ଗସ୍ତ କରୁଛି । ମୁଁ ଖୁସି ଯେ ଭିସା ବିଳମ୍ବକୁ ନେଇ ବିଦେଶ କାର୍ଯ୍ୟାଳୟ ସହିତ ମୋର ଆଲୋଚନା ସଫଳ ହୋଇଛି ।" ରିପୋର୍ଟ ଅନୁଯାୟୀ ପାକିସ୍ତାନର ୬୦ରୁ ଅଧିକ ସାମ୍ବାଦିକଙ୍କୁ ଭାରତ ପାଇଁ ଭିସା ମିଳିଛି । ଅହମ୍ମଦାବାଦରେ ଅନୁଷ୍ଠିତ ହେବାକୁ ଥିବା ହାଇପ୍ରୋଫାଇଲ ମ୍ୟାଚକୁ ପାକିସ୍ତାନ ସାମ୍ବାଦିକମାନେ କଭର୍ କରିବେ । ୧୪ ଅକ୍ଟୋବରରେ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଭାରତ ଓ ପାକିସ୍ତାନ ମଧ୍ୟରେ ଖେଳାଯିବ ।
ବିଶ୍ବକପ୍ ୨୦୨୩ରେ ପାକିସ୍ତାନ ଏପର୍ଯ୍ୟନ୍ତ ନିଜର ବିଜୟଧାରା ଜାରି ରଖିଛି । ନେଦରଲାଣ୍ଡ୍ସ ଓ ଶ୍ରୀଲଙ୍କା ବିପକ୍ଷରେ ଦଳର ପ୍ରଦର୍ଶନକୁ ନେଇ ଖୁସି ବ୍ୟକ୍ତ କରିଛନ୍ତି ପିସିବି ମୁଖ୍ୟ ଅସ୍ରଫ । ସେ କହିଛନ୍ତି, "ଉଭୟ ମ୍ୟାଚ୍ ଜିତି ବିଶ୍ବକପ୍ ୨୦୨୩ରେ ଆମ ଦଳର ଖେଳାଳିମାନେ ବର୍ତ୍ତମାନ ପର୍ଯ୍ୟନ୍ତ ଯେଭଳି ପ୍ରଦର୍ଶନ ଜାରି ରଖିଛନ୍ତି ମୁଁ ସେଥିରେ ଅତ୍ୟନ୍ତ ଖୁସି । ଚାଲିଥିବା ବିଶ୍ବକପ୍ରେ ସଫଳ ଅଭିଯାନ ପାଇଁ ପିସିବି ପରିଚାଳନା କମିଟି ଏବଂ ସମଗ୍ର ଦେଶ ଖେଳାଳିଙ୍କ ସହିତ ଦୃଢ଼ ଭାବରେ ଠିଆ ହୋଇଛନ୍ତି । ପାକିସ୍ତାନ ଦଳକୁ ନିର୍ଭୀକ କ୍ରିକେଟ୍ ଖେଳିବା ଆବଶ୍ୟକ । ଦଳକୁ ଉତ୍ସାହିତ କରିବା ପାଇଁ ମୁଁ ଭାରତ ଗସ୍ତ କରୁଛି । ଭାରତ ବିପକ୍ଷ ମ୍ୟାଚ୍ ପୂର୍ବରୁ ସେମାନଙ୍କୁ ମୋର ବାର୍ତ୍ତା ହେଉଛି, ନିର୍ଭୟରେ ଖେଳନ୍ତୁ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
