ଆଗ୍ରା: ୱେଷ୍ଟଇଣ୍ଡିଜ କ୍ରିକେଟ ଟିମର ପୂର୍ବତନ କ୍ୟାପଟେନ ତଥା ବର୍ତ୍ତାମାନର ସନରାଇଜ ହାଇଦ୍ରାବାଦ କ୍ରିକେଟ ଟିମର ବ୍ୟାଟିଂ କୋଚ ବ୍ରାଏନ ଲାରା ଆଜି ତାଜମହଲ ପରିଦର୍ଶନ କରିଛନ୍ତି । ସେ ଆଜି ସକାଳ ୬.୪୫ରେ ତାଜମହଲ ନିକଟରେ ପହଞ୍ଚିଥିଲେ । ଏହାପରେ ଅଧଘଣ୍ଟା ଧରି ଐତିହ୍ୟସ୍ଥଳୀ ପରିକ୍ରମା କରିଥିଲେ ।
ଅନ୍ୟପଟେ ଗାଇଡ୍ ରିଜୱାନ ଲାରାଙ୍କୁ ତାଜମହଲର ଇତିହାସ ବିଷୟରେ ଜଣାଇଥିଲେ । ତେବେ ଲାରା ପ୍ରଥମେ ୧୯୮୪ ମସିହାରେ ତାଜମହଲ ଦେଖିବାକୁ ଆସିଥିବା ବେଳେ ଏବେ ବହୁତ ଦିନ ପରେ ଗତକାଲି ସଂଧ୍ୟାରେ ତାଜମହଲ ଦେଖିବା ପାଇଁ ଲାରା ଆଗ୍ରାରେ ପହଞ୍ଚିଥିଲେ ।
ମାତ୍ର ସଂଧ୍ୟା ୬ଟା ହୋଇଯାଇ ଥିବାରୁ ଲାରା ତାଜମହଲ ଦେଖି ପାରି ନଥିଲେ । ତେବେ ସେ ଆଗ୍ରାରେ ରାତିରେ ରହିବା ସହ ଆଜି ସକାଳୁ ତାଜମହଲ ବୁଲି ଦେଖିଛନ୍ତି । ଅନ୍ୟପଟେ ଆଗାମୀ ଦିନରେ ପରିବାର ସହ ତାଜମହଲ ଦେଖିବା ଲାଗି ଆସିବେ ବୋଲି ଲାରାଙ୍କ ଜଣେ ବନ୍ଧୁ ଗାଇଡ୍ ରିଜୱାନ ଆଗରେ କହିଛନ୍ତି ।
ଅପରପକ୍ଷେ ଭାରତୀୟ ପ୍ରତ୍ନତତ୍ତ୍ବ ସର୍ବେକ୍ଷଣ ବିଭାଗର ଥିବା ପର୍ଯ୍ୟଟକଙ୍କ ଖାତାରେ ଲାରା କିଛି ଲେଖି ନଥିବା ଜଣାପଡିଛି । ଏହା ତାଙ୍କର ବ୍ୟକ୍ତିଗତ ଗସ୍ତ ହୋଇଥିବାରୁ ସେ ଲେଖି ନଥିବା ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
