ଅହମ୍ମଦାବାଦ: ବିଶ୍ବକପ୍ ୨୦୨୩ରେ ଭାରତ ପାଇଁ ପ୍ରଥମରୁ ୪ ମ୍ୟାଚ୍ରେ ଚୂଡ଼ାନ୍ତ ଏକାଦଶରୁ ବାଦ ପଡ଼ିଥିଲେ ଦଳର ସ୍ପିଡ୍ ଷ୍ଟାର ମହମ୍ମଦ ଶାମି । ହେଲେ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଆହତ ହୋଇ ଦଳରୁ ବାଦ ପଡିବା କାରଣରୁ ଶାମିଙ୍କୁ ମିଳିଥିଲା ସୁଯୋଗ । ଆଉ ନିଜକୁ ପ୍ରମାଣିତ କରିବାକୁ ବେଶୀ ସମୟ ନେଇଥିଲେ ଶାମି । ସେ ଖେଳିଥିବା ପ୍ରଥମ ମ୍ୟାଚ୍ରୁ ହିଁ ୫ ୱିକେଟ୍ ସଫଳତା ନେଇ ଆସିଥିଲେ ଚର୍ଚ୍ଚାର ପରିସରକୁ । ଆଉ ଏହାପରେ ଗୋଟିଏ ପରେ ଗୋଟିଏ ମ୍ୟାଚ୍ରେ ଘାତକ ବୋଲିଂ ସହ ବିପକ୍ଷ ଦଳ ପାଇଁ ପାଲଟିଥିଲେ ଭାରତର ବ୍ରହ୍ମାସ୍ତ୍ର ।
ସେମିଫାଇନାଲ୍ରେ ନ୍ୟୁଜିଲାଣ୍ଡ ବିପକ୍ଷରେ ପ୍ରଥମେ ବ୍ୟାଟିଂ କରି ଭାରତୀୟ ବ୍ୟାଟର ୩୯୭ ରନ୍ର ବିଶାଳ ସ୍କୋର ତ କରିଥିଲେ । ହେଲେ ଦଳର ବୋଲିଂ ଆଟାକ୍ ଏହି ମ୍ୟାଚ୍ରେ ବେଶ ନୈରାଶ୍ୟଜନକ ବୋଲିଂ କରିଥିଲେ । କିୱି ଅଧିନାୟକ କେନ୍ ୱିଲିୟମ୍ସନ୍ ଓ ଷ୍ଟାର ବ୍ୟାଟର ଡେରାଇଲ୍ ମିଚେଲ୍ଙ୍କ ଦମଦାର ଇନିଂସ୍ ଆଗରେ ଏକ ପ୍ରକାର ହାର ମାନି ସାରିଥିଲେ ଭାରତୀୟ ବୋଲର । ହେଲେ ଏହିଠାରୁ ଆରମ୍ଭ ହୋଇଥିଲା ଶାମି ଶୋ' । ସେ ଏକାକୀ ୭ ୱିକେଟ୍ ଦଖଲ କରି ଭାରତକୁ ଫାଇନାଲ୍କୁ ପହଞ୍ଚାଇଥିଲେ । ଭାରତର ସେମି ବିଜୟ ପରେ ଏନେକ ଶାମିଙ୍କ ବୋଲିଂକୁ 'ଅସାଧାରଣ' ବୋଲି କହୁଥିବାବେଳେ ସେ ଏବେ ନିଜ ସଫଳତାକୁ ନେଇ ମୁହଁ ଖୋଲିଛନ୍ତି ।
ଏହା ମଧ୍ୟ ପଢ଼ନ୍ତୁ...ବିଶ୍ବକପରେ ଧମାକାଦାର ପ୍ରଦର୍ଶନ ପରେ ଶାମିଙ୍କ ରାଜ୍ ଖୋଲିଲେ ପିଲାଦିନର କୋଚ୍
ଷ୍ଟାର ସ୍ପୋର୍ଟ୍ସର ଏକ କାର୍ଯ୍ୟକ୍ରମରେ ଶାମି କହିଛନ୍ତି, "ମୋ ବୋଲିଂରେ କିଛି ବି ଅସାଧାରଣ ନାହିଁ । ମୁଁ କେବଳ ଷ୍ଟମ୍ପ ଲେନ୍ଥକୁ ଲକ୍ଷ୍ୟ କରେ ଓ ୱିକେଟ୍ ପାଇବା ପାଇଁ ସେହି ଜୋନ୍ରେ ବୋଲିଂ କରେ । ମୁଁ ସବୁବେଳେ ଲକ୍ଷ୍ୟ କରେ ପିଚ୍ର ସ୍ଥିତି କିପରି ଅଛି, ପିଚ୍ରେ ବଲ୍ କିଭଳି ବ୍ୟବହାର କରୁଛି, ବଲ୍ ସ୍ବିଙ୍ଗ୍ ହେଉଛି ନା ନାହିଁ । ଯଦି ବଲ୍ ସ୍ବିଙ୍ଗ୍ ନହୁଏ, ସେତେବେଳେ ୱିକେଟ୍ ନେବାପାଇଁ କେବଳ 'ଷ୍ଟମ୍ପ୍ ଟୁ ଷ୍ଟମ୍ପ' ଲାଇନ୍ରେ ବଲ ପକାଇବା ପାଇଁ ଚେଷ୍ଟା କରିବା ସହ ଏହାକୁ 'ଏ' ଜୋନ୍ରେ ଡ୍ରପ୍ କରିବାକୁ ଚେଷ୍ଟା କରେ ।"
ଉଲ୍ଲେଖଯୋଗ୍ୟ, ଚଳିତ ବିଶ୍ବକପ୍ ୨୦୨୩ରେ ସେ କେବଳ ୬ ମ୍ୟାଚ୍ ଖେଳି ଟୁର୍ଣ୍ଣାମେଣ୍ଟର ସର୍ବାଧିକ ୱିକେଟ୍ ହାସଲକାରୀ ବୋଲର ହୋଇଛନ୍ତି । ଏହି ଟୁର୍ଣ୍ଣାମେଣ୍ଟରେ ସେ ଗୋଟିଏ ମ୍ୟାଚ୍ରେ ୪ ୱିକେଟ୍ ସଫଳତା ହାସଲ କରିଥିବାବେଳେ ୩ ଥର ୫ ୱିକେଟ୍ ସଫଳତା ହାସଲ କରିଛନ୍ତି । ଟୁର୍ଣ୍ଣାମେଣ୍ଟରେ ଏପର୍ଯ୍ୟନ୍ତ ୨୩ ୱିକେଟ୍ ହାସଲ କରିସାରିଥିବା ମହମ୍ମଦ ଶାମି ନ୍ୟୁଜିଲାଣ୍ଡ ବିପକ୍ଷରେ ଏକାକୀ ୭ ୱିକେଟ୍ ହାସଲ କରିଥିଲେ, ଯାହା କୌଣସି ଭାରତୀୟ ବୋଲରଙ୍କ ସର୍ବଶ୍ରେଷ୍ଠ ପ୍ରଦର୍ଶନ ଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
