ଧର୍ମଶାଳା: ବିଶ୍ବକପ୍ ୨୦୨୩ରେ ନ୍ୟୁଜିଲାଣ୍ଡ ବିପକ୍ଷ ମୁକାବିଲାରେ ଚଳିତ ବିଶ୍ବକପ୍ର ପ୍ରଥମ ମ୍ୟାଚ୍ ଖେଳୁଛନ୍ତି ଦଳର ଅଭିଜ୍ଞ ଦ୍ରୁତ ବୋଲର ମହମ୍ମଦ ଶାମି । ଏହି ମ୍ୟାଚ୍ରେ ଶାମି ବୋଲିଂ କରିଥିବା ପ୍ରଥମ ଓଭରର ପ୍ରଥମ ବଲରୁ ହିଁ ୱିକେଟ୍ ହାସଲ କରିଥିଲେ । ପ୍ରଥମ ବଲରେ ୱିଲ୍ ୟଙ୍ଗ୍ଙ୍କୁ କ୍ଲିନ୍ ବୋଲ୍ଡ କରିଥିଲେ ଶାମି । ଏହି ମ୍ୟାଚ୍ରେ ସେ ୧୦ ଓଭର ବୋଲିଂ କରିଥିବାବେଳେ ୫୪ ରନ ବ୍ୟୟରେ ୫ ୱିକେଟ୍ ସଫଳତା ହାସଲ କରିଛନ୍ତି । ଏହି ସଫଳତା ସହ ଆଉ ଏକ ବଡ଼ ରେକର୍ଡ କରିଛନ୍ତି ଶାମି । ଦିନିକିଆ ବିଶ୍ବକପ୍ ଇତିହାସରେ ସେ ଦ୍ବିତୀୟ ସର୍ବାଧିକ ୱିକେଟ ହାସଲକାରୀ ଭାରତୀୟ ବୋଲର ହୋଇଛନ୍ତି । ଏହି ରେକର୍ଡ ପାଇଁ ସେ କିମ୍ବଦନ୍ତୀ ଭାରତୀୟ ସ୍ପିନର ଅନୀଲ କୁମ୍ବଲେଙ୍କୁ ପଛରେ ପକାଇଛନ୍ତି ।
- " class="align-text-top noRightClick twitterSection" data="">
ବାଂଲାଦେଶ ବିପକ୍ଷ ମ୍ୟାଚ୍ରେ ଟିମ ଇଣ୍ଡିଆର ଷ୍ଟାର ଅଲରାଉଣ୍ଡର ତଥା ଉପଅଧିନାୟକ ହାର୍ଦ୍ଦିକ ପାଣ୍ଡ୍ୟା ଆହତ ହୋଇଥିଲେ । ଏହାପରେ ତାଙ୍କ ବିକଳ୍ପ ନେଇ ଚିନ୍ତାରେ ରହିଥିଲେ ଭାରତୀୟ ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡ ଓ ଟିମ୍ ମ୍ୟାନେଜମେଣ୍ଟ । ତେବେ ପାଣ୍ଡ୍ୟାଙ୍କ ବିକଳ୍ପ ଭାବେ ଈଶାନ କିଷାନ, ସୂର୍ଯ୍ୟକୁମାର ଯାଦବ, ମହମ୍ମଦ ଶାମି ଓ ରବିଚନ୍ଦ୍ରନ ଅଶ୍ବିନଙ୍କ ଭଳି ଏକାଧିକ ବିକଳ୍ପ ରହିଥିବା ଦ୍ରାବିଡ କହିଥିଲେ । ହେଲେ ଶନିବାର ସନ୍ଧ୍ୟାରେ ସୂର୍ଯ୍ୟକୁମାର ଓ ଈଶାନ କିଷାନ ଉଭୟ ଆହତ ହୋଇଥିବା ଖବର ଆସିଥିଲା । ହେଲେ ଆଜି ଶେଷ ମୂଗୁର୍ତ୍ତରେ ଭାରତ ତାର ଚୂଡ଼ାନ୍ତ ଏକାଦଶରେ ଦୁଇଟି ପରିବର୍ତ୍ତନ କରିଥିଲା । ଶାର୍ଦ୍ଦୁଲ ଠାକୁରଙ୍କ ସ୍ଥାନରେ ଶାମି ଓ ହାର୍ଦ୍ଦିକଙ୍କ ସ୍ଥାନରେ ସୂର୍ଯ୍ୟ କୁମାର ଯାଦବ ଦଳରେ ଖେଳିଥିଲେ । ଚଳିତ ବିଶ୍ବକପ୍ରେ ଶାମି ଓ ସୂର୍ଯ୍ୟକୁମାର ନିଜ ନିଜର ପ୍ରଥମ ମ୍ୟାଚ୍ ଖେଳିଥିଲେ ।
ତେବେ ପ୍ରଥମ ମ୍ୟାଚ୍ ଖେଳୁଥିବା ଭାରତୀୟ ଦଳର ଅଭିଜ୍ଞ ପେସର୍ ଶାମି ଦମଦାର ପ୍ରଦର୍ଶନ କରି ନ୍ୟୁଜିଲାଣ୍ଡର ବ୍ୟାଟିଂ ବିପର୍ଯ୍ୟୟ ଘଟାଇଥିଲେ । ଦିନିକିଆ କ୍ରିକେଟ୍ ବିଶ୍ବକପ୍ ଇତିହାସରେ ଦ୍ବିତୀୟ ଥର ପାଇଁ ୫ ୱିକେଟ୍ ସଫଳତା ହାସଲ କରିଥିବା ଶାମି ବର୍ତ୍ତମାନ ୧୨ ବିଶ୍ବକପ୍ ମ୍ୟାଚ୍ ଖେଳି ୩୬ ୱିକେଟ୍ ହାସଲ କରିଛନ୍ତି । ବିଶ୍ବକପ୍ ଇତିହାସରେ ଭାରତ ପାଇଁ ସର୍ବାଧିକ ୱିକେଟ୍ ହାସଲକାରୀ ବୋଲର ତାଲିକାର ଶୀର୍ଷରେ ରହିଛନ୍ତି ଜାହିର ଖାନ ଓ ଜାଭାଗଲ ଶ୍ରୀନାଥ । ଉଭୟ ୪୪ ୱିକେଟ୍ ଲେଖାଏଁ ହାସଲ କରି ଏହି ତାଲିକାର ଶୀର୍ଷରେ ରହିଛନ୍ତି । ଏହି କୀର୍ତ୍ତିମୀନ ହାସଲ କରିବାକୁ ଜାହିର ଖାନ ୨୩ ଦିନିକିଆ ମ୍ୟାଚ୍ ଖେଳିଥିବାବେଳେ ଶ୍ରୀନାଥ ୩୪ ବିଶ୍ବକପ୍ ମ୍ୟାଚ୍ ଖେଳି ୪୪ ୱିକେଟ୍ ନେଇଛନ୍ତି ।
ବିଶ୍ବକପ୍ରେ ୫ ୱିକେଟ୍ ସଫଳତା ପାଇଥିବା ଭାରତୀୟ ବୋଲର:
କପିଲ ଦେବ- ୫/୪୩ (ବିପକ୍ଷ- ଅଷ୍ଟ୍ରେଲିଆ,୧୯୮୩)
ରବିନ ସିଂହ- ୫/୩୧ (ବିପକ୍ଷ- ଶ୍ରୀଲଙ୍କା, ୧୯୯୯)
ଭେଙ୍କଟେଶ ପ୍ରସାଦ- ୫/୨୭ (ବିପକ୍ଷ- ପାକିସ୍ତାନ, ୧୯୯୯)
ଆଶିଷ ନେହରା- ୬/୨୩ (ବିପକ୍ଷ-ଇଂଲଣ୍ଡ, ୨୦୦୩)
ଯୁବରାଜ ସିଂହ- ୫/୩୧ (ବିପକ୍ଷ- ଆୟରଲାଣ୍ଡ, ୨୦୧୧)
ମହମ୍ମଦ ଶାମି- ୫/୬୯ (ବିପକ୍ଷ- ଇଂଲଣ୍ଡ, ୨୦୧୯)
ମହମ୍ମଦ ଶାମି- ୫/୫୪ (ବିପକ୍ଷ- ନ୍ୟୁଜିଲାଣ୍ଡ, ୨୦୨୩)
ବ୍ୟୁରୋ ରିପୋର୍ଟ, ଇଟିଭି ଭାରତ
