କାର୍ଡିଫ: ଆଜି ବିଶ୍ବକପରେ ଦୁଇଟି ମ୍ୟାଚ ଖେଳାଯିବ । ଇଂଲଣ୍ଡ ବନାମ ବାଂଲାଦେଶ ଓ ଆଫଗାନିସ୍ତାନ ବନାମ ନ୍ୟୁଜିଲାଣ୍ଡ । ପ୍ରଥମ ମ୍ୟାଚରେ ଘରୋଇ ଇଂଲଣ୍ଡକୁ ଭେଟିବ ବାଂଲାଦେଶ । ଭାରତୀୟ ସମୟ ଅପରାହ୍ନ 3.00ରେ ଏହି ମ୍ୟାଚ ଆରମ୍ଭ ହେବ ।
2011 ବିଶ୍ବକପ ଓ 2015 ବିଶ୍ବକପରେ ଇଂଲଣ୍ଡକୁ ହରାଇଥିଲା ବାଂଲାଦେଶ । ତେବେ ଏହା ପରେ ଇଂଲଣ୍ଡ ଟିମ ଶକ୍ତିଶାଳୀ ହୋଇଛି ଓ ଆଇସିସି ଦିନିକିଆ ମାନ୍ୟତାର ଶୀର୍ଷରେ ପହଞ୍ଚିଛି । ବାଂଲାଦେଶ ଆଇସିସି ମାନ୍ୟତାର 7ନଂ ସ୍ଥାନରେ ରହିଛି । ଶେଷ 5ଟି ଦିନିକିଆ ମୁକାବଲାରେ ଇଂଲଣ୍ଡ 3ଟି ଓ ବାଂଲାଦେଶ 2ଟିରେ ବିଜୟୀ ହୋଇଛି । ଶେଷ 3ଟି ବିଶ୍ବକପ ମ୍ୟାଚରେ ଇଂଲଣ୍ଡକୁ 2ଥର ମାତ ଦେଇଛି ବାଂଲାବାହିନୀ ।
କେବେ ବିଶ୍ବକପ ଜିତିନଥିବା ଇଂଲଣ୍ଡକୁ ଚଳିତ ବିଶ୍ବକପର ନଂ1 ଫେବରିଟ ଦଳ କୁହାଯାଉଛି । ଉଦ୍ଘାଟନୀ ମ୍ୟାଚରେ ଦକ୍ଷିଣ ଆଫ୍ରିକାକୁ ସହଜରେ ହରାଇ ଶକ୍ତିପ୍ରଦର୍ଶନ କରିଥିଲା ଇଂଲଣ୍ଡ । ତେବେ ଦ୍ବିତୀୟ ମ୍ୟାଚରେ ପାକିସ୍ତାନ ଠାରୁ ହାରିଯାଇଥିଲା । 349ରନର ବିଜୟ ଲକ୍ଷ୍ୟକୁ ପିଛା କରି 15ରନ ପଛରେ ରହିଯାଇଥିଲା ଇଆନ ମୋର୍ଗାନଙ୍କ ଦଳ । ତେବେ 2ଟି ମ୍ୟାଚରୁ ଗୋଟିଏ ବିଜୟସହ 2 ପଏଣ୍ଟରେ, ପଏଣ୍ଟ ଟେବୁଲର 6ନଂ ସ୍ଥାନରେ ରହିଛି ଇଂଲଣ୍ଡ ।
ଅନ୍ୟପଟେ ବାଂଲାଦେଶ ପ୍ରଥମ ମ୍ୟାଚରେ ଦକ୍ଷିଣ ଆଫ୍ରିକାକୁ ହରାଇ କମଜୋର ନୁହେଁ ବୋଲି ପ୍ରମାଣ ଦେଇଛି । ତେବେ ଦ୍ବିତୀୟ ମ୍ୟାଚରେ ନ୍ୟୁଜିଲାଣ୍ଡ ବିପକ୍ଷରେ ପରାଜୟର ମୁହଁ ଦେଖିଛି ଦଳ । 2ପଏଣ୍ଟ ସହ ପଏଣ୍ଟ ଟେବୁଲର 8ମ ସ୍ଥାନରେ ରହିଛି ବାଂଲାଦେଶ ।
ଆଜିର ମ୍ୟାଚରେ ଉଭୟ ଦଳ ଦ୍ବିତୀୟ ବିଜୟ ଲକ୍ଷ୍ୟରେ ରହିଛନ୍ତି । ତେବେ ପ୍ରଦର୍ଶନ ଓ ଘରୋଇ ପରିବେଶ ପାଇଁ ବାଂଲାଦେଶ ଉପରେ ଇଂଲଣ୍ଡ ଭାରି ପଡିପାରେ ।
ବାଂଲାଦେଶ ସମ୍ଭାବ୍ୟ ଏକାଦଶ: ତମିମ ଇକବାଲ, ସୌମ୍ୟ ସରକାର, ସାକିବ ଅୱ ହସନ, ମୁସଫକର ରହିମ(ୱିକେଟକିପର), ମହମ୍ମଦ ମିଥୁନ, ମହମ୍ମଦୁଲ୍ଲା, ମୋସାଦେକ ହୁସେନ, ମହମ୍ମଦ ସୈଫଉଦ୍ଦିନ, ମେହେଦୀ ହସନ, ମସରଫେ ମୋର୍ତାର୍ଜା(କ୍ୟାପଟେନ), ମୁସ୍ତାଫିଜୁର ରେହମାନ ।
ଇଂଲଣ୍ଡ ସମ୍ଭାବ୍ୟ ଏକାଦଶ: ଜସନ ରୟ, ଜନ୍ନି ବେଷ୍ଟୋ, ଜୋ ରୁଟ, ଇଆନ ମୋର୍ଗାନ(କ୍ୟାପଟେନ), ବେନ ଷ୍ଟୋକ୍ସ, ଜସ ବଟଲର, ମୋଇନ ଅଲ୍ଲୀ, କ୍ରିସ ୱର୍କ୍ସ, ଲିଆମ ପ୍ଲଙ୍କେଟ, ଜୋଫ୍ରା ଆର୍ଚର, ମାର୍କ ଉଡ ।
