ଲଣ୍ଡନ: ଆଇସିସିର ‘ହୋମ’ ଆଣ୍ଡ ‘ଆୱେ’ ନିୟମ ଅନୁସାରେ ଇଂଲଣ୍ଡ ବିପକ୍ଷ ମ୍ୟାଚରେ ନାରଙ୍ଗୀ ରଙ୍ଗର ଜର୍ସିରେ ନଜର ଆସିବ ଭାରତୀୟ ଟିମ । ଆଇସିସିର ଏହି ନିୟମ ଅନୁସାରେ ଆୟୋଜକ ଟିମକୁ ବାଦ ଦେଇ ଅନ୍ୟ ସମସ୍ତ ଟିମ ନିଜ ଜର୍ସି ସହ ଆଉ ଏକ ଭିନ୍ନ ରଙ୍ଗର ବିକଳ୍ପ ଜର୍ସି ରଖିବେ । ତେବେ ଭାରତୀୟ ଟିମର ଜର୍ସି କିଭଳି ଦେଖାଯିବ ତେକୁ ନେଇ ଏବେ ସୋସିଆଲ ମିଡିଆରେ ଚର୍ଚ୍ଚା ।
ସୋସିଆଲ ମିଡିଆରେ ଭାରତୀୟ ଟିମର ସୁପର ଫ୍ୟାନ ସୁଧୀର ଗୌତମ ଟିମ ଇଣ୍ଡିଆର ନାରଙ୍ଗୀ ଜର୍ସିର ଏକ ଫଟୋ ସେୟାର କରିଛନ୍ତି । ତେବେ ପ୍ରକୃତରେ ଏହା ଭାରତ ଟିମର ନୂଆ ଜର୍ସି କି ନାହିଁ ତାହା ସ୍ପଷ୍ଟ ହୋଇନାହିଁ । କିନ୍ତୁ ବର୍ତ୍ତମାନ ଏହି ନୂଆ ଜର୍ସିର ଫଟୋ ଘୁରି ବୁଲୁଛି ସୋସିଆଲ ମିଡିଆରେ ।
ଯେଉଁ ଦଳ ଗୁଡିକର ଜର୍ସି ରଙ୍ଗ ନୀଳ ସେମାନଙ୍କୁ ଭିନ୍ନ ରଙ୍ଗର ଜର୍ସି ପାଇଁ କୁହାଯାଇଛି । ଯେଉଁଥିରେ ଭାରତ, ଇଂଲଣ୍ଡ, ଆଫଗାନିସ୍ତାନ, ଶ୍ରୀଲଙ୍କା ଆଦି ଟିମ ରହିଛନ୍ତି । କିନ୍ତୁ ‘ହୋମ’ ଆଣ୍ଡ ‘ଆୱେ’ ନିୟମ ଯୋଗୁଁ ଇଂଲଣ୍ଡ ଘରୋଇ ଦଳ ହୋଇଥିବାରୁ ସେ ନିଜ ଜର୍ସି ବଦଳାଇବ ନାହିଁ ।
ତେଣୁ ଅନ୍ୟଦଳ ସବୁ ଭିନ୍ନ ରଙ୍ଗର ଜର୍ସି ପିନ୍ଧିବେ । ତେବେ ସମାନ ରଙ୍ଗ ଥିବା ଦୁଇଟି ଦଳ ଖେଳିବା ବେଳେ ମଧ୍ୟ ଜର୍ସି ରଙ୍ଗ ପରିବର୍ତ୍ତିତ ହୋଇଛି । ବାଂଲାଦେଶ ଓ ଦକ୍ଷିଣ ଆଫ୍ରିକା ଜର୍ସି ରଙ୍ଗ ସବୁଜ ହୋଇଥିବାରୁ ସେମାନେ ନିଜ ଜର୍ସିରେ ମଧ୍ୟ ପରିବର୍ତ୍ତନ କରିଛନ୍ତି ।
ତେବେ ଭାରତୀୟ ଟିମର ଜର୍ସିକୁ ନେଇ ଜାରି ରହିଛି କଳ୍ପନା ଜଳ୍ପନା । କିନ୍ତୁ ସତରେ କେମିତି ରହିବ ଭାରତର ନିଉ ଜର୍ସି ତାହା ମ୍ୟାଚ ଦିନ ହିଁ ଜଣା ପଡିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
