ଜୟପୁର: ସ୍ଥାନୀୟ ସୱାଇ ମାନସିଂ ଷ୍ଟାଡିୟମରେ ଖେଳାଯାଇଥିବା ମହିଳା ଆଇପିଏଲର 2ୟ ମ୍ୟାଚରେ ବିଜୟୀ ହୋଇଛି ଓଡିଆ ଝିଅ ସୁଶ୍ରୀଙ୍କ ଦଳ ଭେଲୋସିଟି । ବିପକ୍ଷ ଟ୍ରାଏଲବ୍ଲାଜର୍ସର ଦିପ୍ତୀ ଶର୍ମାଙ୍କ ଆଟାକିଂ ବୋଲିଂ ସତ୍ତ୍ବେ 3ୱିକେଟରେ ବାଜି ମାତ୍ କରିଛି ମିତାଲି ରାଜଙ୍କ ଭେଲୋସିଟି । ଗୋଟିଏ ବଲ ଖେଳି ଦୁଇ ରନ କରିଥିବା ଓଡିଆ ଝିଅ ସୁଶ୍ରୀ ଦିବ୍ୟଦର୍ଶିନୀ ପ୍ରଧାନ ଦଳ ପାଇଁ ବିଜୟ ମୁଣ୍ଡି ମାରିଛନ୍ତି ।
ସ୍ମୃତି ମନ୍ଧାନାଙ୍କ ଟ୍ରାଏଲବ୍ଲାଜର୍ସ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୬ ୱିକେଟ୍ ହରାଇ ମାତ୍ର ୧୧୨ ରନ୍ କରିଥିଲା । ଜବାବରେ ଭେଲୋସିଟି ଦଳ ୭ଟି ୱିକେଟ୍ ହରାଇ 113 ରନ କରିଛି ।
2ୟ ଭାଗରେ ବ୍ୟାଟିଂ କରୁଥିବା ଭେଲୋସିଟିର ହ୍ୟାଲି ମାଥଉଇସ୍ 5ରନ କରି ଆଉଟ ହେବା ପରେ ଦଳର ପାଳିକୁ ସମ୍ଭାଳିଥିଲେ ଡାନିଏଲ୍ ୱେଟ୍(୪୬) ଓ ସେଫାଳି ବର୍ମା(34) । ପରେ ଅଧିନାୟିକା ମିତାଲି ରାଜ୍ 17ରନ କରି ଆଉଟ ହୋଇଥିଲେ । ଟ୍ରାଏଲବ୍ଲାଜର୍ସର ଦୀପ୍ତି ଶର୍ମା ଗୋଟିଏ ଓଭରରେ ମିତାଲି ରାଜ, ଶିକ୍ଷା ପାଣ୍ଡେ(୦) ଓ ଆମେଲୀ କେର(୦)ଙ୍କୁ ଆଉଟ୍ କରି ମ୍ୟାଚ୍ରେ ରୋମାଞ୍ଚ ଭରି ଦେଇଥିଲେ । ଶେଷରେ ସୁସମା ବର୍ମା ଓ ସୁଶ୍ରୀ ଦିବ୍ୟଦର୍ଶିନୀ ପ୍ରଧାନ ଅପରାଜିତ ରହି ଦଳକୁ ବିଜୟୀ କରିଥିଲେ ।
ସେହିପରି ପ୍ରଥମ ବ୍ୟାଟିଂ କରିଥିବା ଟ୍ରାଏଲବ୍ଲାଜର୍ସ ପକ୍ଷରୁ ହାରଲୀନ୍ ଦେଓଲ ସର୍ବାଧିକ ୪୩ରନ କରିଥିଲେ । ଅନ୍ୟପଟେ ଓଡିଆ ଝିଅ ସୁଶ୍ରୀ 3 ଓଭର ବୋଲିଂ କରି 1ୱିକେଟ ନେଇ 14ରନ ବ୍ୟୟ କରିଥିଲେ ।
