ଦୁବାଇ: ଅନ୍ତର୍ଜାତୀୟ କ୍ରିକେଟରୁ ସନ୍ୟାସ ଘୋଷଣା କରିଛନ୍ତି ଅମ୍ପାୟର ବ୍ରୁସ ଅକ୍ସେନଫୋର୍ଡ । ଗୁରୁବାର ଅନ୍ତର୍ଜାତୀୟ କ୍ରିକେଟ ପରିଷଦ(ଆଇସିସି) ପକ୍ଷରୁ ବ୍ରୁସ ସନ୍ୟାସ ନେବାକୁ ନିଷ୍ପତ୍ତି ନେଇଥିବା ସୂଚନା ଦିଆଯାଇଛି । କ୍ରିକେଟର ସମସ୍ତ ଫର୍ମାଟରେ ଅଭିଜ୍ଞତା ଦୃଷ୍ଟିରୁ ଅମ୍ପାୟାର ବ୍ରୁସଙ୍କର ଏ ଦୀର୍ଘ ସଫଳତମ କ୍ୟାରିୟର ରହିଥିଲା । ବିଶ୍ବତମାମ ସେ କ୍ରିକେଟର ତିନୋଟି ଫର୍ମାଟରେ ନିଜକୁ ସଠିକ ପ୍ରମାଣିତ କରିବା ସହ ଅଗଣିତ କ୍ରିକେଟ ପ୍ରେମୀଙ୍କ ହୃଦୟ ଜିତିପାରିଛନ୍ତି।
ବର୍ଷ 2006ରେ ଗାବାରେ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିବା ଟି-20 ମ୍ୟାଚରେ ଅନ୍ତର୍ଜାତୀୟ ଡେବ୍ୟୁ କରିଥିଲେ ଅକ୍ସେନଫୋର୍ଡ । 2012 ଠାରୁ ସେ ଆଇସିସିର ଏଲିଟ ପ୍ୟାନେଲ ଅମ୍ପାୟରଙ୍କ ମଧ୍ୟରେ ନିୟମିତ ସଦସ୍ୟ ଥିଲେ । ଏଯାବତ ସେ 62ଟି ଟେଷ୍ଟ ମ୍ୟାଚକୁ ପରିଚାଳନା କରିସାରିଛନ୍ତି । ବ୍ରିସବେନରେ ଭାରତ-ଅଷ୍ଟ୍ରେଲିଆ ଟେଷ୍ଟ ସିରିଜର ଶେଷ ମ୍ୟାଚରେ ସେ ଶେଷଥର ପାଇଁ ନଜର ଆସିଥିଲେ ।
ଗତ ତିନୋଟି ଆଇସିସି ପୁରୁଷ କ୍ରିକେଟ ବିଶ୍ବକପ ଓ ଗତ ତିନୋଟି ସଂସ୍କରଣର ଆଇସିସି ପୁରୁଷ ବିଶ୍ବକପରେ ସେ ଅମ୍ପାୟର ରହିଥିଲେ । 2012 ଓ 2014 ସଂସ୍କରଣର ଆଇସିସି ମହିଳା ଟି-20 ବିଶ୍ବକପରେ ମଧ୍ୟ ସେ ପରିଚାଳନା ଦାୟିତ୍ବ ନିଭାଇଥିଲେ ।
ଅମ୍ପାୟର ହେବା ପୂର୍ବରୁ ଅକ୍ସେନଫୋର୍ଡ, କୁଇନ୍ସଲ୍ୟାଣ୍ଡ ପକ୍ଷରୁ ଜଣେ ଲେଗ ସ୍ପିନର ଓ ନିମ୍ନକ୍ରମ ବ୍ୟାଟ୍ସମ୍ୟାନ ଭାବେ 8ଟି ପ୍ରଥମ ଶ୍ରେଣୀ ମ୍ୟାଚରେ ପ୍ରତିନିଧିତ୍ବ କରିଛନ୍ତି । କୁଇନ୍ସଲ୍ୟାଣ୍ଡର 60 ବର୍ଷୀୟ ଭେଟେରାନ ଅମ୍ପାୟର ଅନ୍ତର୍ଜାତୀୟ କ୍ରିକେଟରୁ ବିଦାୟ ନେଉଥିଲେ ମଧ୍ୟ ଘରୋଇ ମ୍ୟାଚରେ ନଜର ଆସିବେ ବୋଲି ଜଣାପଡିଛି ।
ଅନ୍ତର୍ଜାତୀୟ କ୍ରିକେଟରୁ ବିରତି ନେଉଥିବା ଅକ୍ସେନଫୋର୍ଡ କହିଛନ୍ତି, "ଏହା ବିଶ୍ବାସ କରିବା କଷ୍ଟ ଯେ, ପାଖାପାଖି 200 ଅନ୍ତର୍ଜାତୀୟ ମ୍ୟାଚରେ ଅମ୍ପାୟର ଦାୟିତ୍ବ ତୁଲାଇଛି । ଏହା ମୋ ପାଇଁ ସୌଭାଗ୍ୟର ବିଷୟ । ଏହି ଯାତ୍ରା ଆରମ୍ଭ କରିବା ପୂର୍ବରୁ ଏହି ଲମ୍ବା ଯାତ୍ରା ଏତେ ମାତ୍ରାରେ ସଫଳତମ ହେବାନେଇ ଆଶା ରଖିନଥିଲେ । ବିଶ୍ବର ଭିନ୍ନଭିନ୍ନ ଭାଗରୁ ଅନେକ ସୁନ୍ଦର ବ୍ୟକ୍ତିତ୍ବଙ୍କ ସହ ମିଶିବାର, ଓ ସହଯୋଗର ଏକ ଅଂଶ ହୋଇପାରିଥିବାରୁ ଅତ୍ୟନ୍ତ ଖୁସି । ଆଗକୁ ଅନ୍ତର୍ଜାତୀୟ କ୍ରିକେଟ ମ୍ୟାଚ ନୁହେଁ, ଅଷ୍ଟ୍ରେଲିଆ ମଧ୍ୟରେ ଘରୋଇ ମ୍ୟାଚରେ ଅମ୍ପାୟର ରହିବାକୁ ନେଇ ଖୁସି ହେବି ।"
ବ୍ରୁସଙ୍କ ଅବସରରେ ଦୀର୍ଘ ସଫଳତମ ଏହି ଯାତ୍ରା ପାଇଁ ଅନ୍ତର୍ଜାତୀୟ କ୍ରିକେଟ ପରିଷଦ ତାଙ୍କୁ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
