ଲାହୋର: ପୂର୍ବତନ ପାକିସ୍ତାନ କ୍ରିକେଟର ଶୋଏବ ଅଖତର ଅନୁଭବ କରନ୍ତି ଯେ ମହାନ କ୍ରିକେଟର ସଚିନ ତେନ୍ଦୁଲକରଙ୍କୁ ବର୍ତ୍ତମାନ ଭାରତୀୟ ଅଧିନାୟକ ବିରାଟ କୋହଲିଙ୍କ ସହ ତୁଳନା କରିବା ଠିକ ନୁହେଁ । କାରଣ ‘ମାଷ୍ଟର ବ୍ଲାଷ୍ଟର’ ସଚିନ କ୍ରିକେଟର ସବୁଠାରୁ କଠିନ ଯୁଗରେ ଅନେକ ଗୁଡ଼ିଏ ରେକର୍ଡ ସୃଷ୍ଟି କରିଛନ୍ତି ।
କୋହଲିଙ୍କୁ ପ୍ରାୟ ସମସ୍ତେ ଦ୍ବିତୀୟ ତେନ୍ଦୁଲକର ବୋଲି କୁହନ୍ତି, ଆଉ କୋହଲି ମଧ୍ୟ ତାଙ୍କ ଆଦର୍ଶ ସଚିନଙ୍କ ଦ୍ବାରା ସ୍ଥାପିତ କିଛିଟା ରେକର୍ଡକୁ ଭାଙ୍ଗି ଦେଇଛନ୍ତି ।
କୋହଲିଙ୍କୁ ଆଧୁନିକ କ୍ରିକେଟର ଜଣେ ଶ୍ରେଷ୍ଠ ଖେଳାଳି ବୋଲି ସ୍ବୀକାର କରିବା ସତ୍ତ୍ବେ ଅଖତର କହିଛନ୍ତି ଯେ ତେନ୍ଦୁଲକର କଠିନ ସ୍ଥିତିରେ ନିଜକୁ ଶ୍ରେଷ୍ଠ ବୋଲି ପ୍ରମାଣିତ କରିଛନ୍ତି ତେଣୁ ଉଭୟଙ୍କ ତୁଳନା କରିବା ଠିକ ହେବ ନାହିଁ ।
‘‘ତେନ୍ଦୁଲକର କ୍ରିକେଟ କଠିନତମ ଯୁଗରେ ବ୍ୟାଟିଂ କରିଛନ୍ତି । ଏବେ ତାଙ୍କୁ ସୁଯୋଗ ମିଳିଲେ ବୋଧହୁଏ ସେ 1.30 ଲକ୍ଷ ରନ କରିଥାନ୍ତେ । ତେଣୁ ଉଭୟ ସଚିନ ଓ କୋହଲିଙ୍କ ମଧ୍ୟରେ ତୁଳନା କରିବା ଠିକ ହେବ ନାହିଁ,’’ ବୋଲି ଏକ ଭିଡିଓ ଚାଟରେ କହିଛନ୍ତି ଅଖତର ।
