ସିଡନି: ଶେଷ ହୋଇଛି ଅଷ୍ଟ୍ରେଲିଆ କ୍ରିକେଟର ଷ୍ଟିଭ ସ୍ମିଥଙ୍କ ବାସନ୍ଦାଦେଶ । ପୂର୍ବରୁ 12 ମାସ କ୍ରିକେଟରୁ ବାସନ୍ଦାଦେଶ ସମୟ ଶେଷ କରି ଦଳକୁ ଫେରିଥିଲେ ସ୍ମିଥ । ରବିବାର 2ବର୍ଷର ଅଧିନାୟକତ୍ବ ବାସନ୍ଦାଦେଶ ମଧ୍ୟ ଶେଷ ହୋଇଛି । ଫଳରେ ପୁଣି ଅଷ୍ଟ୍ରେଲିଆ ଦଳର ନେତୃତ୍ବ ନେଇପାରନ୍ତି ଏହି ଭେଟେରାନ କ୍ରିକେଟର ।
![Steve Smith eligible to captain Australia](https://etvbharatimages.akamaized.net/etvbharat/prod-images/smith_2301newsroom_1579746177_543.jpg)
ଦକ୍ଷିଣ ଆଫ୍ରିକାରେ ବର୍ଷ 2018ରେ ଏକ ବଲ ଟାମ୍ପରିଂ ଅଭିଯୋଗରେ ସ୍ମିଥଙ୍କୁ କ୍ୟାପଟେନ ପଦ ହରାଇବାକୁ ପଡିଥିଲା । ଏଥିସହିତ କ୍ରିକେଟରୁ 12ମାସ ଓ ଅଧିନାୟକତ୍ବରୁ 2ବର୍ଷ ପର୍ଯ୍ୟନ୍ତ ବାସନ୍ଦାଦେଶ ଭୋଗିଥିଲେ ଷ୍ଟିଭ ସ୍ମିଥ ।
2018 ଦକ୍ଷିଣ ଆଫ୍ରିକା ବିପକ୍ଷ କେପ ଟାଉନ ଟେଷ୍ଚରେ ଏହି ବହୁ ଚର୍ଚ୍ଚିତ ବଲ ଟାମ୍ପରିଂ ଘଟଣା ଘଟିଥିଲା । ତତ୍କାଳିନ ଅଷ୍ଟ୍ରେଲିଆ ଟିମର ଭାଇସ କ୍ୟାପଟେନ ଡେଭିଡ ୱାର୍ଣ୍ଣର, ସାଥି ଖେଳାଳି କେମରନ ବେନକ୍ରାପ୍ଟଙ୍କ ସହ ମିଶି ବଲକୁ ବାଲିକାଗଜରେ ଘଷି ବଲକୁ ନଷ୍ଟ କରୁଥିବାର ଦେଖିବାକୁ ମିଳିଥିଲା । ଏହି ଘଟଣାରେ ବନକ୍ରାପ୍ଟ 9 ମାସ ଓ ସ୍ମିଥ- ୱାର୍ଣ୍ଣରଙ୍କୁ 12 ମାସ ପର୍ଯ୍ୟନ୍ତ ସମସ୍ତ ପ୍ରକାର କ୍ରିକେଟରୁ ବାସନ୍ଦ କରାଯାଇଥିଲା । ଅଷ୍ଟ୍ରେଲିଆର ତତ୍କାଳୀନ କୋଚ ଡାରେନ ଲେହମାନ, କ୍ରିକେଟ ଅଷ୍ଟ୍ରେଲିଆର ମୁଖ୍ୟ କାର୍ଯ୍ୟନିବାହୀ ଜେମ୍ସ ସୁଦରଲାଣ୍ଡ ଏହି କଳଙ୍କିତ ଘଟଣାରେ ନିଜ ପଦରୁ ଇସ୍ତଫା ଦେଇଥିଲେ ।