ହାଇଦ୍ରାବାଦ: ବାଂଲାଦେଶ ବିପକ୍ଷ ଦିନିକିଆ ସିରିଜକୁ 2-0ରେ ଜିତି ନେଇଛି ଶ୍ରୀଲଙ୍କା । 3ଟିକିଆ ଏହି ସିରିଜର 2ୟ ମ୍ୟାଚରେ 7ୱିକେଟରେ ସହଜ ବିଜୟ ହାସଲ କରିଛି ଶ୍ରୀଲଙ୍କା । ଫଳରେ ସିରିଜର ଶେଷ ମ୍ୟାଚ ବାକି ଥାଇ ସିରିଜ ହାତେଇଛି ଘରୋଇ ଶ୍ରୀଲଙ୍କା ।
2ୟ ଦିନିକିଆରେ ପ୍ରଥମେ ବ୍ୟାଟିଂ କରି ବାଂଲାଦେଶ 238 ରନ କରିଥିଲା । 239 ରନର ବିଜୟ ଲକ୍ଷ୍ୟକୁ ପିଛା କରି ଶ୍ରୀଲଙ୍କା 45ତମ ଓଭରରେ ବିଜୟ ହାସଲ କରିଥିଲା । ପ୍ରଥମ ୱିକେଟ ଯୋଡିରେ କ୍ୟାପଟେନ କରୁଣାରତ୍ନେ ଓ ଅଭିସ୍କା ଫର୍ଣ୍ଣାଣ୍ଡୋ 71 ରନ ଯୋଡିଥିଲେ । ପରେ କୁସଲ ପରେରା ଓ ଫର୍ଣ୍ଣାଣ୍ଡୋଙ୍କ ମଧ୍ୟରେ 58 ରନର ପାର୍ଟନରସିପ ହୋଇଥିଲା । ତେବେ ଆଞ୍ଜେଲୋ ମାଥ୍ୟୁସ 44 ଓ କୁସଲ ମେଣ୍ଡିସ 41 ରନ କରି ଶ୍ରୀଲଙ୍କାକୁ ବିଜୟ ଦେଇଥିଲେ । ଅଭିସ୍କା ଫର୍ଣ୍ଣାଣ୍ଡୋ 82, ପରେରା 30 ରନର ପାଳି ଖେଳିଥିଲେ । ବାଂଲାଦେଶ ପକ୍ଷରୁ ମୁସ୍ତାଫିଜୁର ରେହମାନ 2ଟି ୱିକେଟ ଅକ୍ତିଆର କରିଥିଲେ ।
ପୂର୍ବରୁ ବାଂଲାଦେଶ କ୍ୟାପଟେନ ତମିମ ଇକବାଲ ଟସ ଜିତି ବ୍ୟାଟିଂ ନିଷ୍ପତ୍ତି କରିଥିଲେ । ମୁସଫିକର ରହିମ ଅପରାଜିତ 98, ମେହେଦି ହସନ 43 ରନର ପାଳି ଖେଳିଥିଲେ । ଶ୍ରୀଲଙ୍କା ପକ୍ଷରୁ ଇସୁରୁ ଉଦ୍ଦାନା 27 ରନ ବ୍ୟୟରେ 2ଟି ୱିକେଟ ଅକ୍ତିଆର କରିଥିଲେ । 3ୟ ଦିନିକିଆ ଜୁଲାଇ 31ରେ ପ୍ରେମଦାସ ଷ୍ଟାଡିୟମ କଲମ୍ବୋରେ ଖେଳାଯିବ ।
