କୋଲକାତା: ଟିମ ଇଣ୍ଡିଆର ପୂର୍ବତନ କ୍ୟାପଟେନ ମହେନ୍ଦ୍ର ସିଂହ ଧୋନିଙ୍କ କ୍ରିକେଟ ଭବିଷ୍ୟତ ନେଇ ଚର୍ଚ୍ଚା ଥମିବାର ନାଁ ନେଉନି । ଅବସର ନେଇ ଅନେକ ଚର୍ଚ୍ଚା ହେଉଥିଲେ ମଧ୍ୟ ନିଜେ ଧୋନି ଏହି ଘଟଣାରେ ମୁହଁ ଖୋଲୁ ନାହାଁନ୍ତି । 2019 ବିଶ୍ବକପ ସେମିଫାଇନାଲରେ ଭାରତ ନ୍ୟୁଜିଲାଣ୍ଡ ଠାରୁ ପରାସ୍ତ ହୋଇ ବିଦାୟ ନେବା ପରେ କ୍ରିକେଟଠାରୁ ଦୂରରେ ରହିଛନ୍ତି ଧୋନି ।
ଏପରି ସମୟରେ ବିସିସିଆଇ ସଭାପତି ସୌରଭ ଗାଙ୍ଗୁଲି ଧୋନିଙ୍କ କ୍ରିକେଟ ଭବିଷ୍ୟତ ନେଇ ବୟାନ ଦେଇଛନ୍ତି । ଗାଙ୍ଗୁଲି କହିଛନ୍ତି "ଏହା ଅତ୍ୟନ୍ତ ସ୍ପଷ୍ଟ ହୋଇଛି ତେବେ ଉପଯୁକ୍ତ ସମୟ ଆସିଲେ ସମସ୍ତଙ୍କ ସାମ୍ନାକୁ ଆସିବ । ତେବେ କିଛି କଥା ସର୍ବସମ୍ମୁଖରେ କହିବା ଠିକ ହେବ ନାହିଁ" । ଗାଙ୍ଗୁଲି ଆହୁରି ମଧ୍ୟ କହିଛନ୍ତି ଧୋନିଙ୍କ ଭଳି ଚମ୍ପିଆନ ଖେଳାଳିଙ୍କ ଉପରେ ନିଷ୍ପତ୍ତି ନେବା ପାଇଁ ବହୁତ ସମୟ ରହିଛି ।
ଆଗାମୀ ଆଇପିଏଲରେ ଧୋନିଙ୍କ ପ୍ରଦର୍ଶନ ଜାତୀୟ ଦଳକୁ ଫେରିବା ନେଇ ସ୍ପଷ୍ଟ କରିବ ବୋଲି, ନିକଟ ଅତୀତରେ ମତ ରଖିଛନ୍ତି କୋଚ ରବି ଶାସ୍ତ୍ରୀ । ଧୋନି ବେଙ୍ଗାଲୁରୁରେ ଅଷ୍ଟ୍ରେଲିଆ ବିପକ୍ଷରେ ଫେବ୍ରୁୟାରି 2019ରେ ଶେଷ ଟି20 ମ୍ୟାଚ ଖେଳିଥିଲେ ।
