କଟକ: 3ଟି ସିଜିନ ପରେ ରଣଜୀ ଟ୍ରଫି କ୍ବାର୍ଟର ଫାଇନାଲରେ ପହଞ୍ଚିଛି ଓଡିଶା। କ୍ବାର୍ଟର ଲଢେଇରେ ବେଙ୍ଗଲକୁ ଭେଟିବ ଶୁଭ୍ରାଂଶୁ ବାହିନୀ। ତେବେ ଚଳିତ ରଣଜୀ ସିଜିନରେ ଦମଦାର ଫର୍ମରେ ରହିଛି ଟିମ ଓଡିଶା। ସେଥିପାଇଁ କ୍ବାର୍ଟର ମୁକାବିଲାରେ ଦଳ ଫେଭରେଟ ମଧ୍ୟ ରହିଛି।କଟକର ଡ୍ରିମ୍ସ ଗ୍ରାଉଣ୍ଡରେ ଆସନ୍ତା 20ରେ ଖେଳାଯିବ ବେଙ୍ଗଲ-ଓଡିଶା କ୍ବାର୍ଟର ଫାଇନାଲ। ମ୍ୟାଚ ପୂର୍ବରୁ ଓଡିଶାର ପଲ୍ଲା ଭାରୀ ରହିଛି।
ଘରୋଇ ପିଚରେ ପୁଣି ସମସ୍ତ ବିଭାଗରେ ପ୍ରଭାବୀ ପ୍ରଦର୍ଶନ ଲକ୍ଷ୍ୟରେ ରହିଛି ଓଡିଶା। ଓଡିଶା ଦଳ ଏହି ରଣଜୀ ସିଜିନରେ ଭଲ ଅଭ୍ୟାସ ନ କରି ମଧ୍ୟ ଏତେ ବଡ଼ ସଫଳତା ଅର୍ଜନ କରିଛି। ଯାହା ଓସିଏ ପାଇଁ ଏକ ଗୌରବର କଥା। ତେବେ ଏହି ସଫଳତା ପଛରେ କୋଚ ରଶ୍ମି ରଞ୍ଜନ ପରିଡାଙ୍କ ପ୍ରମୁଖ ଭୂମିକା ଥିବା କୁହାଯାଉଛି।
ଦଳର ଭେଟେରାନ ବ୍ୟାଟ୍ସମ୍ୟାନ ଦେବାଶିଷ ସାମନ୍ତରାୟ, ଅନୁରାଗ ଷଡଙ୍ଗୀ, ବିପ୍ଳବ ସାମନ୍ତରାୟ, ଅଧିନାୟକ ଶୁଭ୍ରାଂଶୁ ସେନାପତି ବ୍ୟାଟିଂରେ କମାଲ କରିଛନ୍ତି। ବାରବାଟୀ ମ୍ୟାଚରେ ଶତକ ଅର୍ଜନ କରି ଅଧିନାୟକ ଶୁଭ୍ରାଂଶୁ ସେନାପତି ଫର୍ମକୁ ଫେରିଛନ୍ତି। ଓଡିଶା ବୋଲର ମଧ୍ୟ କମାଲ କରିଛନ୍ତି । କ୍ବାର୍ଟର ଫାଇଟରେ ଓଡିଶା କେତେ ସଫଳ ହେବ ତାହା ଉପରେ ସମସ୍ତଙ୍କର ନଜର ରହିଛି।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
