ପୁନେ: ପ୍ରଥମ ଦିନିକିଆରେ ଇଂଲଣ୍ଡକୁ 66 ରନରେ ହରାଇଲା ଭାରତ । ଡେବ୍ୟୁ ମ୍ୟାଚରେ ଦୁଇ ଭାରତୀୟ ଷ୍ଟାର କ୍ରୁଣାଳ ପାଣ୍ଡ୍ୟା ଓ ଦ୍ରୁତ ବୋଲର ପ୍ରସିଦ୍ଧ କ୍ରୀଷ୍ଣା ପ୍ରଭାବୀ ସାବ୍ୟସ୍ତ ହୋଇଛନ୍ତି । ସିନିୟର ପାଣ୍ଡ୍ୟା 31 ବଲ୍ରୁ ଧୁଆଁଧାର 58 ରନର ମ୍ୟାଚ ବିଜୟୀ ଇଂନିସ ଖେଳିଥିବାବେଳେ କ୍ରୀଷ୍ଣା 54 ରନ ବ୍ୟୟରେ 4ଟି ୱିକେଟ ହାତେଇଛନ୍ତି ।
ନିର୍ଦ୍ଧାରିତ 50 ଓଭରରେ ପ୍ରଥମେ ବ୍ୟାଟିଂ କରି ଭାରତ 5 ୱିକେଟ ହରାଇ 317 ରନ କରିଥିଲା । ପରେ 318 ରନ୍କୁ ପିଛା କରିଥିବା ଇଂଲଣ୍ଡ 42.1 ଓଭରରେ 251 ରନ୍ରେ ସମସ୍ତ ୱିକେଟ ହରାଇଥିଲା ।
ଫଳରେ ମହାରାଷ୍ଟ୍ର କ୍ରିକେଟ ଆସୋସିଏସନରେ ଖେଳାଯାଇଥିବା ପ୍ରଥମ ଦିନିକିଆରେ 66 ରନରେ ବିଜୟୀ ହେବା ସହ 3 ମ୍ୟାଚ ବିଶିଷ୍ଟ ଦିନିକିଆ ସିରିଜରେ 1-0ରେ ଆଗୁଆ ହୋଇଛି ଭାରତ ।
ଉଭୟ କ୍ରୁଣାଳ ଓ କ୍ରୀଷ୍ଣା ଡେବ୍ୟୁ ମ୍ୟାଚରେ ବିରଳ ରେକର୍ଡର ଅଧିକାରୀ ହୋଇଛନ୍ତି । କ୍ରୁଣାଳ ଦିନିକିଆରେ ଦ୍ରୁତତମ ଅର୍ଦ୍ଧଶତକର ରେକର୍ଡ କରିଥିବାବେଳେ, କ୍ରୀଷ୍ଣା ଭାରତୀୟ ବୋଲର ଭାବେ ଡେବ୍ୟୁରେ ଶ୍ରେଷ୍ଠ ବୋଲିଂ ପ୍ରଦର୍ଶନ କରିଛନ୍ତି ।
ଭୁବନେଶ୍ବର କୁମାରଙ୍କୁ 2ଟି, ପ୍ରସିଦ୍ଧ କ୍ରୀଷ୍ଣାଙ୍କୁ 4ଟି, ଶାର୍ଦ୍ଦୁଳ ଠାକୁରଙ୍କୁ 3ଟି ଓ କ୍ରୁଣାଳ ପାଣ୍ଡ୍ୟା ଗୋଟିଏ ୱିକେଟ ଅକ୍ତିଆର କରିଥିଲେ ।
ଅନ୍ୟପଟେ 318 ରନକୁ ପିଛା କରିଥିବା ଇଂଲଣ୍ଡ ପକ୍ଷରୁ ଓପନର ଜନ୍ନି ବେୟାରଷ୍ଟୋ ସର୍ବାଧିକ 94 ଓ ଜେସନ ରୟ 46 ରନ୍ କରିଥିଲେ । ଉଭୟଙ୍କ ମଧ୍ୟରେ ଓପନିଂ ଯୋଡିରେ 135 ରନର ଭାଗିଦାରୀ ହୋଇଥିଲା । ତେବେ ପରେ ଅନ୍ୟ କୌଣସି ବ୍ୟାଟ୍ସମ୍ୟାନ ବଡ ସ୍କୋର କରିବାରେ ବିଫଳ ହେବାଯୋଗୁଁ ପରାସ୍ତ ହୋଇଥିଲା ଭ୍ରମଣକାରୀ ଦଳ ।
ପୂର୍ବରୁ ଓପନର ଶିଖର ଧାୱନଙ୍କ 98, ରୋହିତ ଶର୍ମାଙ୍କ 28, କ୍ୟାପଟେନ ବିରାଟ କୋହଲିଙ୍କ 56, କେଏଲ ରାହୁଲଙ୍କ 62 ଓ କ୍ରୁଣାଳ ପାଣ୍ଡ୍ୟାଙ୍କ ଦମଦାର 58 ରନର ଅର୍ଦ୍ଧଶତକ ବଳରେ ଭାରତ 317 ରନ କରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
