କଟକ: ନାଗେଶ ଟ୍ରଫି ଫାଇନାଲରେ ପ୍ରବେଶ କରିଛି ଓଡିଶା ଦୃଷ୍ଟିହୀନ ପୁରୁଷ ଦଳ। ପଙ୍କଜ ଭୁଏଙ୍କ ବିସ୍ଫୋରକ ଅପରାଜିତ ଅର୍ଦ୍ଧଶତକ ବଳରେ ଦ୍ୱିତୀୟ ସେମିଫାଇନାଲରେ ଝାଡଖଣ୍ଡକୁ ମାତ ଦେଇ ଫାଇନାଲରେ ସ୍ଥାନ ପକ୍କା କରିଛି ଟିମ ଓଡିଶା।
କୋଲକାତାର ଆଦିତ୍ୟ ଏକାଡେମୀ ସ୍ପୋର୍ଟସ ଗ୍ରାଉଣ୍ଡରେ ଖେଳାଯାଉଥିବା ଏହି ମ୍ୟାଚରେ ଟସ ଜିତି ବ୍ୟାଟିଂ ଆରମ୍ଭ କରିଥିଲା ଝାଡଖଣ୍ଡ। ନିର୍ଦ୍ଧାରିତ 20 ଓଭରରେ 8 ୱିକେଟ ହରାଇ 105 ରନ ସଂଗ୍ରହ କରିଥିଲା। ଦଳ ପକ୍ଷରୁ ରାଜୀଵ ରଞ୍ଜନ ସର୍ବାଧିକ 21 ରନ କରିଥିବାବେଳେ ଅନ୍ୟ କୌଣସି ବ୍ୟାଟ୍ସମାନ ଆଖିଦୃଶିଆ ଖେଳ ପ୍ରଦର୍ଶନ କରିପାରି ନଥିଲେ।
ଜବାବରେ ଧାର୍ଯ୍ୟ ବିଜୟ ଲକ୍ଷ୍ୟକୁ ମାତ୍ର 12 ଓଭରରେ ହିଁ ପାର କରି ଯାଇଥିଲା ଟିମ ଓଡିଶା । ଦଳ ପକ୍ଷରୁ ପଙ୍କଜ ଭୁଏ ସର୍ବାଧିକ 62 ରନ କରିଥିଲାବେଳେ ଲାଲ ପ୍ରସାଦ ସୋରେନ 30 ରନ କରିଥିଲେ । ଯାହା ଫଳରେ ଝାଡଖଣ୍ଡକୁ ପରାଜୟର ରାସ୍ତା ଦେଖାଇଥିଲା ଟିମ ଓଡିଶା । ଆସନ୍ତାକାଲି ଇଡେନ ଗାର୍ଡେନରେ ଖେଳାଯିବାକୁ ଥିବା ଫାଇନାଲ ମ୍ୟାଚରେ ଆନ୍ଧ୍ରପ୍ରଦେଶକୁ ଭେଟିବ ଟିମ ଓଡିଶା।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
